另類牛雜之旅 - 元朗嘉麗園 (2014年6月9日)

病已好返哂...廚房大執位又攪掂哂，
不過返香港前開始既大掃除仲未攪掂，但吊頸都要抖吓氣嘛! 
趁有些少空檔update 一下香港之行先~

今次返香港還咗一個心願，
食一樣我未食過，但想食已經好幾年既野 - 牛鞭!


Mr.T 返香港前已應承捨命陪妻子!!
不過我地始終係第一次食牛鞭...未知係咩野料，
而且又要山長水遠入元朗，所以出發前都係食定個早餐先打打底......

食完早餐就搭巴士朝元朗進發~~~~~

地點: 嘉麗園潮州粉麵


閒日晏晝點零鐘爆哂棚，咁緊係要搭枱啦~
搭枱當然唔係問題...不過阿哥仔比張枱已有3位男士坐緊!
Mr.T 唔識點菜，我細細聲講咗幾次，哥仔先知道我想點"果份野"!!
老實講...如果唔係Mr.T 喺度，我可能會打退堂鼓......

我地點咗兜例牌! 上菜~~~~~~~~~
依兜野除咗牛鞭之外，仲有其他"部位"!
包括: 牛鞭、牛開心(即"牛歡喜")、牛春袋、牛子~
大家認唔認到邊舊打邊舊呢?


等我逐舊close up 比大家睇清楚......

牛鞭
口感味道似牛孖筋，不過比牛孖筋更有咬頭，但同牛孖筋一樣膠質豐富，好食啊!

牛開心 / 牛歡喜
即母牛既陰戶~ 口感似牛肉 + 豬肚，有咬頭，
我 + Mr.T 一致認為牛開心係依兜野4樣之中最好味!

牛春袋
依樣份量最少，當然啦~ 一隻公牛得一個...而且有幾大個啫......
口感味道似少少肥既牛腩，無乜特別，
如果唔知道自己食緊乜野，真係會以為係普通牛腩!

牛子
即係公牛既睪丸~ 切成片狀，咬落口感粉粉怪怪的，
Mr.T 話牛子係依兜野唯一一樣食得出係內臟......
不過無異味亦唔難食，只係唔好食囉!

食後感: 成兜食哂...感覺同普通牛雜分別不大!
總算叫做還咗個好奇既心願~
除咗牛子之外，其他3樣都好好食~~
有人話依兜野好補...唔知呀! 食完都無流鼻血........