孖T返香港2008: 無聊逸事數則

喺香港3星期...話長唔長，話短又唔短~~~ 我地除咗日日吃喝玩樂之外，仲多咗留意周圍發生既野.....(無聊野! )

沙田圍村生物其一 - 鹽蛇

自嫁作人婦之後，我返親香港都係孖住老公~ 咁就緊係要跟老公住喺太62太99沙田村屋啦! 不過太6299 屋企除咗有2隻狗、3隻龜 + 2條龍魚之外......圍村範圍以內既生物多到似動物園!!!!

有一晚深夜我去沖涼，入到浴室我唔小心跌咗條毛巾落地下~ 我執起之後見到地上有pat 野...初時我以為係太62隻芝娃娃瀨咗臭臭......

 望真d發現原來係"鹽蛇"! 本來我以為佢已經死咗...點知再望真d - 會郁架~~~~(條尾同個身都仲郁緊!!!)

 腸都"必"哂出來 + 下身已完全癱瘓...佢依然死唔斷氣，不停用前肢喺地上爬來爬去!!!

正當我想尖叫...好彩依個時候，老公幫我攞洗面液入來救咗我!!!

 雖然我怕鹽蛇，但我並唔想殺生~ 不過經老公"診斷"...老公認為鹽蛇應該冇得救! 於是老公攞咗張報紙來.......

 老公: little fella...sorry 呀~ 我都想救你架! 最多我幫你搵個冇咁醜樣...放你喺佢個胸度~~~ (老公攞果張報紙係鹹版來......

) 你唔好怪我老婆喎......

就咁...老公包住鹽蛇放咗入垃圾桶~ 我feel 好bad! 沖完涼後猶有餘悸......

 老公: 冇辦法嘞~ 佢傷成咁都行唔到...放佢出外面都一定比雀仔食架! 妳下次小心d啦~ 佢應該知妳冇心既.....

 我: 冇心咩呀?

 老公: 冇心殺佢囉!

 我: 我冇殺佢呀~ 我發現佢時，佢都仲未死!!! 嚴格來講...殺死佢既人 - 係你喎!!!!

 老公: 我幫佢end 佢既痛苦 + 幫妳善後之喎! 係邊個搞到佢咁痛苦架???

我: 其實都証明唔到係我搞成佢咁~ 我一執返條毛巾，已經見到佢係咁! 而且係你沖涼先過我...你點知唔係你搞到佢咁呀?? 可能幫佢果個係我 - 我"發現"佢受咗重傷~~~~

 老公: 妳係咪人來架?? 妳夜晚點瞓得著?????

 我: 哇哈哈~~~~~~

(鹽蛇~~~ 真係對唔住!  我地真係冇心架......)



沙田圍村生物其二 - 鼻涕蟲 (蛞蝓)

喺香港每晚三更半夜返沙田，或者半夜去7仔食宵夜...都會見到一條必經小路上，有好多蝸牛! 大既有巨型東風咁大，細既都有1蚊銀咁上下~ (不過冇影相!)

 但有一晚，喺其中一小段路，同時見到6、7條鼻涕蟲!

 最難得既係 - 2種唔同既鼻涕蟲同時出現! (其實2種我都見過~ 不過一齊出現就係第一次見!

)



沙田圍村生物其三 - 草蜢

有日出去時突然有隻野喺我面前飛過~ 跟住喺我前面冇幾遠既地上停落來...一望發現係隻草蜢!

 我好似癲婆咁追咗佢幾分鐘...先影到依張咁清楚既草蜢相!!!

 老公一路跟住後面問: 得...未......呀.........??? 最後草蜢飛咗入草叢我先收檔罷休~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

圍村除咗有d唔係好有趣既生物...仲有d好有趣既野! (對我來講~)

有蕉既蕉樹

 小路旁有一棵蕉樹~ 請問有冇人可以話我知 - 箭咀指住...d蕉下低吊住依舊係咩野來???

影完依張相幾日後，再經過棵蕉樹......d蕉竟然冇哂喎!!!!!  

不過第二朝...我 + 老公發現樓下有間房成地都係蕉......



"岸居"既果樹

 村口有間屋竟然叫做......

 屋前有一棵大樹......

 樹上結滿果實!

 有冇人可以話我知 - 依種好似羅漢果咁上下大既果係乜野來???

P.S. 以上既問題其實全部都唔重要~ 只係好學既我比較八卦想知道!  請各位有識之士告知答案~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

無明腫毒

工人好心做壞事! 有日我地出咗街，幫我地洗個冷氣隔塵網~ 點知洗完果晚就出事 - 冷氣唔"冷"!!!!  其實樓上仲有一間房~ 不過同太6299同層，我地又成日去街去到三更半夜...唔想嘈住老人家! 見11月既天氣都唔算太熱...所以就開窗瞓~ 點知......

