2013年11月20日星期三

Philips AirFryer 用後感


Philips 依部AirFryer 其實已經出咗好耐,
阿V之前都心大心細咗無數次,
不過我一直覺得佢個設計實在太醜樣而卻步~
後來發現依部野原來有黑色,
我認為黑色好樣少少(but not much),
但價位一直高企初出時要over £200,
後來減咗少少都要£180
佢靚仔就話啫...佢都唔靚仔又咁貴我就唔捨得架啦!


2星期前大型連鎖電器舖Currys 減價,
Mr.T 去買tablet,
我見到依部AirFryer 減到半價 - £90~
非常吸引既價錢! 
(可能因為出咗個新款數碼版啦!)
但我仍然覺得佢好醜樣,
所以無即時扑槌,只係得個唸字......
不過第二日我喺Tesco 電器部,
竟然見到同款model 賣緊£180,
我血液中既婆仔師奶因子急升,
我感應到 - "哇~ £90好抵呀!"
即時跑過對面Currys 立返部!! 


   炸鍋喺下層拉出來........


  按制拆開兩個部份.......


 盛載食物既炸篩
 依個部份千萬唔好用洗碗果種綠色百潔布來清洗!
 表面睇來洗得好乾淨,
 但個篩乾咗後就會見到網狀部份勾滿百潔布纖維,
 要逐條逐條抆返出來!! 抆到人都忟!!!!!!!
 最好用膠刷來清洗~


   油兜盛載食物流出來既油份~


   坦白講,依部AirFryer 既結構原理,
  無我之前想像中咁高科技!
  只係一條舊式無火煮食爐頭既漩渦發熱線,
  加個抽氣扇之類既物體~
  其實似焗爐多過炸鍋!
   

但......好用嗎?
嗱~ 我無品牌商贊助送部比我試用,
無需為人家寫鱔稿誇讚部野,
我係真金白銀自己買返來,
不過我亦唔會因為自己買咗就讚到天上有地下無,
我只會講自己真正用後感~

如果問我好唔好用,我係覺得好用既!
佢最好用既地方係方便,
但操作上好多野要靠自己慢慢摸索適應~


   買返來第一次用,先來試炸薯條(新鮮薯仔切既)!
  依份炸薯條賣相乾乾的,又有少少過燶,
  因為我一滴油都無落,
  加上我跟附機送既食譜時間...好明顯焗得太耐......
  AirFryer 唔係唔洗用油既咩?
  我會話Yes and No~
  的確係可以唔用油,不過係要視乎乜野食材!
   

  第二次都係新鮮手切薯條,
 不過今次炸前我用咗少少油先撈一撈薯條,
 炸出來個樣 + 口感味道都正常得多!

  味道如何呢?
 嗱~ 如果我話味道同油炸一模一樣就呃你既啫!
 的確無用油來炸咁香口(同時唔洗咁熱氣!),
 但都可以做到薯條外脆內軟既口感~

 有已用咗AirFryer 一段時間既網友告知,
 炸急凍薯條比新鮮薯條效果更好! 
 不過我仲未試過~


   第二樣用來做實驗既係西冷扒~


   先講煮完塊扒口感如何.......
  Air Fried 西冷唔需要落油,
  大家見到我依塊西冷係air fried 到全熟,
  但肉質非常軟腍juicy,一d都唔會乾硬~
   
   不過我以後都唔會再用AirFryer 來整牛扒! 因為.......
  (1) 西冷有條肥膏,一滴油都無落但會好大油煙;
  (2) 好難控制牛扒幾成熟;
  (3) 成品完全無用grill pan 煎出來果種香味~


   喺食物櫃搵到盒台灣已調味炸雞粉......


   第三個試驗品- 炸雞槌


  雞槌只沾炸粉唔落油,   
 由於之前既西冷扒勁大油煙,
 今次再用來整肉本來都有d擔心.......
 但出乎意料之外竟然無油煙!
 叮完之後雞皮真係脆果喎~


   除咗皮脆之外,雞肉亦充滿肉汁,
  今次效果我100分滿意!


   第四個試驗品: 多春魚
  用咗部機幾次已經開始上手嘞,
  開始掌握到叮乜可以唔洗用油,
  叮乜要用少少油~
  今次多春魚沾炸粉,再淋少少油,
  效果都好理想!


  包炸粉炸咗一次雞槌兩次多春魚都仲未用哂! 
 真係抵用......
 今次用來炸雞翼,
 同雞槌一樣,做到保持肉汁 + 脆皮! 讚~


   一包雞翼一半用咗炸粉來叮,
  剩低一半今次整水牛城雞翼,
  唔洗我講睇個樣都知正啦!


Overall 我好滿意依部AirFryer,
連Mr.T 都讚不絕口~
(佢似乎比我更加滿意.....)
暫時我整過依幾樣野,
以用來整雞既效果最好!

先頭我講過"依部野似焗爐多過炸鍋",
既然係咁...如果有焗爐仲洗乜用AirFryer?
因為快!
AirFryer 預熱比焗爐快得多,
尤其我用果種可以燒成隻火雞既大焗爐就更加!
而且AirFryer 熱力比焗爐集中,
可以更快achieve 炸既effect e.g. 脆皮,
又唔會焗乾肉類水份~

雖然口感味道同真正用油炸相比稍遜,
不過較為健康,
做到炸既效果但唔需要開一鑊油,
煮時亦唔洗睇火(依點最正!) 

可能有人會話: 唓~ 又話氣炸唔洗油......
大佬~ 平時自己炸薯條最少要半鑊油,
而家只用少少油來撈吓就有炸薯條食,
仲想點呀?









