2013年11月28日星期四

民間智慧


其實已經係早排既事,
不過阿V從少一直覺得好神奇,
所以想分享一下!


早輪Mr.T 感冒晚晚咳到七彩,
雖然Mr.T 好少會病,
但一病親就大大鑊!
皆因佢係一個從來唔戒口,
就算腸胃炎到死死吓,
都話要食鵝肝炒飯或吉列豬扒既人來!! 

今次Mr.T 雖唔係腸胃炎,
不過佢一樣無戒口,
最大鑊係V媽媽寄咗2大盒金莎來,
喺咳到七彩既情況下佢又話極唔聽,
照樣日日至少4粒金莎(如果佢無咳會更過份!)
咁攪法阿V比佢傳染賴野實屬正常!
(其實10次著咗9.5次我都必定會賴野......)

初時我雖尚未中招,
但Mr.T 晚晚咁咳法,
攪到賢妻無覺好瞓......


於是我醒咗隻好多人話治咳好掂既燉橙比Mr.T.......

- 橙一個洗淨抹乾,用生果刀如圖切開一個蓋。
- 界數下橙肉 (不要界爛皮!)
- 下一茶匙海鹽於橙肉,蓋回橙皮蓋,以牙簽固定位置。
- 將橙置於碗內,碗內不需加水,隔水蒸15至20分鐘。
- 趁熱食橙肉 + 飲碗內蒸出來的水。
P.S. 據聞新咳/久咳/寒咳/熱咳皆有效~


Mr.T 好合作食到個橙乾乾淨淨,
當晚的確係咳少咗~
不過喺佢未完全好返又繼續食金莎,
第二晚又打回原形!

最慘係喺佢打回原形咳到七彩既時候,
我中招咳到九彩!
(通常我比Mr.T 傳染,病情都會比佢嚴重!!)
輪到我要食燉橙,不過我食完無料到.......


一個咳到七彩,另一個咳到九彩,
今次試吓另一個民間治咳偏方 - 一人一個蒸洋蔥湯......

- 洋蔥一個去皮貼切粗絲放碗中。
- 碗中不用加水,隔水蒸30分鐘。
- 飲碗內蒸出來的水。
P.S. 據聞對久咳特別有效~


我唸依類民間偏方效果因人 + 病情而異,
對我來講蒸洋蔥湯比燉橙有效!
不過.......
飲完蒸洋蔥湯咳雖然舒緩咗些少,
但晚晚被Mr.T 咳到無覺好瞓,
我病情惡化...鼻塞、流鼻水、咳、打乞嚏、
仲有我最最最憎既喉嚨痛全部一次過來哂!!

從未試過感冒無發燒都咁辛苦~
依個時候仲要郁吓對眼個頭就赤赤痛,
抖氣時仲感覺鼻哥窿似會噴火......
經驗話我知 - 我有燥火,要碌熱雞蛋!
拿拿淋烚隻雞蛋,塞隻銀戒指入去,
用手巾仔包住來碌碌碌去火!!


原本銀光閃閃既銀戒指.......


碌完後變成又紅又藍又黑!
依個民間智慧認為藍或黑代表體內有邪風; 紅或金代表有火~
至於咩野係邪風 + 火...我唔太清楚,
總之係身體內唔好既野來啦! 


見網上有咋科學家實牙實齒咁話:
"碌雞蛋呃人架/無效架!"
"銀器變色係因為雞蛋含有硫,唔碌都會變色架!"
"根本唔洗用銀器,總之熱敷就得架嘞!"
 
嗱~ 即係咁......
碌雞蛋既方法唔係我發明既,
我絕對無必要吹噓碌雞蛋既效果~
我呢就無咁得閒 + 咁浪費走去做實驗,
無啦啦烚隻雞蛋塞件銀器入去,
唔碌由佢放到凍,睇吓銀器有無變色......


不過我碌完雞蛋銀戒指變成黑色之外,
我鼻塞仲通咗、頭痛無咗9成、鼻亦即時唔再噴火,
舒服咗好多好多好多! 點會無效呢?


依隻係今次感冒碌第2隻雞蛋後既銀戒指,
碌出來既顏色明顯地比第1隻雞蛋淺色咗好多!

從小到大病咗碌雞蛋都會碌超過1隻,
每次碌出來銀戒指都係一隻比一隻淺色~
若果真係如科學家們所講,
只係因為蛋黃含硫先會令銀戒指變色.......
咁又點解釋"越碌越淺色"依點呢?

"唔洗用銀器,總之熱敷就可以"...我覺得唔係喎!
我好懶初時唔想烚雞蛋,
只用熱毛巾熱敷 + 叮叮豆包熱敷,
不過唔work 我先焗住去烚雞蛋來碌......

當然我都唔識解釋......
不過以我從小到大既經驗,
我深信熱雞蛋加銀器依個方法絕對係掂既!
信不信由你~


順帶一提.......
早前朋友Mami 阿四送我一個egg puncher,
依個野確係好洗好用!
先用佢喺蛋頂部刺一個小孔再烚,
烚好既雞蛋兩三下手勢就剥好殼!!
(12蚊店有售) 








31 則留言:

  1. 咁勁?銀介指變黑色我就見過
    紅色藍色真係第一次見,好神奇啊!
    等我下次(TOUCHWOOD)試下先!!
    係咪就咁碌個鼻??

