V家愛心包裹 (2016年1月6日)

無打錯日期! 係時光倒流呀!! =P
近兩三個月V媽媽幾乎平均一個月寄一次包裹來........

11月尾先寄咗一箱來........

1月頭又寄再大箱d! @@

先要特別鳴謝好友林家歐巴桑Gaile 聖誕時從台灣返港，
特登帶咗6大包埔里米粉轉交比V媽媽寄比我! ❤
(我叫V媽媽攞一包試吓 ^^)


咁今次V媽媽又寄咗d乜野比我呢?

依隻日本湯麵好似越來越多人食!

靚靚加拿大花旗參

超好味白飯魚乾

無糖精話梅王，依度細細盒都要$60......

詢阿V要求既卡夫奇妙醬! (無錯~ 英國無得賣既!)

又係詢阿V要求既高木直子新書"一個人好孝順"~
另外V媽媽朋友知道阿V鍾意油顏色，
早前去台灣旅行時買咗本台版Enchanted Forest 送比阿V........

不過其實阿V一早已買咗英版，只係一頁都仲未油過...... =P
於是早排我喺FB 整咗個抽簽，將依本英版送比抽中既FB朋友仔~
(我無理由將人地送比我果本轉送比人架嘛 ^^)

夏天返香港時喺舖頭攞咗樽蝦乾仔比d鼠鼠試吓，估唔到大受鼠鼠們歡迎!
尤其係小龍包，一食親蝦乾就發癲咁款~ 今次託V媽媽寄多2樽來! ^^

有時發現英國都幾荒謬......
e.g. 依兩樣喺香港各大小藥房一定買到既野 - 外用酒精消毒濕紙巾 + 口罩，
喺英國既藥房竟然無得賣!!! 早前Mr.T 大感冒想買個口罩用吓都無.......

V媽媽買咗件乾濕褸比我，而家蘇格蘭仲凍就緊係著唔到啦~
V媽媽買比我本來係打算春夏時可以著擋吓風擋吓雨.......
阿V一向著開細碼8號，因為大緊肚，所以V媽媽特登買咗件14號 @@
不過...當時12w 只係掹掹緊扣到鈕; 而家19w 一粒鈕都扣唔到! XDDDD

V媽媽今日whatsapp 我，佢話今日又寄咗箱野比我!
唔知今次又有乜野呢? 期待ing~~~~~ ^^


同場加映........

早幾個星期同姑仔 + 姑仔未婚夫飲茶時收到既禮物~ ^^
因為佢開心就快做姑姐，所以送札花比我! LOL