開箱文: 黑鼎以外的另一選擇 - 法國De Buyer Mineral B Element 無塗層永久不沾鐵鍋 (附開鍋 + 試用過程)

最近有隻叫做"黑鼎"既台灣不沾鐵鑊好紅， 
睇完網上demo 後攪到鑊痴阿V心思思，
奈何此鑊不售海外.......
經我一輪網上明尋暗訪後， 
我發現咗一個有180多年歷史既法國鍋具牌子 - De Buyer~
(法文! 發音"Dee Bou yeh"~)

De Buyer 一樣有生產鐵鑊， 而且無論外型 + 造材 + 用法都同"黑鼎"一樣，
一樣係鐵鑊，一樣全無塗層，一樣係永久不沾!
觀乎網上用家對De Buyer 一致好評後，
急不及待叫Mr.T 即日訂一隻比我!!!


星期三晚網上訂，公司回電郵大約5個工作天會收到貨......
殊不知驚喜地星期五中午已經送貨來! 依d咪就叫做效率囉!! 讚~ ❤

一個大紙箱 + 幾呎長airbags 重重包圍隻鑊，
送貨packing 都咁認真一絲不苟，再讚! ❤

鑊包喺一個又大又厚既雞皮紙袋裡面，包裝簡約得來感覺高級classy! 愛~ ❤

法蘭西出世~

我依隻係28cm round frying pan - 重2.17kg，鍋壁厚3mm~
鐵鑊一定係重架嘞，不過依隻我仲招架得來!

99%純鐵

手柄有隻嗡嗡小蜜蜂標記~

鑊面都有一隻......

大概係因為鐵鑊表面打咗一層有機蜂蠟防氧化!

用鐵鑊煮食前先要開鑊去咗層蜂蠟......

1. 滾水落鑊滾數分鐘。

2. 將水倒去，用廚房紙抹乾，紙上深灰色就係蜂蠟!

3. 倒入約1cm 油，開火加熱5分鐘，油會釋出一陣如蠟燭的氣味!

4. 小心倒去油，以廚房紙抹乾淨。

5. 白鑊加入肥豬肉(我用肥煙肉!) + 菜屑爆一會，要捽勻鑊面每一個位置~

箭咀所指好似燶咗有d黐鑊，但其實果d係殘餘蜂蠟來!

6.  棄掉肥豬肉菜屑，以熱水 + 瓜菜布將鑊清洗乾淨 (唔需要用洗潔精!)，抹乾後用廚房紙沾少許橄欖油抹勻鑊面，咁就完成開鑊架嘞!

之前一直都係用易潔鑊，只可用膠或木鑊剷.......

用鐵鑊唔再需要顧慮塗層既問題， 

雖然鐵鑊一樣可以用木鑊剷，

不過牡丹雖好終須綠葉扶持嘛...... 

所以收到鑊既第二日，即時去買枝不鏽鋼鑊剷來襯返個新鐵鑊! 嘻嘻~~~

大家都係法國品牌，雖然Le Creuset 鑊剷來自祖國...咁都好相襯既~

鑊已開又有新鑊剷，急不及待要試吓用佢來煮野!

既然聲稱無塗層得來可以永久不沾，

咁就先試吓用來整最容易黐鑊既煎蛋啦.......

我落咗比平時用易潔鑊來煎蛋更少份量既油，

因為我想知道依隻鑊不沾程度可以有幾高......

第一個發現 - 依隻鑊熱鑊速度簡直可以用"極速"來形容!

尤其係我用緊出名慢熱既hotplate 爐頭~ 正!!

第二個發現 - 不沾不沾不沾不沾不沾不沾!!!!!!!!!!

煎完第一隻蛋無加到油，直接煎第二隻蛋，一樣不沾不沾不沾不沾不沾不沾!

煎完鑊 + 鑊剷都乾乾淨淨~

兩隻蛋都有反面煎無穿黃架!

說明話隻鑊越用得多會變越深色，越深色不沾效果就會越好~

(我第一次用不沾效果已經超好咯喎! 仲可以越來越好?)

煮食後只用熱水瓜菜布清洗油膩抹乾，

原本銀光閃閃既鑊面已添上咗啡黑色既煮食痕跡，
個樣越來越pro~ 期待佢快d成個變成黑忟忟!

用後感:

1. 我食緊果兩隻煎蛋時，已決定要買多一隻深d既Country frypan(炒鑊);

2. 我相信我買埋隻炒鑊之後，真係可以以後都唔需要再買鑊!

3. 我決定將我現有已開封/未開封既易潔鑊，全數car boot sale 賣鬼哂去! (Well...我應該會留返隻Tefal Red Spot 炒鑊以備不時之需既~)

4. 什麼鑽石鑊陶瓷鑊雲石鑊氣墊鑊...通通全部同我彈埋一邊!

De Buyer Official Website: http://debuyer.com