30 則留言:

  1. 我舊年聖誕節係currys都係用幾十磅價錢買左,不過就唔係好掌握到落唔落油同時間,你買左就好lu,期待你多d分享食譜,咁我就可以用多d了。

    回覆刪除
    回覆
    1. 吓....我無唸住分享食譜喎.....佢本身附咗本食譜,我都係參考佢本野 + 用多d來摸索架咋~
      不過妳而家講起,我都可以開多個AirFryer 食譜分類既! ^_^

      刪除
    2. 開啦,開啦,我係你忠實fans黎嫁!

      刪除
    3. 依幾晚都有用來叮雞翼,真係好鬼正!
      等我將舊blog 文搬哂過來後,我會開個AirFryer 食譜~ ^_^

      刪除
    4. 原來你都買咗, 等你開個食譜教下我.因為我到依家都掌握得唔好,雞翼唔夠脆.剛用黎整宜家肉丸,就好好.
      我想問你係手洗定洗碗碟機洗,? 我覺得洗極都唔乾淨,好多邊邊藏污糟.
      FROM 詹詹

      刪除
    5. 啱啱先搬哂Yahoo 舊文過來 + 啱啱攪好哂d分類,遲吓開多個分類專講AirFryer 食譜~
      我屋企無洗碗機,就算有都唔會用! 以前住既地方用過...全部都洗得唔乾淨既!!
      我用膠刷 + 熱水 + 洗潔精來洗,唔難洗 + 好乾淨

      刪除
  2. 呢個野我一直都心儀....不過都排係P仔麵包機之後.......^O^

    回覆刪除
  3. 初時我都感興趣,但最後因為地方細冇地方擺作罷~另一原因係因為真係唔靘仔!妳部黑色好睇好多~

    回覆刪除
    回覆
    1. 其實......我有點後悔......太遲買! XDDDD 真係好好用~

      刪除
  4. 其實airfryer同光波爐係咪差唔多呢?

    回覆刪除
    回覆
    1. 從來無考慮過買光波爐,未用過...唔知係咪差唔多

      刪除
  5. 香港呢部機好似賣$1498呀!

    回覆刪除
  6. 讚!分析得相當客觀.不過唔知佢定光波爐好用啲呢?因為我本身已有一部光波爐.

    回覆刪除
    回覆
    1. 我未用過光波呀! 無得比較~ 光波個樣太似一隻UFO,而且個玻璃兜太重,我從來無考慮過~

      刪除
  7. 我之前都心郁郁想買翻部,因為佢真係方便同唔洗浪費油,想用佢來整咕噜肉,但係礙於佢體積並唔係細以及屋企已經有部焗爐的關係,拖下拖下就無左意慾lu

    回覆刪除
    回覆
    1. 雖然我都有焗爐,但因為焗爐太大,每次預熱最少要10分鐘,有時整少份量的話,其實都浪費能源~
      依部預熱只需3分鐘,熱力又集中,我最鍾意食雞翼,用來整雞翼啱哂! ^_^

      刪除
  8. 睇咗你個blog好耐,今次終於忍唔住要留言了!!因為我都買咗個air fryer 呀!looking forward for your recipes on the air fryer

    回覆刪除
    回覆
    1. 你好Wing!
      本來我無打算出AirFryer 食譜,不過見有網友問起,我會再開一個分類~ ^_^

      刪除
  9. 呢部由佢一出我就想買,想到而家都未買

    回覆刪除
  10. 終於找到你了,份件收到了,多謝晒 :-D

    我早前都有考慮買呢部!

    回覆刪除
    回覆
    1. 咦....妳竟然收到...係之前我地以為寄失咗果份來喎! 因為以為寄失咗,我之後買過份比妳,但我老公執野唔知收埋咗去邊,所以我都未寄.....不過妳收到就得嘞!

      咁妳有無買到?

      刪除
  11. 太好喇, 睇到你呢個review, 我掙扎緊買唔買好呀, 因為我聽到嘅comment好extreme, 一係話好用, 一係就話唔買好過買, 我都掙扎緊, 你知啦聖誕節周圍減價係入手嘅最好時機嘛^^
    不過我哋呢邊成日見到T-Fal嗰部少啲見到依部Philips, 依部Philips係咪好啲?

    回覆刪除
    回覆
    1. 我無用過Tefal 果部無得比較~ 我依邊大部份電器舖2部都有,不過我無考慮過Tefal 果部,因為我覺得外形似光波爐,圓形好阻訂

      刪除
  12. 阿v,記得我嗎?我係yahoo blog果個用心型雲藍天做icon果個cici(芝)呀!!我真係幾經辛苦至留到言,我以為有gmail account得架啦,點知打完留言無影0既???諗左好耐,至諗到可能係未開blogger or g+功能,又攪一輪,終於入到黎留比你仲可以追蹤你啦,太好了!!

    回覆刪除
    回覆
    1. 我當然記得啦! 歡迎妳來我新blog啊阿芝! ^_^
      我好似set 咗任何人都可以留言果喎.......
      等我check 吓先~

      刪除
  13. 我都好想買個 air flyer . 想請問一下 係唔係可以唔用油都煮得呢? 我個孫仔有自閉症 好鍾意食 french fries. 我怕太多油 很少讓他吃.

    回覆刪除
    回覆
    1. 視乎煮乜野啦! e.g. 煮雞翼好正,一滴油都唔洗落,整完出來卜卜脆~ 至於薯條,有扑友話最好用急凍薯條,用新鮮薯仔做薯條,就要落少少油效果會好d~
      我遲d會加個AirFryer 食譜分類!

      刪除

Related Posts Plugin for WordPress, Blogger...