2010年3月17日星期三

酸辣無骨鳳爪 (冷盆)


唔敢叫佢做"泰式" -monkey2069.gif image by veronica_tsim
因為我用既係越南魚露...

1. 急凍鳳爪(全生果隻)解凍後洗淨瀝乾。

2. 燒滾一鍋水，加入紹興酒2湯匙和薑2片，放入鳳爪後再煮滾後，轉中大火煲15至20分鐘至鳳爪熟。

3. 取出鳳爪放入冰水中，或用經過濾的自來水啤水至油清及全涼。

4. 將鳳爪瀝至全乾及蓋好，放入雪櫃普通格約1小時雪凍。

5. 取出鳳爪剪去指甲，用剪刀剪開連著鳳爪腳趾的筋，將骨頭取出。

6. 每隻鳳爪切半; 細洋蔥和紅蘿蔔切絲，加入鳳爪內拌勻。

7. 汁料: 魚露、青檸汁、白米醋、蒜蓉、紅辣椒絲、糖和清水拌勻後試味。

因為我懶 - 所以我用依隻越南春卷魚露來代替汁料!

(不過我仍然有加青檸汁 + 另加辣椒絲~ )

反正依枝野既材料都係果咋野~ why not?

8. 將汁料加入鳳爪內，再加上新鮮切碎莞茜拌勻，放入雪櫃雪過夜至入味即成。


>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
_2078.gif image by veronica_tsim 今次我初次小試牛刀 - 自己去鳳爪骨!

但其實我都唔係去得好好........

最完整最靚既大約係咁既款啦，技術有待改進~~~~

其實鳳爪點去骨真係要自己落手落腳去領悟 + 體會既! (好難用文字去表達......)

而且自己去骨真係好麻煩! (所以怕麻煩既人唔洗試嘞!! )

當然可以買急凍無骨鳳爪啦......

不過自從喺網上睇過鳳爪去骨工人係點去鳳爪骨之後.........

_2001.gif image by veronica_tsim 我真係覺得好恐怖~~~~~~~~~

所以幾麻煩都好我都寧願自己去骨!!!!


於

27 則留言:

  1. 雀后2010年3月17日 上午3:05

    嘩!好野喎!自己去埋骨添呀!
    [版主回覆03/17/2010 19:31:00]其實真係幾難起骨架! 起得都唔係好好.......不過為咗食無計啦~
     
     

    回覆刪除
  2. 紙巾2010年3月17日 上午3:11

    好厲害呀!  好開胃咁呀!
    [版主回覆03/17/2010 19:25:00]過獎嘞~ 今朝一口氣食咗成半盒! 好食到唔停得口~~~~
     
     

    回覆刪除
  3. Gaileは林家歐巴桑2010年3月17日 上午4:39

    d骨都起得好鬼靚呀...枝壞南魚露係咪就係越南檬粉淋上去果d呀?
    [版主回覆03/17/2010 20:02:00]唔靚呀~~~~~~ 好多手指斷鬼哂.......
     
    我都唔知係咪檬粉果隻呀! 因為我好少食涼檬既，多數食生牛肉湯檬!  不過依枝魚露幾好味架~~~~
     
     

    回覆刪除
  4. Mrs Beauty2010年3月17日 上午5:03

    哈哈，你終於整咗嗱！好嘢，我又可以偷師學整嗱！
    [版主回覆03/17/2010 20:06:00]依個係酸辣之喎! 收唔收貨呀~ 白雲遲d先試!
     
     

    回覆刪除
  5. Mrs Beauty2010年3月17日 上午5:44

    收貨嗱！呢款酸辣鳳爪我都鍾意食！但係仍然期待你嘅白雲鳳爪呀
    [版主回覆03/18/2010 21:15:00]好呀~ 過一排先整白雲鳳爪吖! 因為我老公唔食雞腳，尋晚得我自己一個食哂成盒鳳爪.......
     
     

    回覆刪除
  6. 何媽2010年3月17日 上午6:03

    你的手術技術都好好!! 真係無你咁好心機!!
    [版主回覆03/18/2010 21:14:00]為咗食~ 我真係可以好好心機架!
     
     

    回覆刪除
  7. andrea2010年3月17日 上午6:29

    我咁懶一定唔啱我
    [版主回覆03/18/2010 21:14:00]依個唔去骨都好快手整之嘛!
     
     

    回覆刪除
  8. 東主有喜2010年3月17日 上午7:47

    不過自從喺網上睇過鳳爪去骨工人係點去鳳爪骨之後 <--------
     
    可唔可以分享下?  我一直都好想知係點..
    唔通真係有個亞婆係咁咬咬咬???
    [版主回覆03/18/2010 21:13:00]你既然都聽過阿婆咬咬咬既傳聞，我相信你要搵我睇過既野都易如反掌!
     
