二人世界聖誕鴨 - 2012年12月25日 (附食譜)

大家聖誕夜食咗乜野好野呀?
之前我已事先張揚今年唔食聖誕火雞，改為食聖誕鴨! 

第一次整洋人烤鴨，心情有d緊張.......
怕整得唔好食會破壞咗聖誕美好回憶嘛~

去廚房煮聖誕晚餐前，
我先拆Mr.T送比我既聖誕禮物為自己加吓油! 
本來有人叫我過多日先拆禮物，
因為佢漏咗幾份喺office 未齊喎........
我緊係睬佢都傻啦! 


講返聖誕晚餐.......

今年聖誕晚餐有2樣頭盆.........

今年終於都記得開依罐reindeer pate罐頭嘞! 
(幫聖誕老人拉車果d馴鹿呢~ )

但我竟然唔記得買麵包!! 

英國超市聖誕正日全日唔開門...
自己搓包又唔夠時間發酵........
正煩惱緊點算好...........

好彩喺雪櫃搵到罐早幾日買既方便croissant dough! 

同以前用過另一牌子croissant dough 一樣用法，
先攤開切開三角形......

捲好後放入焗爐........

前後十零分鐘就有新鮮熱辣香噴噴既牛角包食嘞! 

第一道頭盆: 馴鹿肉醬配牛角包

第二道頭盆: 法式酸忌廉煙三文魚煎薯餅配圓鰭魚黑魚子醬
想整Potato Rösti 好耐嘞! 真係好香脆好好食呢~ 


到主菜嘞! 主菜既主角當然係隻鴨鴨啦~ 
不過有肉又要有菜......

趁隻鴨出咗爐relax 緊，我整咗個快手懶靚炒雜菜!
有露筍、西蘭花、紅蘿蔔 + purple brussels sprouts.......
放喺一個懶靚食得既filo pastry basket 裡面~ 

今次買咗依隻紫色既brussels sprouts，不過........
味道其實同普通綠色既一模一樣! 
Filo pastry basket 非常容易整.......

一個較深既碗形焗盆，掃上一層牛油溶液;

用依種filo sheets (千層酥皮)，切成正方形;

掃上少許牛油溶液，將另一塊filo sheet 打斜叠在上面(成星形般!)
重覆以上步驟後(我叠咗3張filo sheet!)，
將filo sheet 如圖鋪入焗盆內，放入200C焗爐焗10分鐘至金黃，
待涼脫模後就有一個好靚 + 脆卜卜既pastry basket~ 

先將菜灼一灼，再用蒜蓉炒熟，用鹽 + 黑胡椒調味，
放入pastry basket 裡面，靚靚賣相啊~ 

到主角聖誕鴨出場嘞! 第一次整，效果出奇地滿意~ 

無論邊個角度睇都係咁靚! 

第一次自己整stuffing，估唔到咁容易整，
而且好食過超市現成加水果d好多喎! 

成餐聖誕晚餐，我lost count Mr.T講咗幾多句......
"唔~~~~ 真係好正呀! 好食過火雞好多!!" 
結果，兩丁友食哂一整隻鴨! 

飯後一路睇戲一路飲佛仔啤，
食蟲蟲snack - 哥倫比亞大屁股巨蟻 + 脆卜卜蠍子.....
Perfect! 


聖誕燒鴨配鼠尾草洋蔥餡食譜click here~

法式酸忌廉煙三文魚煎薯餅配圓鰭魚黑魚子醬食譜click here~