尋找完美炒鑊最終點 - De Buyer Mineral B Element Country Frypan

阿V入廚十多年，閱鑊無數!
由當初唔太講究既IKEA 易潔鑊，
花完一隻又一隻，剩低大咋雞肋玻璃鑊蓋......
到後來甚麼生鐵鑊、鑽石鑊、雲石鑊、陶瓷鑊...又買落一大堆，
為既只係想尋找一隻無火煮食，可煎可炒， 
堅固耐用但唔可以太重，
我幼小手腕可以承受得起，
兼最好有鑊氣既終極好鑊~
今日我要宣佈 - 我終於搵到了!! (感動~)

用咗依隻De Buyer Mineral B 28cm 平底煎pan 唔夠一星期，
我就急不及待即時再訂多一隻炒鑊! 一用鍾情~

懷住興奮心情，小心翼翼再一次拆開果個簡約得來感覺高級既雞皮紙包裝........

眼前出現一隻手工精細重甸甸，泛著啞色銀光且有深度既鐵炒鑊......
對我來講佢唔止係一隻炒鑊咁簡單! 仲係一件藝術品~ (發神經!)


De Buyer 既鐵鑊係可以配埋鑊蓋既，不過要分開來買~
我一向認為鑊蓋依樣野 - 你話佢無用咩，唔係; 你話佢係必需咩，更加唔係!
所以我一向買鑊既宗旨 - 有蓋唔拘; 無蓋罷就!!
總之我唔會屈服另外比錢齋買個原裝鑊蓋!!!

發現雞肋以前IKEA 28cm 易潔鑊蓋都可以蓋得到，
雖然唔算100%啱位，but close enough~

仲有之前因為打錯價錢而買返來擺，完全未開封既28cm GreenPan 陶瓷鑊，
依個鑊蓋都可以喎!

反正我唔會用依個鑊來蒸野，就算有時炒野需要焗吓都只係幾分鐘，
蓋得到已經可以嘞~

即晚開鑊........

跟手就用來炒菜!

我用hotplate 爐頭只有1-6個度數代表唔同溫度~
以前用易潔鑊既日子，用最大6度先炒到菜，細過6度會出水變烚菜.......
今時唔同往日...配合De Buyer 依隻炒鑊，
我竟然用3度已經可以極有鑊氣地炒菜! 令我好感動~~~~~


2個多星期前出咗篇28cm 煎pan 開箱文，
有售De Buyer 既某店某個款式賣斷咗貨，要到4月先有新貨，
與此同時，陸續有買咗De Buyer 既扑友網友同我分享用後感，
有人同我講煎蛋煎魚甚至炒米粉都唔黐;
又有人同我炒雞翼炒菜得心應手;
但有一位扑友同我講 - 黐鑊黐得好嚴重!

嗱~ 就即係咁......
我買第一隻De Buyer 之前睇咗好多歐洲各國用家多達幾年既reviews，
真係一個話黐鑊既人...都無! 
到我自己親身去用都完全無黐鑊，我自己真係覺得好好用， 
否則我唔會咁笨實再買多隻炒鑊返來!! 

利申我同De Buyer 依個牌子 + 某店都係完全無關係，
你買唔買依隻鑊，同我係完全無關既，
你睇完我blog 去買隻返來，我根本無著數，
所以我無須吹噓依隻鑊好好用!

So 如果你買咗返來唔開鑊 / 開鑊開得唔夠...whatever 原因黐鑊，
即代表係你用既方法唔正確!
依段片可以證明依隻鑊絕對係不沾.......



P.S. 段片其實有些少地方唔正確~
開頭隻蛋落鑊時有一半蛋白仍然透明，
係因為我之前掛住set 腳架就位，擺歪咗隻鑊，所以鑊左邊未夠熱......
不過後段我可以將隻蛋喺鑊面拉來拉去都無穿黃，
大家應該可以get the idea - 隻鑊係不沾的!

尋日第一次用來煎三文魚...舊魚靚仔到~~~~

舊魚反來反去煎哂咁多面都完全不沾，
否則無可能成塊完整上碟!

未影剛煎好時魚肉微焦既靚仔樣就一時手快淋咗teriyaki sauce 上去......
我個hotplate 爐頭前所未有用中細火已經煎到魚皮脆卜卜餐廳咁既水準!
 

喺度略略都講吓用Mineral B 要注意既地方:

1. 新鑊買返來一定要徹底開鑊! 
去某店買Mineral B 會附送一張開鑊紙，
不過我可以話比大家知 - 跟張紙既方法來開鑊，我包你開得唔乾淨!
中國人開鑊方法的確係有點智慧!!
所以千其唔好貪方便怕麻煩，最好做足哂步驟後，隻鑊先好用來煮野!
(開鑊方法click here~)


2. 就算你煮野唔叻，但至少都要有些少煮食基本概念 - 不能一直用大火來煮野!
你可以用大火來熱鑊 - 熱鑊凍油或凍鑊凍油適隨尊便，
依點同沾唔沾無關係，只係個人習慣~
不過鑊夠熱後你就要識得自行調低火喉，
否則咩野油都好快燒焦出煙，再加食物落去煮就會煮燶鑊!
至於要調到幾細，依樣野無得參考，
要視乎爐頭種類、食油種類 (不同食油有不同溫度發煙點) + 煮咩野~


3. 唔好用洗潔精洗鑊~ 
去某店買鑊，店員都會提醒客人唔好用洗潔精來洗依隻鑊，
鐵鑊唔用洗潔精清洗係常識來 - 無論生鐵或熟鐵!
不過亦有網友認為接受唔到唔用洗潔精，
寧可用洗潔精洗完後再抹油來防生鏽......
當然係都要用洗潔精無人阻止你，
但只要2個方法都親身試過就會發現: 
只用熱水來清洗，比起用洗潔精洗完後再抹油更加乾淨!
洗潔精始終係化學野來，既然可以唔用，點解一定要用呢?


4. 如果你係果種廚具有少少漬少少印就緊緊張張，
要扭盡六壬"省"返乾淨立立令，要d廚具永遠保持新蔟蔟外觀既人，
咁我勸你最好唔好買依隻鑊!
因為上一篇已經講過 - Mineral B既鑊會越用越黑，越黑越不沾......

我隻炒鑊用咗一星期唔夠，炒咗幾次餸已經變成咁......

再過耐d...隻鑊仲會變成咁!

所以如果你要d煲煲撐撐歷久常新的話，
你睇住隻Mineral B 變黑一定會好痛苦......