棉花糖機 (附彩色砂糖做法)

其實唔好甜食既我，
從小到大都幾鍾意食棉花糖，
貪佢輕飄飄，甜味似一陣霧，唔會太甜~

又其實我好鍾意棉花糖果種淡淡既粉彩色，
不過弊在街賣有顏色既棉花糖多數係有flavour，
e.g. 紅色係所謂既士多啤梨口味，
但對我來講係藥水味! Yuck~
所以我從來只食純白色原味既棉花糖......

上星期Mr.T 送咗部棉花糖機比我，
有咗依部機，我就可以自製彩色但原味既棉花糖嘞!
洗鬼另外再花錢買所謂"棉花糖專用糖"?


彩色砂糖DIY:

1. 首先當然要有砂糖啦!
普通砂糖(granulated sugar)或幼砂糖(caster sugar)均可~

自製彩色砂糖除咗可以用來製作棉花糖之外，
仲可以用來裝飾曲奇或cupcakes~ 
我選擇用未經漂白既raw sugar，
因為顆粒較大，比較適合用來裝飾!

2. 將砂糖倒入一個乾淨碗內，滴入數滴食用色膏(gel)，用叉拌至勻循完全無顆粒。

3. 重覆(2)直至達到你所要求的顏色深淺度。

 

4. 焗盆內墊烘焙紙，將染好色的砂糖平均鋪在烘焙紙上。

5. 放入預熱50C的焗爐內10分鐘，烘乾砂糖水份。

6. 烘乾後的砂糖會結成塊，用湯匙輕壓會變回砂狀即成。

7. 放入乾淨的密封膠盒保存。

 

完全乾透的彩色砂糖顏色會加深!

NOTE

- Step(2)可將糖和色膏放入一個厚身三文治袋，封好後大力搖勻，來替碗 + 叉;

- 色膏用量視乎你要求顏色深淺程度，無固定份量; 

- 如果想要唔同口味，可自行加入食用香精;

- 注意砂糖一定要乾透才收好!


有彩色砂糖，可以開始整棉花糖嘞~~~

砌好棉花糖機後開動，要先預熱5分鐘後關機.......

用附設既膠匙量一匙彩色砂糖........

將糖倒喺spinner head 中間圓形空位.......

再次開動棉花糖機，
spinner head 轉動時，砂糖會彈到周圍都係......
我用splatter guard 先遮一遮，
等再聽唔到砂糖周圍彈時先攞開~

 

約10秒後就會見到糖絲出現，

用長竹籤纏成一團直至糖絲唔再出現，

用法極簡單容易~

好玩又好味! ♥

同街買到既棉花糖一模一樣呢~

染彩色砂糖可以用水劑食用色素嗎?

我認為係Yes and No!

因為用水劑食用色素，砂糖好難完全乾透，

所以要視乎彩色砂糖點用~

E.g. 如用來製作棉花糖，我認為一定要用色膏!

 

今次我染咗6隻顏色砂糖: 黃、紅、橙、綠、藍 + 紫~

做出來既棉花糖， 綠 + 紫果2枝明顯地好"奀"，

無其他顏色咁fluffy，顏色亦較淡無咁突出，

但其實我所用既砂糖份量全部都係一樣.......

分別就係 - 綠 + 紫依2個我用咗水劑食用色素!

其餘4個色我都係用色膏~

(唔係特登既...只係咁啱綠 + 紫色膏用哂......)

依2個色我烘咗好耐都唔乾，

製作棉花糖時亦只有依2個色特別難捲，

捲咗幾次先勉強成功.......

棉花糖機最忌水份，

所以用來製作棉花糖既DIY 彩色砂糖要用容易乾既色膏啊!