始終係新界地方...d蚊勁大隻到會食人!!!!

 我本來一向好惹蚊既，但唔知係咪佢地嫌棄我太瘦or 唔夠好味??? 定係老公太肥美???? 老公晚晚都比蚊針!!! 針到身、手 + 腳總共十幾粒!!!! 好彩幸保佢個靚仔樣~~~~

 但有一朝早，老公隻左手又紅又腫似豬手!

 腫到連血管都睇唔到! 不過老公話唔痕亦唔痛~ 99比咗枝唔知咩油佢搽，第二日就開始消腫嘞......

 究竟係咪惡蚊作怪呢?? 定係其他圍村怪獸??? 老公隻手點解會腫成咁...至今仍然係一個謎來! 

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

狗仔~ 祝你好運!!!

 有日經過雅蘭第一期，見到走火通道出口企咗3個師奶 + 2個男人...企中一個男人著住制服; 另一個男人就手渣文件夾~ 走火通道門前有一隻唐狗仔坐咗喺地下!!!

我同老公好好奇，於是問果幾位師奶發生咩事......

 師奶A: 我見佢(唐狗仔)一個人喺馬路邊(彌敦道!)行來行去~ 好危險!!! 我地氹咗佢好耐先氹到佢返埋來!

 師奶B: 佢好乖 + 好乾淨，但冇頸圈，應該係有人養開架...唔知係走失定係主人唔要佢??? 我地等咗好耐都冇人來搵狗......唯有照顧住佢先 + 比水佢飲!

我見到隻狗仔，覺得佢個樣好唔開心 + 好驚~~~ 一向怕唐狗既我，當時只覺得佢好可憐......

至於果2個男人...原來1個係"愛護動物協會"(著制服者); 另1個係"漁農處"~~~

 師奶A: 如果搵唔到佢主人...又冇人領養佢......佢地可能人道毀滅架嘞! 不如妳要咗隻狗仔佢吖???? 佢好乖架~~~~

 我: erm......我住喺英國架......

 我: Hon~ 你阿公(即太62)可唔可以收留佢呀?? 反正佢都養緊金仔 + 蕃薯......

 老公: (為難地) Honhon~ 我唸唔會嘞! 就算阿公收留佢...佢都一定會比同村d狗咬死架!

我: ......咁點算呀? (我失望地喊咗出來!!!

)

依個時候...個愛護動物協會男人，拖咗狗仔上一架有愛護動物協會字樣既van 仔，我地 + 師奶們跟埋去.....男人一check - 發現狗仔雖然冇頸圈，但有晶片喎!!!

 個漁農處職員跟住同我地解釋，會先聯絡狗主，了解情況後先作決定......我地眾人鬆一口氣~ 我希望狗主只係唔小心走失...不過都太過唔小心嘞!!!!

我 + 老公目送個男人渣走愛護動物協會架車裡面既狗仔先離開......

狗仔~~~ 唔知你返咗主人身邊未呢?  下次要跟實主人嘞!!!  祝你幸福快樂啊~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

天星碼頭既袖珍黏土模型

有日經過尖沙咀天星碼頭既遊客中心，見到窗櫉有幾個手工唔錯既袖珍黏土模型非賣品!

 粥麵店~

 茶餐廳~

 酒樓~

特別影低佢當參考~ 老實講...食物既製作真係好仔細精美!

 不過其他細節如枱椅、架之類...個人覺得有少少求其......

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

其他無聊事

 有日行千色店裡面既10蚊店，老公搵到包茶包，話個包裝上面個公仔似我!

 似咩??

 有日喺中環見到"HK1"車牌~ 唔知係邊個有錢佬架車呢????

 我見有個女仔已經影緊，所以我先影埋一份~ 點知我一影，即時有個約50歲既大叔唔知喺邊度行出來及住我!!! 咁佢又冇唔比我影......不過大叔~ 你睇我個款似狗仔隊咩???

陪太6299 去沙田一間酒樓飲早茶...

 佢地既點心單上有一個點心叫做"這不是春卷"...仲有埋英文名"I am No Spring Roll"......

唔係春卷，咁係咩卷呀????  懶得意~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

以下依件唔係無聊事...其實係喜事! 不過得幾張相 + 隻字...廢事開多版~~~~

 真係一雞死一雞鳴......今次返香港雖然收到損友們唔好既消息; 不過另一方面，Joanne 有結婚既打算!

 夜蒲飲清水.....係因為啱啱病好咗既Joanne 特別出來見我地一面!

 有人呻醋喎! 一臉唔順超~~~~

Joanne~~~ 決定咗幾時記得要早響呀!!!! 等我搵定平機票喎~~~~