台灣 - 烏魚子炒飯

朋友之前送比我既烏魚子一直放喺冰格深處，
早幾日冰格搵食材時摷咗一孖出來解凍，
孤寒鬼阿V唔捨得咁奢侈就咁成塊燒來食...咁用來炒飯啦! ^^

 

烏魚子一孖2瓣真空包裝，今次炒飯一人份我只用咗1瓣~

 

1. 剪開包裝撕下1瓣烏魚子，放在淺碟，倒入紹興酒浸至烏魚子一半厚，先浸一面5分鐘，反轉另一面再浸5分鐘。

(有指應用高粱酒，但我屋企中式酒只有紹興酒 + 玫瑰露......)

2. 撕去烏魚子薄膜。

3. 將烏魚子切成小塊備用。

4. 椰菜數片洗淨瀝乾切絲; 預備蒜蓉2瓣、薑米約1湯匙和蔥花適量。

5. 燒熱油鑊，先下椰菜絲炒熟，盛起備用。

6. 鑊中再下油燒熱，下(3)烏魚子小塊炒香，隔油盛起備用。

7. 鑊中剩餘的油繼續燒熱，打入雞蛋1隻，隨即加入隔夜冷飯2碗、蒜蓉和薑米一同炒勻。

8. 加入(5)的椰菜絲和(6)的烏魚子炒勻，下適量糖和生抽調味，將飯炒至乾身，熄火後加入蔥花兜勻上碟即成。