10週年

好多人話生咗小朋友後，就會完全無哂同老公既二人世界.......
我 + Mr.T 仲要打孖來，雖然二人世界時間變得奢侈咗，
不過特別既日子，拖仍然是要拍的! ^^

10月11日係我 + Mr.T 結婚10週年 ❤
不過當日要帶大小A打第三次預防針，打完針拿拿臨帶佢地返屋企覺豬，
所以無特別慶祝，當時Mr.T 正值休息2星期，每日都陪住我地又幫手照顧大小A ^^

今年結婚10週年其實我 + Mr.T 已經收咗一份超級大禮 - 當然就係大小A啦 ❤
不過按照傳統結婚10週年我應該要收一份有鑽石既禮物 XDDD 
又按照另一個傳統，BB出世後，爸爸應該送媽媽一隻eternity ring~ LOL

仲有一枝我第一次見既彩虹玫瑰，好得意 ^^

今年燒野食慶祝，好豐富呢~ ^^

9月9日係我 + Mr.T 拍拖17週年，當時6299仲未返香港，
可以幫我地湊住大小A，我地提早兩日去拍拖食飯慶祝~

雖然好enjoy 滿枱海鮮美食，但一路食一路好掛住大小A.......
食完飯拿拿臨去超市托尿片趕返去6299度接大小A! XDDD

Mr.T 返來時例牌送我一大札百合花 ❤
因為今年有咗大小A，佢地仲好細唔想佢地吸到花粉 (尤其我鍾意既百合勁多花粉!)
所以原本唸住叫Mr.T 今年唔好送花，不過轉過頭我就忘記咗同佢講.......=P

不過第二朝我發現...今次d百合無哂花粉既!
原來Mr.T 真係細心到又想我收到花開心，又唔想影響到大小A，
所以特別叫花店將百合花花粉搣走哂~ ^^


拍拖17年 + 結婚10年......
今年雖然多咗2位小公主，但我仍然是女皇! XDDD

Mr.T......
拍拖前，佢係最支持我最維護我既好朋友;
結婚前，佢係最寵我最包容我既好男友; 
生B前，佢係最愛鍚我最縱容我既好老公~
今日Mr.T 多咗一個身份.......

依個做咗爸爸既男人真係好可愛~ ❤
半夜或清晨佢一見我趷起身準備去換片餵奶，就會叫我繼續瞓，等佢去攪掂;
佢會上網睇育兒網，一見有BB新產品，又會做research 睇吓大小A啱唔啱用;
連媽媽最enjoy 果part - 買衫仔，佢都(想)揀埋一份 -_-
佢會做好多stupid 攪笑野，只為咗搏兩個女一笑;
佢會多謝我為佢生咗2個可愛既女兒~ ^^

間中又會傳來一句鼓勵既說話會令我好窩心~ ❤

Mr.T 兩位前世情人1號 + 2號~ 妳地要多謝妳地阿媽即係我!
因為我幫妳地搵咗個最好既爸爸!! LOL