2016年4月9日星期六

細數孕期小毛病

26w - 44.5", 153.4lbs

26w - 已經進入懷孕中期尾聲~ 因為醫生預計35w 左右就可以生產,
所以我既懷孕後期將會比較短,由而家開始計仲有9w...開始有點緊張啊!

過去26個星期裡面,阿V同其他大肚婆一樣,
身體受到唔同程度荷爾蒙變化影響而出現各種不適小毛病,
而阿V就似一個大肚婆人版 - 好似每種孕婦小毛病都有dd.......


懷孕初期 (1w - 12w)

阿V幸運地12w 前並無好似大部份孕婦咁嘔到七彩! (我好怕嘔架!!)
基本上都係d比較小兒科既大路野 - 每晚半夜突然餓醒、口淡、口有怪味、
無胃口、胃痛、突然反胃作嘔...之類,嚴格來講依d唔算係毛病~


更加幸運地係好多孕婦懷孕初期既便秘 + 痔瘡,阿V都無! ^^
有人話10個孕婦9個會有痔瘡,剩低1個話自己無既係講緊大話 XDD
不過我係第11個啊! 可能因為我未大肚前一向都習慣飲好多水,
而且雖然我唔好水果,但我會食好多菜~


不過2w 開始我每日最少會打4、5次乞嚏,每晚瞓覺就會開始鼻塞 + 流鼻水,
間中鼻水會夾雜住血絲,但第二朝瞓醒起身後鼻塞 + 鼻水都會消失,
上網做過research + 問過midwife...係妊娠性鼻炎~
懷孕令雌激素水平增高,引起鼻黏膜過敏反應 - 腺體分泌 + 微絲血管擴張,
大約只有30%孕婦會患上妊娠性鼻炎(咁都比阿V中咗......)
只要鼻血唔係巴巴聲流過唔停,生完BB後雌激素水平慢慢回復正常就會不藥而癒~
我而家26w,乞嚏打少咗好多,但每晚鼻塞、鼻水 + 間中鼻血仍然持續.......


9w 開始腰骨痛,晚晚臨瞓Mr.T 幫我用4、5個枕頭 + cushion 左攝右攝,
半夜去完廁所走哂位又要再攝一輪,攝完都醒鬼哂無覺好瞓,腰骨仍然痛......


最後買咗兩款唔同既孕婦側睡枕先解決到腰痛既問題!


懷孕中期 (13w - 28w)

人地話過咗12w 係懷孕蜜月期,好多12w 前有既不適症狀慢慢減退,
胃口、口腔怪味、反胃作嘔、半夜餓醒都的確係改善咗唔少,
懷孕中期頭幾星期的確係蜜月期,不過之後就開始來料.......


間中下腹會有少少似是而非類似經痛既感覺,
醫生護士話係BB越大就要撐大子宮先夠位,
如果頂唔順的話可以食paracetamol,
雖然醫生話paracetamol 對BB絶對安全......
但始終係藥,可以唔食就唔食咯~ 依個唔係大問題!


19w 個肚開始感覺好重,無論瞓低/行/坐/企...成個背脊都好痛~

要開始用托腹帶,用咗的確好好多!


20w 因為去洗手間後抹到血絲,即時去醫院驗尿、check 子宮 + 照B超,
驗尿結果係"無症狀菌尿症"...即係尿道炎既一種! 孕婦常見毛病,
成因係BB越來越大壓住媽媽膀胱,令媽媽去洗手間時去唔清而引起......
虛驚一場! 完全唔痛,知鬼係尿道炎咩? 食咗一個星期消炎藥就好返~


8w 時見咗midwife,雖然NHS 有免費孕婦supplement 供應,
但我一知道有咗123就已經自行買咗依隻孕婦綜合維他命,
產檢醫生話我可以先食哂自己買既,之後先開始食佢開比我既supplement~


21w 左右我開始食醫生開比我既supplement,主要係葉酸 + 補鐵丸~
左邊既Ferrous Fumarate 補鐵丸,一日三次,食咗都唔夠一星期副作用出現了......
肚瀉 + poo poo 變成黑色,每次肚瀉之前,個肚仲會發出好大聲好恐怖既咕咕聲!

於是22w 產檢見醫生時同佢講啦,佢suggest 我將劑量減成一日兩次,
睇吓情況有無改善...結果係無! 最後我自行減成一日一次,終於變返正常~
(事後我有同醫生講返一日食一次鐵丸架,醫生都OK 咗!)


19w 開始半夜瞓瞓吓有胃酸倒流,
問過醫生佢話可以食超市買到既胃酸成藥Gaviscon~
每次發作先食...work 係work 既,不過治標不治本,
唔夠一個月我已經食咗2枝...但胃酸倒流情況越來越嚴重!