    你真係想知就自己上網查"鳳爪去骨"啦~ 太核突唔想喺依度討論.......
     
     

    回覆刪除
  9. wan2010年3月17日 上午11:19

    呢個Good!!!!!!我鍾意食泰式酸辣多過白雲^^
    (做乜鬼而家丫烏咁鬼煩??留言要入驗証碼..........)
    [版主回覆03/18/2010 21:11:00]巧耐茅見!  妳好日都唔入吓來，妳緊係唔知要入碼啦! 妳最近點呀?
     
    我都係鍾意酸辣多過白雲!
     
     

    回覆刪除
  10. Sandy2010年3月17日 下午2:40

    wow~只睇賣相已經好得，相信味道一定好"正"... ...好佩服妳咁有心機逐隻爪起骨... ...雖然我食唔到辣，但好鐘意食雞腳，我老公見到肯定流晒口水啦！ ...可惜瑞士唔見有雞爪賣... ...急凍都無見過喎！我一返香港就狂搵雞腳食呀！
    [版主回覆03/18/2010 21:08:00]多謝!
     
    咦~~~ 妳老公係瑞士人雞腳佢都啱? 我老公係竹升都唔鍾意雞腳......所以成盒我一個人食哂!
     
     

    回覆刪除
  11. Cooking2010年3月17日 下午7:30

    要隻隻咁拆骨整完成碟真係手都抽筋呀 ... 你好有心機去骨呀
     
    行咗半個銅鑼灣都搵唔到越南魚露, 結果係 city's super 買咗支泰國既, 希望自己好運支野好味啦
    [版主回覆03/18/2010 21:06:00]咁我唔係齋用手拆骨既~ 用較剪輔助嘛!
     
    有人話我上次用來整雞翼既越南富國魚露，中環黃雙如開果間"有食緣"有得賣呀!
     
     

    回覆刪除
  12. 攪攪震2010年3月17日 下午8:30

    嘻......我都聽聞過無骨鳳爪去骨既方法, 真係不敢相信呢
    我都想試下唔加紅辣椒做無骨鳳爪
    [版主回覆03/18/2010 20:58:00]妳聽聞過，咁妳有無睇過相? 睇埋相真係想暈低!!!!!! 我睇完後打死我都唔會買來食.......
     
     

    回覆刪除
  13. Prime2010年3月17日 下午9:21

    真係用口去骨係最快 細個時貪玩食親雞腳都用口逐粒骨退出嚟，而皮完好無缺 而家得鬼閒玩呢啲野! 自己去骨真係功夫餸嚟
    [版主回覆03/18/2010 20:57:00]不過好核突呢!!!!!!! 妳有無睇過網上既相呀? 真係打死我都唔會買 / 食!!!! 我寧願麻煩d自己去骨~
     
     

    回覆刪除
  14. vv2010年3月17日 下午9:24

    嘩, 呢個又係超正...
    我買唔到無骨架, 又唔會諗到可以自己去骨, 不過好似好難咁呢...
    [版主回覆03/18/2010 20:56:00]無骨雞腳香港應該好易買喎! 不過打死我都唔會買 / 食!!!!! 睇完網上相之後，寧願麻煩d自己起骨!
     
     

    回覆刪除
  15. AK2010年3月17日 下午11:00

    我都好耐無整過尼味餸了...起骨你都識呀...我就真係搞佢吾掂嘞...都係咁現成起左骨果d咋...但其實吾起骨都好好味架..你下次試吓...
    [版主回覆03/18/2010 20:55:00]我都覺得自己去骨好麻煩，不過我懶~ 唔想食時累骨......
     
    我睇過網上既相，真係打死我都唔敢再買 / 食現成起哂骨既雞腳!!!!!
     
     

    回覆刪除
  16. 澤洛媽2010年3月18日 上午12:59

    正呀! 我好鍾意去食泰國嘢時一定叫架! 但拆骨真係好煩, 又唔識拆...諗吓做唔做...... we8
    [版主回覆03/18/2010 20:53:00]我睇過網上流傳既相之後，打死我都唔會買去咗骨既雞腳! 寧願麻煩d自己去骨!!!!
     
     

    回覆刪除
  17. Kelly Chan2010年3月18日 上午1:12

    呢個小食真係一流,連唔鍾意食雞腳既我都愛上呀!!
    [版主回覆03/18/2010 20:52:00]我尋日空口食哂成盒!  好味到唔停得口~~~
     
     

    回覆刪除
  18. MuiMuimui2010年3月18日 上午3:55

    哈哈哈哈哈哈 ﹗去完骨的雞手﹐哈哈哈 ~ 中間果隻好似粗口手勢呀 ~ 咁鳳爪去骨工人係點去鳳爪骨呢﹖ 仲有呀﹐你的鳳爪都冇老皮既~
    [版主回覆03/18/2010 20:50:00]粗口手勢
     
    其實未煮又未去骨既雞腳都幾核突.....有少少似BB手仔!
     