    回覆刪除
  2. 我由細到大感冒一輪都唔好,食西藥多會好燥,依個時候就會郁吓對眼個頭赤赤痛,呼吸感覺好熱......咁我就知道要碌熱雞蛋嘞! (碌對眼 + 鼻樑~)
    除咗去燥火邪風,撞傷,經痛(當然係碌肚啦!)都可以碌雞蛋

    回覆刪除
  3. 回覆
    1. 可以瞓隔離房既,唔洗瞓廳咁慘....人地病咗仲要人瞓廳....好衰啫~ XDDD

      刪除
  4. look 雞蛋係 淨係 look 鼻嗎??

    回覆刪除
  5. 請問銀介子放係蛋入面嗎? 蛋要唔要剝殼才包布?

    回覆刪除
    回覆
    1. 當然要剥殼! 剥殼後銀戒指塞入雞蛋中間,用手巾仔包住開始碌~ 要手快,因為要趁熱

      刪除
  6. 如果感冒碌雞蛋要碌邊度?碌塊面?
    我老公都係d唔戒口既人黎。下次touchwood病我都試下碌雞蛋。

    呢d民間偏方我信架。

    回覆刪除
    回覆
    1. 呀,見到喇,碌對眼同鼻樑。
      祝你同Mr.T早日康復呀

      刪除
    2. 早排既事來架嘞! 我地好返哂好耐嘞~ 果時病緊影低相無精神寫啫!
      其實碌雞蛋睇你咩事唔舒服,碌邊度就睇你邊度唔舒服囉~
      肚痛碌肚; 經痛碌下腹; 眼痛碌眼; 頭痛碌頭.....

      刪除
  7. 小心身體啊! 您教曉我蛋除了去"魚", 原來就可以去感冒! 勁!

    回覆刪除
    回覆
    1. 其實嚴格來講我都唔知係咪可以治感冒,我意思係感冒食西藥一排好燥火,加上感冒未清好辛苦,中醫角度感冒係邪風所致,相傳碌雞蛋可以去邪風.....總之依個方法我由小親身經驗一直都好work!

      刪除
  8. Hi, 我係Miko~
    估唔到碌雞蛋原來可以治感冒,因自細屋企人淨係話我知可以去瘀咋~
    多謝妳既分享,等我又知多樣偏方~

    回覆刪除
    回覆
    1. 妳好Miko~ 嚴格來講其實應該係去風火!
      我因為感冒食咗西藥一排好燥火,感冒又未清辛苦加辛苦,中醫角度感冒係邪風所致,相傳碌雞蛋可以去邪風.....anyway 依個方法我由小親身經驗一直都好work!

      刪除
    2. haha~~ 我之前手快快打錯自已個名 (係 Moiko 先啱)
      靚女V,多謝妳咁詳細解說呀~~

      刪除
  9. 香港既天氣都又凍又熱又乾又濕咁,由踏入秋天後我都一直鼻塞中.....
    你可以搵到一個對你有效既方法,真係好...
    如果我燥火時..就會臉部既權骨好痛..飲返兩碗莞茜皮蛋魚片茶瓜湯.就即掂
    而咳同鼻塞鼻水,我真係攪佢唔掂...
    我都試過燉橙個個..超爆咁難食..(上次我老公燉比我食,落左勁多鹽..咸到苦)
    至慘係食完真係無效囉...

    回覆刪除
    回覆
    1. 依個唔係治感冒既方法,係去燥火 + 邪風既方法!
      咳可以試吓煲五指毛桃湯、龍脷葉湯或海底椰湯,依個款湯水止咳好有效~
      我食燉橙都係無效.....

      刪除
  10. 洋蔥哩招我都試過係work~~~
    喉嚨痛都可以。

    回覆刪除
    回覆
    1. 洋蔥對我來講效果一般,我唸可能因為我既喉嚨痛係燥熱所致.....

      刪除
  11. 係呢,你點將銀介指打回原形啊?

    回覆刪除
  12. 好似好神奇喎!請問如果唔用戒指(手頭上無),用其他銀器(如銀charms)唔知可唔可以呢?既然可以去火,我都想試試碌喉嚨,喉嚨好痛呀~慘!

    回覆刪除
    回覆
    1. 嗱...其實我唔肯知一般既喉嚨痛會唔會幫! 不過點解我依次會碌雞蛋呢? 因為我除咗喉嚨痛之外,最主要係我feel 到"好燥熱"(即郁吓對眼會頭痛!),所以我覺得我既喉嚨痛係虛火/燥火所致,咁就可以用依個方法嘞!
      我唔知妳所指既銀charms 係咩野銀? 據講只有"紋銀"先有用! 我一直都只係用V媽媽比我依隻紋銀戒指,不過妳都不妨一試~ ^_^

      刪除

Related Posts Plugin for WordPress, Blogger...