二人世界少餸制 - 2014年3月上旬 (附食譜)

Mr.T 阿姨似乎好欣賞我整既蛋糕.......
過去3星期佢已經託我整咗4個蛋糕~

鄧婆婆係阿姨朋友既99，已經八十多歲~
當晚阿姨回電告知，佢話婆婆雖然有病，不過佢好鍾意個蛋糕，大讚好食，
仲託阿姨一定要打電話向我道謝!
雖然我唔認識鄧婆婆，不過阿V一個小小手作蛋糕，
可以令一位老人家咁開心，係阿V既榮幸啊! 


回正題........
右手經過一輪就住就住，終於完全康復~
不過hea 咗一輪，仍然有點懶惰，晚餐都煮得好簡單，
Well~ 正好實行少餸制來配合Mr.T keep fit 計劃!

3月4日: 氣炸秋刀魚; 煎荷包蛋; 清炒菜心

自從買咗隻De Buyer 平底鐵鑊後，我愛上咗煎荷包蛋! XDDDD

印象中我來英國咁耐都無食過秋刀魚!
我唸味道最接近既應該係mackerel (鯖魚)......
最近先發現愛丁堡一間中超有韓國入口既急凍秋刀魚賣，
奀就奀咗d，不過都好好味啊~

唔好睇佢氣炸完好似乾爭爭咁既樣，
查實係我影得衰......條魚絕對皮脆肉嫩，一d都唔乾，
連最爭累骨既Mr.T 都話秋刀魚好好食!

氣炸秋刀魚食譜click here~

3月8日: 火腿扒煎蛋碟頭飯; 清炒Flower Sprouts

睇開我blog 既網友都應該知道阿V好鍾意食依個帶濃厚茶餐廳風味既碟頭飯!
久不久就要整一次~

第一次食Flower sprouts，雖然係洋人蔬菜，但用中式炒法都好適合!

3月10日: 氣炸脆皮雞翼; 清炒意大利羽衣甘藍

是晚其實懶到完全唔想煮，但又唔想出街食，叫外賣又唔知食乜好........
既然我咁鬼煩，索性整d無乜功夫既野!

曾經有人同我講過 - 佢囝囝好鍾意用KFC來配白飯!
阿V有樣學樣試過一次......果然係得喎!!

依個自家氣炸雞翼雖然唔係KFC，不過皮一樣脆卜卜，
無論空口食或當餸配飯都佳宜!

氣炸脆皮雞翼食譜click here~

3月11日: 氣炸脆皮雞翼;菜心炒魚肉大蝦

是日仍然懶到死蛇爛鱔，仍然想食住家飯，但唔想用腦唸煮乜........

前一日買咗盒雞翼只食咗一半，是日同樣方法氣炸食埋另一半~
不過前一日煮時揀哂d大隻....剩返依d細隻，叮過火咗少少........

菜心 + 魚肉大蝦都係雪櫃裡面搵到既剩餘物資~

3月12日: 蟲草花紅蘿蔔花膠螺頭煲瘦肉; 氣炸檸檬胡椒雞扒; 野蒜菜炒蛋; 蒜蓉蒸黃花魚春乾; 清炒西蘭花

連續少餸咗咁多日，突然有點為食!
反正用Airfryer 煮野減少咗好多功夫，間中一餐整返多少少餸都不妨吖~

好似好耐無煲過湯，整返碗滋補又養顏既靚湯~

香噴噴啖啖肉雞扒

野蒜菜炒蛋

早前好友Mami 阿四寄比我既黃花魚春乾，
略浸一下，淋少少油再加少少蒜蓉蒸熟.......
果份久違鹹香好送飯得來真係令人回味無窮! ❤

花膠螺頭蟲草花紅蘿蔔煲瘦肉食譜click here~

氣炸檸檬胡椒雞扒食譜click here~

3月14日: 買返來既叉燒; 煎荷包蛋; 蒸生曬靚蠔豉; 清炒菠菜苗

叉燒 - 前一日食剩一半;
靚蠔豉 - V媽媽剛寄來一大包!

睇吓我依幾隻荷包蛋煎得幾靚仔!! 
(係d蠔油淋得樣衰d啫...我個雪櫃太凍，蠔油雪到杰撻撻........)

真係不得不再讚吓自己精明既選擇買咗De Buyer!
因為我係一個用易潔鑊煎荷包蛋都會經常失手穿黃既師奶來......
但用咗De Buyer 依兩個多星期以來，
so far 我煎咗十幾隻荷包蛋，穿黃紀錄係0!! 嘻嘻~~~~

3月15日: 素蠔油炆齋; 清炒意大利羽衣甘藍

一睇全部都係素，就知是日係農曆初一或十五!

喺中超買依隻蔬菜豆腐卷試吓......

仍然唔想用腦...花菇、雲耳、髮菜、鮮蠔菇、蟹味菇、豆腐卷......
樣樣一d結果一大兜，全部用素蠔油兜幾吓炆熟佢!

再加碟用香菇粉炒既意大利羽衣甘藍，
咁又攪掂一餐齋菜~

Mr.T 雖然唔同我一齊食齋，不過佢堅持唔要我另外煮比佢食......
所以Mr.T 自己整煎蛋火腿蛋炒飯~ 
我唸我唔可以再話Mr.T 唔識煮野......
因為d蛋炒飯炒得粒粒金黃粒粒分明;
再加埋果隻靚仔煎蛋，竟然係用易潔鑊 + 木剷煎出來! 
我...係唔識用木剷來煎蛋既........ =P