為鼠鼠下廚 - 自製倉鼠磨牙點心餅

依個...唔係人食既食譜!
有養過倉鼠既人都知道 - 倉鼠既牙齒會一直不停生長，
要通過平日咬硬物來磨蝕牙齒，避免牙齒過長~
除咗磨牙木、磨牙石之外，最常就係倉鼠磨牙點心!

Pet shop 有不同牌子款式既倉鼠磨牙點心，不過其實都係大同小異~
雖然依類點心價錢唔貴，但小數怕長計!
尤其好似我屋企有2隻以上既鼠鼠.......

自家製既好處:
- 完全無添加，無防腐，鼠鼠食得健康
- 製作簡單又快手，材料隨手可得
- 平過寵物店買既好多
- 可以為你心愛既鼠鼠落廚


1. 先預熱焗爐150C。

2. 材料: 中筋麵粉、倉鼠可吃的谷類*、提子乾、蜜糖、麥片、雞蛋
*其實一般綜合倉鼠糧都可以! 但先要揀出瓜籽、粟米片、青豆片...等大塊既糧~

3. 提子乾少許切碎。(少少就夠，唔好放太多啊!)

4. 乾材料: 碗中放入谷類6湯匙、麥片3湯匙、中筋麵粉1湯匙，和(3)切碎了的提子乾。

5. 將乾材料拌勻。

6. 下蜜糖2茶匙和蛋白半隻。

7. 將乾濕材料拌勻。

8. 將(7)放入曲奇模內，用茶匙壓實。

我依個模有埋壓實既部份，12蚊店有售!
(曲奇模只係幫你做出你想要既形狀，怕麻煩可以唔用模改用手搓成波波~)

9. 將完成造型的餅放在墊有烘焙紙的焗盆上，放入焗爐12分鐘。

10. 取出放在架上待涼。


NOTE:

- 一定要完全涼透後先好比鼠鼠食! 千其唔好心急啊!!
- 不同種類焗爐，溫度會有差別，焗既時間長短可能會唔同，焗時要留意觀察，以防未焗熟或焗燶;
- 因為無添加，無防腐，所以一次過唔好做太多;
- 已做好但未用既點心餅，用保鮮袋包好放入冰格，比鼠鼠食之前先放一放回室溫~

攤涼後既點心餅，同寵物店賣既無分別~ 只係100%無添加 + 材料價錢平得多!


我家鼠鼠反應如何?

棉花糖第一個試我手勢! 因為佢第一個瞓醒覺~
平時餵棉花糖食零食，佢會即時乖乖坐低慢慢歎，
今次比個餅佢，佢好緊張騰來騰去..........




都無人同你爭，咁緊張做乜鬼? 哈哈~~~~~~

個個都攬住唔放手，食到唔停口! 5 out of 5!!
好有滿足感! ❤ 嘻嘻~~~~