大遲到Blog: 9月拍拖週年 + 做節

Yahoo Blog 宣佈執笠........
加上過咗一個非常忙碌 + 依樣壞果樣又壞既9月，
相就影埋咗一大咋，但就提唔起勁去update.......

9月9日星期一係我同Mr.T 拍拖14週年，
Mr.T 放工返來如往年一樣送我一大札鮮花~
唔想Mr.T 咁頻撲放咗工返來接我出去食一餐所謂慶祝週年飯~
本來打算之前一日(星期日)出街食飯慶祝，
不過再早幾日我好黑仔，用用吓電腦，
個叉電位突然出煙兼有"羅"味之後自動死機，
部電腦裡面好多未back up 既相 + 資料，
於是攞咗部電腦去retrieve information，
星期日要等修理既人打電話通知幾點攞返部電腦.........

所以拍拖週年果晚決定喺屋企煮!

Mr.T最愛既洋蔥豬扒

冬蔭青口

清炒莧菜

再加個枸杞滾豬肝湯~
無鮑魚龍蝦山珍海錯，只係平日既粗茶淡飯家常小菜，
不過我煮咗6塊豬扒，睇住Mr.T 食得津津有味，狼吞虎嚥5塊豬扒另加2大碗白飯，
依一餐我比任何fine dining 更enjoy!
(多謝你食咗我手勢14年仍然咁比面喎~ )


拍拖週年過後，我就開始忙於整月餅比家人朋友，
因為中秋正日19號星期四我食齋，
本來打算提早幾日16號星期一做節，
殊不知天有不測風雲，氣溫突然一下子急降，星期一朝早竟然只得5C! 於是我賴野發高燒了~
發燒無胃口食 + 無心機煮.........

午餐煮咗個火腿絲菜心湯麵 (蛋麵唔係公仔麵!)

晚上開始退燒，Mr.T 整咗份好好味既茄蛋治比我做晚餐~


第二日星期二，我已經完全退哂燒，
不過啱啱退燒，Mr.T叫我唔好煮飯........

於是我叫Mr.T 放工買韓國外賣返來!

Mr.T 既辣醬豬肉

我既辣醬海鮮
(啱啱好返就食辣野，我真係好有型! 哈哈~~~~~~~)

星期一已預備好部份餸菜，再留就唔新鮮會浪費!
18號迎月夜總算趕得切提早做節........

本想食雞，不過啱啱好返唔敢食，
於是Mr.T 得償所願又有豬扒食!

西芹炒雞雜

鮑魚花膠佛手瓜紅蘿蔔煲瘦肉

撈起咗煲過湯既鮑魚 + 花膠，用蠔油、糖、生抽兜兩兜，
再加少少清水炆一陣，又多一味正餸!

中秋正日我食齋，煮咗大煲素鍋燒烏冬比自己.........

Mr.T就食早一晚剩低既豬扒 + 碟菜，
依d咪叫做"同枱食飯，各自修行"囉! 嘻嘻~~~~~~


今年月餅最後一水追月先整........

依盒係V爸爸 + V媽媽既!

點解咁遲呢?
因為早一個weekend 我買咗件衫比V媽媽，
打算同月餅一齊寄比佢，點知返到屋企先發現件衫次咗!
中秋正日攞月餅比朋友時先有時間攞返件衫去換，
為免自家製無防腐劑月餅擺太耐，所以追月日先整~
(P.S. V爸爸V媽媽已收到月餅 + 衫嘞! )

剩低既餅皮手痕求其搓咗隻豬仔串Mr.T! 哇哈哈~~~~~


----------------------------------------------------

今篇唔貼食譜連結嘞! 因為就快搬blog，
我估佢地應該做唔到咁高科技改埋連結html.........
上面幾味都可以喺我blog 裡面搵到食譜架~

Yahoo Blog 變唯讀既日子慢慢逼近，
越來越多網友追問我blog 去向.........
其實我已經開咗新竇，不過暫時仲係吉既!
我預計喺依度再update 多2篇網誌，
之後就會停止存檔~
Anyway 我會喺最後一篇網誌內向大家交代去向!