初時每隔幾日來料一次 - 半夜4點零鐘火燒心燒到醒......
好快就變成晚晚準時4點零鐘發作; 之後再變成一日兩次(傍晚6點半 + 半夜4點);
再之後幾乎每次一食完野就來料! 越來越辛苦,我真係頂唔順嘞~~~~


25w 產檢時醫生終於開咗制酸劑比我! 一日兩次,食咗一日已經無再發作! 正~


23w 左右,我雙手手指水腫,乜野戒指都帶唔落,帶唔到戒指都事小,
最慘係10隻手指關節痛,尤其係右手無名指 + 尾指...哭~~~~
醫生話我患上腕隧道症候群(或稱腕管綜合症),又係激素作怪!!
通常出現懷孕中後期,好多孕婦生產完後就好返哂,但亦有人生完幾個月後先好返.......


今個星期產檢時,醫生通知咗醫院物理治療師,暫時每日兩隻手都要帶住依個野.......


好攪笑...個物理治療師話左右兩隻手係唔同manufacturer,
所以質料 + 顏色都唔同! XDDDD


我既懷孕中期尚未完結,小毛病已經多多,連我都開始覺得自己偉大! LOL
唔知遲d進入後期仲有咩野挑戰等住我呢?
但唔緊要~ 123而家點盡情折磨我都無所謂,只要佢地健健康康就得嘞!
(第日佢地出世後就知味道! 嘿嘿~~~~~)








20 則留言:

  1. 回覆
    1. 我想講 - 大家唔洗催我囉! 我屋企行5分鐘有個retail park,有Mothercare、TK Maxx、Tesco Extra + 24hrs Asda,我半夜痾完夜尿即興行過去買BB野都得啦

      刪除
    2. 問下姐,下次唔問囉!

      刪除
    3. 其實我咁回妳係一d惡意都無,我講笑話自己痾完夜尿去行超市都得,以為妳都會覺得好笑,如果妳咁都覺得我冒犯咗妳,咁我都講句對唔住囉

      刪除
    4. 無事無事,誤會姐,做個開心孕婦。我都希望今年可以當上第二個bb的媽。😁

      刪除
  2. 我大肚時都有carpal tunnel syndrome, 仲要都幾早期就有, 不過生完就冇事lu~

    努力! 加油! 雖然好多dd咁既病出現, 但之後都係會懷念, 所以記得enjoy every moment! ^^

    回覆刪除
    回覆
    1. 我係23w 左右先開始有,初時完全唔知點解,又肯定自己無整親,上網查吓真係關大肚事喎! 好彩帶咗果兩隻野幾日真係有幫助 ^^

      最近胎動勁咗好多! 有時一個郁開其他兩個又郁埋一份,個肚好busy XDDD 我唸我將來懷念既會係胎動多過依咋小毛病 LOL

      刪除
  3. 亞太我都進入倒數2個星期, Mrs T 妳都要加油呀!!! 最緊要係1, 2, 3健康平安.

    回覆刪除
  4. BB好快出世架喇!!! 呀V加油~~~~~

    回覆刪除
  5. 母愛真偉大,你要努力克服產前的考驗,加油呀!

    回覆刪除
    回覆
    1. 眨吓眼就進入後期,上面講過既不適全部都改善咗好多,尤其係胃酸問題,可以一覺瞓到大天光 :)

      刪除
  6. 我係生完至有Carpal Tunnel Syndrome,因為餵人奶,抱住BB對手位置唔郁,一日餵七八次,最後完全係痛到連揸叉都唔得,朝朝老公扭定毛巾俾我洗面,因為我真係扭唔到,所以你都要小心生完之後都要保養。第二胎我精啦,抱B時墊個細枕頭喺手臂下面借力,唔彎手腕去抱,只係用手臂托住BB,第二胎冇事啦。呀,仲有,得的話唔好打止痛,因為你唔覺痛的話就會不自覺用力,於是根本冇休息到,我第一胎最後係用咗10個月唔做粗重嘢至好得番。

    回覆刪除
    回覆
    1. Carpal Tunnel Syndrome 係陀BB時體內分泌各種激素增加,或者血壓升高,腎臟付擔多咗而引起水腫先出現; 妳生完之後餵人奶/抱BB果隻種係媽媽手而唔係Carpal Tunnel Syndrome

      刪除
  7. 個心成日都諗住你就快生喇喎,生左未呢?會成日開你既 blog 睇有無 update.....

    祝你既bb肥肥白白呀

    回覆刪除
    回覆
    1. 仲未呀~ 今日啱啱好31w,醫生話預計36w 開刀,仲有個零月左右啦 ^^

      刪除
    2. 咁要好好enjoy余下呢個零月既2人世界 & bb 係你肚入面既感覺囉 ^___^

      我都剛剛15w, 第一次咩都唔識,不停咁上網搵資料睇下,
      好彩暫時無咩害喜唔舒服,只係常常反胃同埋火燒喉嚨,
      不過最近唔知係咪出現你講既 「Carpal Tunnel Syndrome」, 上2個星期開始,左手手指頭關節屈埋會有d痛,呢幾日連右手手指頭都開始少少痛,但我又唔覺d手指腫左(本身全身都腫架喇..哈哈),怪怪地咁...

      刪除

Related Posts Plugin for WordPress, Blogger...