孖T返香港2008: 長洲偉記魚蛋粉 & 太古城市川日本料理 (11月15日)

之前果晚同損友們夜蒲，第二日(11月15日)遲咗起身~ 但一早計劃好入長洲探V婆婆......

 搭巴士過海時，經過佐敦泰林，見好多人門口排隊 + 有電視台記者...後來睇返新聞先知原來當日泰林開倉清貨尾~~~~

 唔夠時間去坐定定食野! 所以先喺7仔麵包蛋糕頂住檔~ 老公要咗個唔知咩日本麵包...

 我就求其要咗個"小牛蛋"~

去到中環港外線碼頭，再喺小食檔買野食......

 牛肉球、辣魚蛋、牛根丸、燒賣.....胡亂咁要咗2兜~~~ (不過好好食!!!)

 我再來1隻炸雞脾~ (就係為咗等依隻炸雞脾...令我地miss 咗一班船!!!  不過都好好食~~~~)

 到咗長洲已經黃昏~ 長洲碼頭海旁既日落景色好靚!!!  好多人影相~~~

 我 + V媽媽返親長洲，都會同V婆婆去海旁既大排檔"偉記"食魚蛋粉~ 佢地黃昏就收檔，好彩果日我地啱啱趕得切!

"偉記"既服務...唉~ 真係唔好提!!!

 比錢去食野...黑口黑面不特止，仲要粗聲粗氣!  真係吹脹~~~ 果日我仲比佢地用膠椅"車"咗一野~ 對唔住都冇聲......

 不過我真係犯賤~~~ 服務就冇架嘞，但佢地既魚蛋粉真係好正!!!  飲啖湯後條氣已經"鋸"返哂!

 佢地既炸魚皮...簡直超good good good!!!! 粉薄香脆鬆化~~~~~

 經過海旁既海鮮檔，見到好大條魔鬼魚...

 仲有好鬼大隻既"馬蹄蟹"! (學名"鱟"~)

 長洲海旁好似越夜越熱鬧! 仲好似有好多好野食~~~ 搵次返香港同老公入去住返幾日，仲一定要試吓馬蹄蟹!!!!

 串串薯片喎!!! 睇個店面唔多似我喺英國美食展見到既franchise 喎~ 究竟係邊個"抄邊個呢呵???

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

 行程相當緊湊!!! 探完V婆婆又要趕返出去太古城，同V阿姨 + 我一對精靈可愛既表弟妹食飯!

是晚V阿姨請客~ 去咗太古城中心裡面既"市川日本料理"!

好似叫咗個6人套餐......(唔係我發版~ 唔記得咁多!)

 每人1個既"蟹籽沙律"~ (好味!)

 雜錦刺身~ (有鮑魚!!!)

 唔知咩卷~ (OK啦...)

 焗蠔~ (好味!)

 雜錦天婦羅~ (OK~ 因為一向對天婦羅麻麻...)

 d屎咁多既帶子~ (普通啦~~ I've had better!!!)

 薄到食完都唔多覺既燒牛肉~ (冇乜特別! 隔離果咋炒芽菜仔仲好食....)

以上既野都係6人份量，大家share; 除此之外，每人仲有一份飯or 麵 - 凍或熱既soba / 炒飯~~

 V阿姨要咗凍soba;

 我要熱既...

 老公就要炒飯~

個餐唔多夠喉~ 於是叫多幾樣野share......

 煎餃子~ (超普通...)

 燒牛脷~ (依個正!!!)

 燒雞翼~ |(唔知點解隻隻都係得半隻????)

總括來講~ 我覺得依餐麻麻! 我寧願去食"元氣"...... 不過長輩請食飯，緊係唔好阿之阿左咁多啦!!!!!