所以我食自己既日子尚要持續一段時間......
最近天氣唔係橫風就橫雨，我根本完全唔想出街，
所以會一次過買定哂幾餐既餸，唔洗出街都可以隨時煮~
雖然要食自己，但我無偷懶有煮野食架!
不過Mr.T 每日打電話來審犯似要我詳述當日食過乜野，
佢一定以為自己唔喺我身邊，我就會掛住佢到茶飯不思啦!
查實佢大可以放心.......因為我唔會掛住佢而無哂胃口，
我只會化思念為食慾!! 哈哈~~~~
2011年11月9日: 餐蛋公仔麵
依餐叫做最"咋"~
不過有馬莎午餐肉 + 粉藍荷包蛋，都唔太差啫!
2011年11月10日: 蜜糖豆銀杏煮齋鮑魚
是日農曆十五食花齋!
早前買咗依隻台灣萬里香齋鮑魚，
不過就咁食齋鮑魚似乎寡咗d......
加埋蜜糖豆 + 罐頭銀杏一齊炒~
齋鮑魚惹味; 蜜糖豆 + 銀杏清淡，
黃黃綠綠好靚又好味既一個齋菜啊!
蜜糖豆銀杏煮齋鮑魚食譜click here~
2011年11月11日: Eggs Benedict
大部份人視Eggs Benedict 為早餐或brunch; 不過我第一次食Eggs Benedict 係宵夜!
我讀大學時Glasgow 有一間叫做"Insomnia" 既24小時咖啡店，
每逢夜蒲後一定會同朋友去Insomnia 食宵夜，
當年我同Mr.T 都喺Insomnia 留低過唔少腳毛......同埋銀兩!
我第一次食Eggs Benedict 就係喺Insomnia，仲一食就愛上咗!
不過好多年前Insomnia 關門大吉，我地除咗少咗個蒲點之外，
仲失去咗我最愛既Eggs Benedict!!
想自己整Eggs Benedict 已經好耐! 不過唔知點解一直無實行到......
好開心終於整咗~ 而且第一次整已好成功好好味!!
試過幾次用正經方法整水煮蛋都唔成功，
今次用個cheating 方法來提高成功率!
依種水煮蛋矽膠模真係易用又方便~
煮出來既蛋完美流心!
不過我決定遲吓會再試過整正經水煮蛋，
一定要整到成功為止!!
Eggs Benedict 班尼迪克蛋食譜click here~
2011年11月16日: Spaghetti alla Puttanesca (妓女意大利粉)
上一個weekend 去咗Birmingham 陪老公，
11月15日晚搭通宵巴士由Birmingham 返Glasgow~
返到屋企沖個靚涼後即時大覺瞓去......
瞓醒第一時間緊係食野啦!
要快手煮好有得食; 材料又要方便就手唔洗出街買，
咁屋企有意粉、車厘茄、鹹鯷魚、黑橄欖、酸豆......
非妓女意粉莫屬啦!
原因就同依碟意粉點解叫做"妓女意粉"一樣 - 夠就手!!
Spaghetti alla Puttanesca 妓女意大利粉食譜click here~
2011年11月17日: 唐芹茭白筍炒雞柳
喺Birmingham Bullring Indoor Market 買咗新鮮茭白筍 + 唐芹，
第一次買茭白筍，初時都唔係好知點整.......
網上見到好多人用來整涼拌，
不過天氣咁凍我緊係唔想食涼拌啦!
又見到有人用來炒，
於是唐芹 + 茭白筍各用咗一半一齊炒雞柳~ Yummy!!
唐芹茭白筍炒雞柳食譜click here~
2011年11月18日: 魚蛋蝦子麵
是晚唔想煮，快手淥2個蝦子麵 + 幾粒魚蛋就搞掂!
依隻新買既欖形泰國魚蛋幾好味~ 讚!
