二人世界求其食 - 2010年10月13日+14日 (附食譜)

10月13日 - Spaghetti Meatballs & 雞酒

本來前日星期三(10月13日)打算整煲仔飯，仲已經醃好哂滑雞......

夜晚準備煮飯時摷到雪櫃有半pack 已經開咗既洋人牛丸 - 啱啱好13號到期!

 所以最後無整到煲仔飯，整咗個快手spaghetti meatballs!

 其實pack 洋人牛丸係我上星期買來滾粥食既~

本來想整肉丸粥，但又懶唔想醃又唔想搓肉丸，見到Tesco 有現成搓好牛丸，就買pack 來試吓......

洋人牛丸彈牙程度同中式牛丸差唔多，不過係完全無味既!  只適合用來加汁整意粉，滾粥下次咪搞!!
星期三全日鬼死咁凍~~~~~~雖未至寒風刺骨，但齋坐喺度著咗2件衫都感覺到手臂涼涼......剛剛10月中已經凍成咁，今個冬天點算???

一定要未雨綢繆......

 整煲雞酒暖吓補吓身先~

雖然10月就食雞酒好似有少少誇張，不過天氣一下子凍咗咁鬼多，好易賴野冷親，補吓無壞!

舊年第一次煮雞酒係用日本清酒，有網友話我知用糯米酒效果會好好多......

 所以今次用咗糯米酒~ 我仲加埋木耳呢!

至於效果係咪真係好d......我唔知呀~  我唸可能要食多幾次先會察覺到分別!!

10月14日 - 蠔豉滑雞魚條粥; 豉油皇炒麵 & 菠蘿包

英國超市買餸真係好鬼麻煩!!!!!!

e.g. 買一盒雞上脾，起骨拆肉用來整2人份滑雞煲仔飯......雞肉一定會太多用唔哂!!

醃好既雞肉唯有分兩份 - 一份用來整煲仔飯;

 另一份用來滾粥!

記住起咗肉既雞骨唔好揼喎 - 煲粥時放埋落粥裡面一齊煲，咁煲粥就唔洗落調味料都好甜架!

星期一晚整銀芽鱔糊仲有成半包銀芽剩餘物資......

 尋日晏晝lunch - 銀芽用來整個豉油皇炒麵，麵上淋好多余均益! 炒麵配粥一流!!!

已經好鬼耐無搓過包! 尋日突然想食菠蘿包......

 坐言起行搓咗8隻!

包臭粉實在太太太臭嘞~~~~~~ 

所以早排已經比我揼鬼咗!

所以今次無落臭粉 - 其實唔用臭粉都無咩分別......

老公放工時包包剛啱出爐無耐，即時每人搞掂咗2隻!

唔知因為食咗菠蘿包定太凍無咩胃口定點????

尋晚唔係好肚餓，於是又無整到煲仔飯!

反正仲有粥 + 炒麵，求其食d算數嘞~ 咁今晚先整煲仔飯啦!!


 客家雞酒食譜click here~

 生滾滑雞粥食譜click here~

 銀芽豉油皇炒麵食譜click here~

 自製菠蘿包食譜click here~