    妳自己上網查"鳳爪去骨"啦! 一定搵到圖文並謀呀~ 太核突唔想喺度講呀!  
     
    妳係咪講緊黃色硬硬地果層皮呀? 係呀~ 依度d急凍雞腳整乾淨哂架嘞!
     
     

    回覆刪除
  19. Sandy2010年3月18日 上午7:01

    哈哈~我老公係另類鬼佬，至愛亞洲飲食，連我唔鐘意食嘅牛雜，佢都食到津津有味呀！  
    雲吞麵嘅湯底都俾佢飲晒... ...真係服咗佢... ...佢未見過未食過嘅中菜會問係咩... ...問咗就好勇敢咁試食架啦！正一為食貓... ...成日問我點解唔識整蝦餃俾佢食... ...如果俾佢見到妳整呢碟咁正嘅鳯爪，實會嘈我~叫我整俾佢食...
    [版主回覆03/18/2010 22:47:00]咁幾好喎! 又肯試又鍾意~ 我老公都叫做肯試既，不過專揀古靈精怪既野來試.....不過 雲吞麵湯底我都會飲架!
     
    我整過蝦餃喎! 好易整架咋~   http://hk.myblog.yahoo.com/veronicams_tsim/article?mid=10568
     
     

    回覆刪除
  20. qm2010年3月18日 下午6:04

    我禽晚明明留左言架，個係唔知點解搵唔返？ 我仲以為自己眼大睇過籠tim
     
    我完全無法想像自己可以將d鳳爪去骨，我諗我會整兩整就無晒耐性去搵口咬哈哈哈

    回覆刪除
  21. qm2010年3月18日 下午6:07

    我禽晚明明留左言架，但唔知點解搵泥搵去都搵唔返。 頭先想留返個言啦，yahoo又"正在處理中"左勁耐，激死
     
    我完全無法想像自己可以成功將d鳳爪去骨，我諗我會去去下無晒耐性然後走去搵口咬算啦哈哈哈

    回覆刪除
  22. qm2010年3月18日 下午6:10

    我禽晚明明留左言架，但唔知點解搵泥搵去都搵唔返。 頭先想留返個言啦，yahoo又"正在處理中"左勁耐，激死
     
    我完全無法想像自己可以成功將d鳳爪去骨，我諗我會去去下無晒耐性然後走去搵口咬算啦哈哈哈
    [版主回覆03/19/2010 17:55:00]正在處理中唔係整返好嘞咩? 又來過!!!?!?!?!
     
    鳳爪係幾難去骨架! 所以我去得唔靚囉......若我用口咬來去骨，我老公當然唔mind~ 不過若係我食，而骨係班泰國工人用口去骨，咁就打死我都唔食嘞!
     
     

    回覆刪除
  23. 菲仔2010年3月18日 下午7:13

    好勁呀, 自己去骨
    [版主回覆03/19/2010 17:51:00]唔勁呀! 都去得唔靚.......
     
     

    回覆刪除
  24. Full House2010年3月19日 上午4:02

    你好勁呀 , 自己去埋骨呀 , Katrina 今日同我去街市買餸 , 她叫我買雞腳呀 , 我又聽佢講買了$10 , 而家都唔知點整好呀 !
    但Katrina 食又不可去骨, 因她是愛"損" 骨的小女孩呀 !
    [版主回覆03/20/2010 05:33:00]唔勁呀~ 都去得唔靚.....
     
    Katrina 鍾意損骨咁咪仲好，唔洗去骨慳返好多功夫!  一早去咗骨果d打死我都唔會再食!!!!!
     
     

    回覆刪除
  25. MuiMuimui2010年3月19日 下午12:32

    唔係呀﹗德國的雞腳老皮黑色既﹌ 下次影俾你睇﹌
    [版主回覆03/20/2010 05:32:00]咁核突?????  雞腳d皮點會黑色架????
     
     

    回覆刪除
  26. sui wai2010年3月24日 下午11:37

    我十幾年無整呢樣啦,以前家人朋友成日叫我整,有一次我覺得似起緊Ｄ ＢＢ仔腳指咁....打晒冷震.......之後就無再整啦
    [版主回覆03/25/2010 19:57:00]我都覺得幾似BB仔手.......
     
     

    回覆刪除
  27. GRACE2010年7月23日 下午6:40

    你好也~我想問呢...你支魚露係邊有得買家..
    真係好方便呢...哈哈...!!
    [版主回覆07/25/2010 04:31:00]妳好~ 其實我住喺英國架，我枝魚露係喺依度既中式超市買架! 我唔知香港邊度有得買喎.....
     
     

    回覆刪除