二人世界晚餐日記 - 2012年11月14日至12月4日 (附食譜)

為食既我早排患咗胃酸過多，睇咗醫生要食一個月藥.....
加上最近開始間中接到蛋糕order，
整完蛋糕果日唔想再煮飯 (唔想成日留喺廚房度嘛!)
所以最近斷續地少咗煮飯~
雖然胃藥仲未食哂，不過我已經好返好多嘞!
11月14日: 雜素撈素麵

是日初一食齋~
今次用咗木耳、銀杏、竹笙 + 金菇乾，加素蠔油去炒，
再煮咗咋友白髮素麵....簡單好味既一餐齋!



11月16日: 格格西冷荷包粉藍雞蛋碟頭飯 & 炒抱子甘藍

11月19日: 火腿扒荷包粉藍雞蛋碟頭飯 & 炒抱子甘藍

11月20日: 雞絲炒銀針粉

雞絲炒銀針粉食譜click here~


11月23日: 西洋菜陳腎無花果排骨湯; 頭抽豬扒; 三杯鱈魚 + 蟹肉菠菜

Mr.T生日正日有點作感冒，
打算過兩日再煮返餐好當生日飯，
佢話喉嚨乾乾地，所以煲西洋菜湯潤一下~

老公放工時愛丁堡火車站有人墮軌比火車撞死咗，
攪到火車全部cancel......
我太肚餓頂唔順自己開飯先!

豬扒好明顯係Mr.T 落既order!

第一次整依個個，效果出奇地好~
今次用既急凍鱈魚扒又大塊又厚，
我整咗三塊，自己只食咗一塊，唸住Mr.T都係食一塊......
點知佢竟然同我清哂成碟魚喎!!

擺烏龍超市攞錯罐頭碎蟹肉........賣相 + 味道都無大粒蟹肉咁好!
西洋菜陳腎無花果排骨湯click here~

頭抽豬扒click here~

三杯鱈魚click here~

蟹肉菠菜click here~



11月24日: 龍蝦沙律

簡單 + 快手 + 易整 + 好味!

龍蝦沙律食譜click here~


11月28日: 素水餃豆腐卜生菜素麵

話咁快又到農曆十五又食齋!
個胃唔舒服，煮急凍素水餃就最方便~



上次試過依隻腐皮芹菜水餃......

今次試吓同一牌子既香菇青菜......依隻仲加好味!

11月29日: 札肉豆腐卜生菜油麵

清咗前一日既剩餘物資豆腐卜 + 生菜，加幾塊越南札肉，
天氣凍凍地，食完碗湯麵成身暖哂~



12月3日: 火腿生菜絲蛋炒飯

因為前排個胃唔舒服，所以最近煮飯都會食少咗飯，
不過一向煲慣2杯半米習慣咗手勢，次次都洗完米先記得......
因此幾餐下來有大量冷飯剩低!
用來整炒飯就啱哂! 唔洗唸咁多又快手攪掂~


不過可能一向大食開，突然食少咗唔多夠飽........

結果是晚夜媽媽走去批薯仔烚雞蛋切青瓜切車厘茄......
再加包野生煙三文魚.......整咗個煙三文魚沙律做宵夜!

12月4日: 札肉炒飯(午餐)

食埋依餐炒飯，終於清哂雪櫃裡面d冷飯嘞!


食咗一排藥，胃口好返不少! 要開始努力煮飯啊~~~~~

12月4日: (晚餐)紅蘿蔔五指毛桃排骨湯; 洋蔥雞翼 + 芹菜炒鵝肝腸

買咗青紅蘿蔔煲湯，攞無花果時見到99比果包五指毛桃，
順手加d落去，湯煲起來滿室芳香~~~~
今次只係用青蘿蔔代替咗原湯譜裡面既粟米，
所以唔再另寫新湯譜嘞!

唸唔到煮乜就最好煮雞翼!
見雪櫃有隻洋蔥....揼埋落去~
(不過洋蔥唔係好大隻，煮埋縮哂水唔見哂........)

天氣凍自自然然想食臘味........

青紅蘿蔔五指毛桃排骨湯(參考食譜)click here~

洋蔥雞翼(參考食譜)click  here~
芹菜炒鵝肝腸(參考食譜)click here~

上星期整咗fruit scones，Mr.T鍾意到不得了!
Mr.T似乎中咗scones 毒，
晚晚臨瞓前叫我搽2隻比佢做宵夜先安樂........

早幾日又試吓整plain scones，食譜 + 方法一樣，
只係今次無落提子乾 + 焗前無掃蛋液......

結果我同Mr.T都鍾意plain 既多d!

喺FB同朋友傾開，佢地話買唔到buttermilk~
所以我將scones 食譜加入咗buttermilk 代替品既資料，
買唔到buttermilk 都可以整到好味既scones 架!English Fruit & Buttermilk Scones 食譜click here~