慶祝唔正式既結婚3週年 (2009年8月1日 - 2日)

我做咗Mrs.T 就快3年嘞!

3年前既7月31日，係我 + 老公既英國婚禮 - 只擺酒仲未正式註冊，所以一直以來我地都只係當英國既婚禮，係正式婚禮前既綵排，並唔會特別慶祝!

舊年既7月31日，老公放工返來送咗大札花比我~ 不過我同老公講: 下一年唔好送花嘞!  (反正好快就到拍拖週年 + 正式結婚週年，全部日子都好接近~ 老公實送花......收花收得密，都冇咗特別意義啦! )

所以剛過去既星期五(7月31日)，我地冇慶祝，老公亦冇送花......

 不過老公訂咗位第二日星期六(8月1日)去Hilton 食自助餐!

真係好鍾意去Hilton 食buffet! 次次食物都唔同，時時有驚喜......

今次頭盆有好多魚 - 煙三文魚好正; smoked mackerel 都唔錯，但有少少太鹹; 最surprised 今次竟然有魚子醬! (咁當然唔係幾百英鎊得幾克果種俄國上等人魚子醬啦!)

當晚主菜有我至愛既燒牛肉 + 火雞~ 仲有一個超好食既焗薯蓉!

至於甜品，我一向都唔食~ 但今次有我間中會食既creme brulee，不過真係太太太甜嘞! 如果淡少少就perfect 嘞!

 不可不讚個燒牛肉!!!! 真係好食到呢........裡面係完美既粉紅色~~~~
不過我好衰格 - 我切哂外面全熟既部份出來，只食粉紅色果part!  (哈哈~~~ 切出來果d，緊係老公幫我搞掂哂啦!)

除咗出街食飯之外，第二日星期日(8月2日)，我地再來二人BBQ!

 自從早2星期同老公玩過佢第一次既港式BBQ之後，佢已經完全愛上咗!

 燒返上次一模一樣既野都唔介意! 又係雞翼、豬柳、魚蛋、大蝦.......為咗要令老公食菜，今次我特別買咗茄子! 成功咗嘞~ 老公覺得煨茄子好好食! 食咗1隻.......咁大把~~~

本來今次想試吓去新地方燒，不過因為唔識路 + 唔順路......最後都係要去返Millport!

 燒燒吓野食，突然見到有大大架潛水艇駛過!!! (我 + 老公都係第一次見真既潛水艇咋! )

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

唔正式既英國婚禮點滴...... 

 我仍然保留住我地英國擺酒時寄比賓客既請柬~

好姊妹之一Kelly 除咗送禮物 + 做足人情之外，仲特別花心思時間做咗2份禮物比我......

 當日姊妹們清一色著同款薄荷色姊妹裙 (唔同款果位係伴娘!)，Kelly 一人包辦手做咗同色既姊妹蝴蝶手花!

 佢仲特別做咗一個比我!

 我依個"新娘子特別版"，Kelly 用鐵線做咗我既英文名，真係好有心思~~~~

 另一份禮物係一個紙摺掛飾~ (我到而家仲掛住喺客廳! )

 掛飾上有我 + 老公既鐵線initial~~

雖然依2份唔係咩貴重禮物，但對我地來講好珍貴! 我地一定會好好保存好朋友依份心意~~~

斬吓眼又一年! 雖然2006年7月31日並唔係我地正式既婚禮，而且我唔多鍾意中國城既中式reception.......不過當日我除咗多咗個未註冊既好老公之外，愛我既親人、鍚我既好朋友都喺我身邊，我真係覺得自己好幸福!