民間智慧

其實已經係早排既事，
不過阿V從少一直覺得好神奇，
所以想分享一下!


早輪Mr.T 感冒晚晚咳到七彩，
雖然Mr.T 好少會病，
但一病親就大大鑊!
皆因佢係一個從來唔戒口，
就算腸胃炎到死死吓，
都話要食鵝肝炒飯或吉列豬扒既人來!! 

今次Mr.T 雖唔係腸胃炎，
不過佢一樣無戒口，
最大鑊係V媽媽寄咗2大盒金莎來，
喺咳到七彩既情況下佢又話極唔聽，
照樣日日至少4粒金莎(如果佢無咳會更過份!)
咁攪法阿V比佢傳染賴野實屬正常!
(其實10次著咗9.5次我都必定會賴野......)

初時我雖尚未中招，
但Mr.T 晚晚咁咳法，
攪到賢妻無覺好瞓......

於是我醒咗隻好多人話治咳好掂既燉橙比Mr.T.......

- 橙一個洗淨抹乾，用生果刀如圖切開一個蓋。
- 界數下橙肉 (不要界爛皮!)
- 下一茶匙海鹽於橙肉，蓋回橙皮蓋，以牙簽固定位置。
- 將橙置於碗內，碗內不需加水，隔水蒸15至20分鐘。
- 趁熱食橙肉 + 飲碗內蒸出來的水。
P.S. 據聞新咳/久咳/寒咳/熱咳皆有效~

Mr.T 好合作食到個橙乾乾淨淨，
當晚的確係咳少咗~
不過喺佢未完全好返又繼續食金莎，
第二晚又打回原形!

最慘係喺佢打回原形咳到七彩既時候，
我中招咳到九彩!
(通常我比Mr.T 傳染，病情都會比佢嚴重!!)
輪到我要食燉橙，不過我食完無料到.......

一個咳到七彩，另一個咳到九彩，
今次試吓另一個民間治咳偏方 - 一人一個蒸洋蔥湯......

- 洋蔥一個去皮貼切粗絲放碗中。
- 碗中不用加水，隔水蒸30分鐘。
- 飲碗內蒸出來的水。
P.S. 據聞對久咳特別有效~


我唸依類民間偏方效果因人 + 病情而異，
對我來講蒸洋蔥湯比燉橙有效!
不過.......
飲完蒸洋蔥湯咳雖然舒緩咗些少，
但晚晚被Mr.T 咳到無覺好瞓，
我病情惡化...鼻塞、流鼻水、咳、打乞嚏、
仲有我最最最憎既喉嚨痛全部一次過來哂!!

從未試過感冒無發燒都咁辛苦~
依個時候仲要郁吓對眼個頭就赤赤痛，
抖氣時仲感覺鼻哥窿似會噴火......
經驗話我知 - 我有燥火，要碌熱雞蛋!
拿拿淋烚隻雞蛋，塞隻銀戒指入去，
用手巾仔包住來碌碌碌去火!!

原本銀光閃閃既銀戒指.......

碌完後變成又紅又藍又黑!
依個民間智慧認為藍或黑代表體內有邪風; 紅或金代表有火~
至於咩野係邪風 + 火...我唔太清楚，
總之係身體內唔好既野來啦! 


見網上有咋科學家實牙實齒咁話:
"碌雞蛋呃人架/無效架!"
"銀器變色係因為雞蛋含有硫，唔碌都會變色架!"
"根本唔洗用銀器，總之熱敷就得架嘞!"
 
嗱~ 即係咁......
碌雞蛋既方法唔係我發明既，
我絕對無必要吹噓碌雞蛋既效果~
我呢就無咁得閒 + 咁浪費走去做實驗，
無啦啦烚隻雞蛋塞件銀器入去，
唔碌由佢放到凍，睇吓銀器有無變色......

不過我碌完雞蛋銀戒指變成黑色之外，
我鼻塞仲通咗、頭痛無咗9成、鼻亦即時唔再噴火，
舒服咗好多好多好多! 點會無效呢?

依隻係今次感冒碌第2隻雞蛋後既銀戒指，
碌出來既顏色明顯地比第1隻雞蛋淺色咗好多!

從小到大病咗碌雞蛋都會碌超過1隻，
每次碌出來銀戒指都係一隻比一隻淺色~
若果真係如科學家們所講，
只係因為蛋黃含硫先會令銀戒指變色.......
咁又點解釋"越碌越淺色"依點呢?

"唔洗用銀器，總之熱敷就可以"...我覺得唔係喎!
我好懶初時唔想烚雞蛋，
只用熱毛巾熱敷 + 叮叮豆包熱敷，
不過唔work 我先焗住去烚雞蛋來碌......

當然我都唔識解釋......
不過以我從小到大既經驗，
我深信熱雞蛋加銀器依個方法絕對係掂既!
信不信由你~

順帶一提.......
早前朋友Mami 阿四送我一個egg puncher，
依個野確係好洗好用!
先用佢喺蛋頂部刺一個小孔再烚，
烚好既雞蛋兩三下手勢就剥好殼!!
(12蚊店有售)