2011年11月19日: 唐芹茭白筍炒火雞胸
前2日用剩一半唐芹 + 茭白筍，今次用來炒火雞胸~
雖然火雞胸無雞上脾咁滑滑，不過調味搭夠一樣好好食!
2011年11月21日: 香辣青瓜毛豆仁炒雞心 & 清炒菜心
weekend 喺泗和行見到有新鮮雞心賣，
平時多數只得雞肝 + 雞腎，雞心好少見有得賣~
買咗大包都只係58p，我一個人緊食唔哂!
所以只用咗一半來炒青瓜 + 毛豆仁，另一半入咗冰格雪住佢!
香辣青瓜毛豆仁炒雞心食譜click here~
2011年11月22日: 柴魚花生鹹豬骨粥 & 台式炒米粉
喺Birmingham Seoul Plaza 買到包柴魚乾~
之前去韓國都買過依種柴魚返來煲粥，好好味不過幾貴!
急不及待整返煲久違既柴魚花生鹹豬骨粥歎吓!
一大鍋31cm oval，熱辣辣香噴噴~~~~
唔夠24小時已經比我一個人清哂!
加多碟炒米粉就完美嘞!
炒粉麵都一定要有余均益辣椒醬~
炒米粉我首選台灣新竹米粉!
夠哂幼細，炒起上來易入味~
柴魚花生鹹豬骨粥食譜click here~
台式炒米粉食譜click here~
2011年11月23日: 五香肉丁 & 清炒菜心
Birmingham 實在係一個買餸既好地方!
今次比我喺一間中式雜貨小店買到五香肉丁 + 回鍋肉~
大大話話我唸真係有成7、8年完全無食過依2種罐頭!!
同樣我初來蘇格蘭時依2樣罐頭都買得到，
當時仲有一隻好鬼正既罐頭豬雜!
但後來又係唔知咩原因...五香肉丁、回鍋肉 + 罐頭豬雜全部失哂蹤!!
今次喺Birmingham 意外地久別重逢，
我將貨架上4罐五香肉丁 + 3罐回鍋肉全部掃哂!
久違既味道...依然係咁鬼正~~~~~ 10個讚!
嘩 一次過睇晒呢近排既美味日誌 !! 一個人食飯都可以好豐富 正呀
回覆刪除[版主回覆11/24/2011 21:20:35]一個食飯更加要食好d! ^^
VERY VERY NICE INDEED ^^p
回覆刪除[版主回覆11/26/2011 05:55:51]Thank you Jade! ^^
你老公成日出 trip ，得番你一個是否很悶呢！你好勁，一個人食，都好講究！
回覆刪除[版主回覆11/26/2011 06:01:33]我會掛住佢，但唔覺得悶~ 我唔係一個黐身既老婆來! 可能我係獨女，讀大學時又自己住過一段長時間，我自問好獨立! 而且就算佢唔出trip，平時佢日頭都要返工架啦~ 食野對我來講好重要，自己一個人食或同老公一齊食都要食得好! ^^
哈哈...服咗你喇...."妓女意大利粉" ?!?!?!....不過佢好靚女噃 ^^
回覆刪除[版主回覆11/26/2011 06:03:45]依個意粉好好食，而且又好快手煮~ ♥ 個名妓女意大利粉唔係我作出來架，意大利真係有依個意粉架!! 典故請click 食譜條link! ;-)
我回來YAHOO BLOG喇 T.T 真係衰到無人有...我差D成個BLOG無左....嚇死我~~
回覆刪除講返正提先~ 你整果個柴魚花生鹹豬骨粥好正呀, 好綿呀~ 夜麻麻睇到都好想食呀 @.@
[版主回覆11/26/2011 06:06:02]Wallace 媽~ 我近幾日比YBlog 激到嘔血咁滯!!! 不過衰野都係唔好講，廢事爆血管.....個粥真係好正架! 自己煲落足哂料!! ^^
一個人都咁有心機煮野食~~~^^
回覆刪除[版主回覆11/26/2011 06:06:45]食野係我日常生活好重要既一部份! ^^
沒有Mr. T的餐單仍然好豐富啊
回覆刪除[版主回覆11/26/2011 06:07:04]食野係我日常生活好重要既一部份! ^^
最想食個炒米粉...
