新加坡 - 海鮮喇沙 (Seafood Laksa)

依個係用現成喇沙醬既懶人喇沙~ 因為經我研究過，自製喇沙醬需要太多唔同材料!  樣樣買齊但樣樣都只用少少......實在太唔化算嘞!!!

1. 粗米粉或油麵煮好 + 過冷河備用。(我用越南既順化米粉!)

2. 預備配料: 雞蛋、豆腐卜、大蝦、蜆、牙菜仔和炸魚條。

3. 雞蛋烚熟，去殼切半; 牙菜仔洗淨瀝乾; 炸魚條切片備用。

4. 湯底調味: 椰奶、香茅醬 (可用新鮮香茅)、羅望子醬和喇沙醬。

5. 另預備罐裝魚清湯適量 (可用魚湯精代替)。

6. 莞茜和青蔥切碎備用; 乾蔥頭切碎，並用少許油炒香備用。

7. 魚湯加入喇沙醬拌勻煮滾，加入香茅醬和羅望子醬適量拌勻後試味。

8. 將大蝦、蜆、炸魚片和豆腐卜加入湯中滾一會至海鮮熟 + 入味。

9. 米粉放碗，鋪上芽菜仔 (芽菜仔可生食~ 若不慣豆青味，可先自行將芽菜仔略略灼熟除味!); 大蝦、蜆、炸魚片和豆腐卜放米粉上。

10. 喇沙湯拌入椰奶煮滾; 滾湯淋上米粉上，放上半隻烚蛋，灑上莞茜、蔥花和乾蔥即成。