台灣有大S小S，蘇格蘭有大A小A!

大小A仲有幾日就2個月大嘞! 佢地出世後我除咗坐月 + 忙住照顧佢地之外，
屋企經常好多visitors 來探BB，所以我而家先有時間入來掃蜘蛛網 XDDDD


由入醫院生佢地到出院既過程真係一波又三折!
先講返生BB前一個月.......生BB前一個月產檢，
我 + Mr.T 睇住產檢醫生喺我地面前打電話去c section 預留6月21日開刀，
6月14日35w 最後一次產檢，midwife 仲提我20號晚過咗午夜就唔准食野飲水，
第二朝準時7am 入院，佢話20號會有人打電話比我confirm 時間~

不過20號等到4pm 醫院都無打過電話來!
Mr.T 打去醫院問，clinic 已收工，電話一個部門接去另一個部門，
等完又等...每個來接電話既人都只係道歉 + 話唔知咩事!!
於是Mr.T 親自去醫院問，終於發現...產檢醫生的確有幫我留位，
不過負責編排開刀次序果個scheduling coordinator 無加到我個名，
即係話21號無手術室比我生BB.......

Mr.T 話後來有個個樣高級d既醫生同佢講，叫我地第二日9.30am 入院...等!
長話短說，我21號準時入院，抽咗2次血 + monitor BB心跳，
再瞓醒一覺...差不多接近中午時，高級樣醫生又走同我地道歉，
是日我無得開刀! 不過佢叫我夜晚返來醫院住一晚過夜，
保證第二朝安排到我開刀，又承諾會徹查咩事，
成家人包括Mr.T 都黑哂口面，62又話要投訴又盛，但我就餓到無力嬲......

可能醫院知衰，安排咗間超大單人房比我住! LOL

就係因為咁，原本應該係雙子座既大小A，遲咗一日出世變咗巨蟹座......


開刀整過過程好快好快! 雖然半身麻醉唔痛，不過可能我太緊張，
雙手一直不停震，半途仲要聞笑氣，幸好Mr.T 一直喺旁邊拖住我手陪住我，
否則我好可能已經暈咗 =P

依個係大A (Angelica)，出世時5磅11安士重，
不過佢一出世有輕微羊水入肺，所以我只望咗佢一眼，佢就要去瞓箱仔~

依隻蕃薯仔係小A (Aurora)，出世時4磅4安士，雖然佢比大A細粒好多，
不過喊得仲大聲過大A! Mr.T 抱住小A等醫生幫我縫返個肚，
佢一直眼仔碌碌，好奇地望吓我...望吓Mr.T...又望吓個麻醉師 XDDD

縫完肚後護士比我抱住小A推我出手術室返房~

小A一直都同我 + Mr.T 同房，但大A要留喺NICU 瞓箱仔，
我第二日先勉強地有限度郁動，Mr.T 推我去睇大A......

大A喺NICU 瞓咗5日之後，終於可以返來同我地同房嘞! ^^
不過佢地始終屬於早產嬰，所以佢地兩個每日都要比護士推去NICU 檢查幾次~

我面青口唇白，因為醫生就話我開刀時流咗好多血，差少少就要輸血，
要快手用釘幫我埋傷口 + 食鐵丸補血~

開完刀即晚我又發燒又肚脹排唔到氣，醫生話我d腸郁得好慢，
唔准我食野飲水，齋吊鹽水 + 消炎藥水吊咗2日，
照完X光再照CT scan...期間不停比人抽血，
仲要插鼻喉插到流哂鼻血胃減壓......
攪完一大輪已得返半條人命，6日後仲要分2日拆釘......
就係咁我地一家人喺醫院住咗足足16日! @@

第一個星期我行動唔方便，幾乎瞓足全日床，多得Mr.T 日夜照顧小A~ ^^

住院期間見到義賣婆婆們，佢地親手織咗2套衫仔帽仔送比大小A，
我感動到差d喊出來...... =P

7月8日終於可以返屋企嘞! ^^


大小A係Non identical twins 來，2個完全唔同樣.......

大A單眼皮~

小A雙眼皮~


佢地除咗size + 樣完全唔同之外，連個性都好唔同......

大A個性較文靜，有點怕醜~

影相時佢大部份時間都係咁樣無表情呆呆直望住鏡頭! XDDD

小A個性巴渣，成個八婆仔咁 (似媽媽 LOL)

表情多多既佢經常整好多笑死人既古靈精怪樣 XDDDD


佢地瞓著覺時好似小天使咁可愛~ ❤ 有時連瞓著咗都會甜笑!

不過佢地一喊就唔係人咁品! 尤其兩個約埋一齊爆喊時.......

大A喊時陰聲細氣，一喊即時眼淚汪汪，一副楚楚可憐令人心庝既樣......

小A喊時屬發爛咋型! 一開波就撐到個口大一大得把聲，但又無乜眼淚 LOL


湊大小A雖然好忙，但佢地算係乖babies，所以忙得好開心 + 唔辛苦~ ^^
就算好攰，一見到佢地對住我甜笑，就覺得好值得.......

V媽媽之前來咗Glasgow 一個月陪我坐月，不過佢已經返咗香港嘞~

仲有幾日大小A就兩個月大嘞! Time flies.......

沒有忘記，從未忘記，不會忘記~
You will always have a special place in my heart.