回覆刪除[版主回覆11/26/2011 06:08:23]個炒米粉好快手架咋! 新竹米粉特幼，用熱水煮1分鐘就炒得!!
厚切午餐肉正^^
回覆刪除[版主回覆11/26/2011 06:08:47]不過馬莎午餐肉麻麻地.....
我未食過馬莎午餐肉~~我都想買黎食!
回覆刪除回鍋肉真係好多年冇食過呢~~
[版主回覆11/26/2011 06:09:37]未食過都可以試吓既，不過我覺得唔好食! 都係Spam 最正~
哈哈~真係特長啊~未食過馬莎午餐肉，好好吃嗎？像不像三花？
回覆刪除[版主回覆11/26/2011 06:10:36]我覺得唔好食呀! 唔會再買~ 我未食過三花，我平時食開Spam 既~
I like the chili oil.
回覆刪除[版主回覆11/28/2011 02:28:38]it wasnt chilli oil, it s chilli sauce!
嘩... 樣樣都好好味喎 ^0^
回覆刪除[版主回覆12/05/2011 06:57:49]Thanks VIVI! ^^
你好勁呀, 一個人都可以整0甘多0野, 呢輪忙死, 成日出街食, 食到真係口都"Wear"埋呀...
回覆刪除[版主回覆12/05/2011 06:57:33]我以前讀書時一個人都係咁煮飯，一個人都要食飯架嘛! ^^
煮水蛋要唔散，係水度落幾滴醋就得架啦
回覆刪除[版主回覆12/05/2011 06:52:49]第一次整水煮蛋時已經落咗醋，都係散....
我上次又係係亞超度買左包你呢D茭白筍﹐但佢包野上印住話係水筍﹐攪到我上網搵又見到幾十種唔同樣既筍﹐諗黎諗去諗唔掂最後成包嘥左。其實有時我諗某D貨突然冇得賣會唔會係品質有問題﹐突然查出就被抽起晒(我聽講尤其大陸貨--用木筷子做假筍咩都有)。
回覆刪除[版主回覆12/05/2011 06:47:43]其實我買依幾枝茭白筍都係一包，而且都係印住水筍! 妳估計既都有可能，不過我對歐洲入口食品都幾有信心，洋人乜都投訴一餐，感覺上佢地入口貨品會驗得嚴謹d!
ooooh i miss the ma ling 回鍋肉 so very much....
回覆刪除[版主回覆02/14/2012 23:43:45]i think 回鍋肉 is not as good as before! but 五香肉丁still good~
五香肉丁同回鍋肉，呢兩樣罐頭我係BRISTOL同EXETER既中超都搵唔到。希望下次去倫敦買得到啦。
回覆刪除[Ka回覆03/09/2012 17:13:19]講得唔清楚，讓你誤會了
[版主回覆03/09/2012 07:39:18]依篇講緊Birmingham 妳無啦啦話倫敦，我以為妳睇錯咗咋!
[Ka回覆03/08/2012 18:18:03]因為去LONDON既機會比去BIRMINGHAM大。
[版主回覆03/08/2012 10:29:04]我依罐喺Birmingham 買果喎!
剛來倫敦
回覆刪除可以請問有人知道那裡有賣"五香肉丁"？
好想食啊 Q_Q
[版主回覆05/31/2013 16:21:12]地址你去google "London Chinese Supermarkets" 會搵到一咋倫敦中超架嘞~
[版主回覆05/31/2013 16:20:16]倫敦我唔係好清楚啊! 我依幾罐喺Birmingham 買架~ 不過你可以去倫敦唐人街既超市試吓搵，無的話你就試吓去大間既中式超市e.g. Wing Yip, Hoo Hing，不過大間既中超唔會喺倫敦市中心~