二人世界金猴年 + 情人節 (附食譜)

眨吓眼話咁快又過咗個農曆新年!
好感恩羊年有咗123，期待猴年同佢地見面~ ^^
依個金猴年係我 + Mr.T 最後一個二人世界農曆年，
所以我今年有好好把握時間蒸糕煮開年飯慶祝，
下一個農曆年雞年123出咗世，到時莫講話煮開年飯，
我唸蒸底年糕我都未必有時間.........

所以趁今年仲得閒，初二煮多一次盆菜來作開年飯! ^^

一陣再講餐開年飯.......年廿九之前，就緊係先蒸糕啦!

唔鍾意食馬蹄既我，例牌整咗大底桂花馬蹄糕比Mr.T 阿姨~

今年d新鮮馬蹄大粒好多，但批皮時仍然容易甩手飛脫! 我仍然好憎批馬蹄皮!!

晶瑩桂花馬蹄糕食譜click here~

素蘿蔔糕都係比Mr.T 阿姨既~

素蘿蔔糕食譜click here~

再來蒸咗2底勁多料臘味蘿蔔糕 + 2底糖蜜年糕送比餐館兩位老師傅~
(V媽媽話我唔准食蘿蔔糕，所以我另外只蒸咗1底年糕比自己.......)

蘿蔔糕食譜click here~

糖蜜年糕食譜click here~

蒸糕好幫手1號: BOSCH~ 話咁快就將2大碌蘿蔔刨成絲 ^^
不過年年用...但年年都唔記得個刨點安裝! =P 年年都要睇返說明書 LOL

蒸糕好幫手2號: Miele~ 雖然已經唔係第一年用佢來蒸糕，
但每次用佢來蒸糕，都忍唔住要讚吓佢! 以前要同一時間蒸4底糕，
就要大陣象一次過開哂4個爐頭，仲要動用4個大煲/大鑊......
而家一次過入哂Miele 就攪掂，實在太正嘞!!!!! ^^

老師傅們大讚我整既糕好食，仲送咗回禮比我呢! 多謝啊~ ^^


今年年廿九Glasgow 喺City Centre 有大型中國特色表演慶祝金猴年，
不過當日橫風橫雨天氣太差，Mr.T 唔比我去睇.........

雖然我依度無乜農曆年氣氛，我又無返香港過年，
不過V媽媽年年都會買年桔年花傳相比我睇，等我感染一下~
今年盆桔靚仔到暈! 又壯又多桔，過完年鹹柑桔有著落了! ^^

仲有五代同堂，V媽媽好好心機綁埋絲帶~

大束串串金 + 大盆水仙，不過V媽媽話今年年花比較遲開.......

V媽媽除咗傳年桔年花比我睇之外，仲傳來佢地餐豐富開年飯引我!!!!!!!

2個人好豐富，好鬼jealous~~~~~~ >_<

有咗BB後好容易攰，蒸糕都要整吓坐吓...今年無煮團年飯，
大年初一我例牌食齋~

南乳炆齋食譜click here~

年初二就煮餐盆滿砵滿年年有餘開年飯! ^^

今年依個盆菜我加咗6隻"金元寶" (黃金蛋餃)，好意頭嘛! ^^

蛋餃做法(參考食譜)click here~

今年盆菜裡面既餸菜同已往大同小異........

- 鮑汁炆鮑魚海參蠔豉花菇

- 南乳枝竹豆卜炆豬腩肉

- 芹菜炒砂爆魚肚

- 茄汁蝦碌

- 白切雞

- 五香燒鴨

- 炸魚蛋

- 黃金蛋餃 (蛋餃包好後先蒸5分鐘至熟，才和其他煮好餸材放入盆菜內!)

- 雞湯煮蘿蔔 + 生菜 + 西蘭花

咪以為咁大盆盆菜我地今次又要食4日先食得哂喎，
其實今次用依個盆比之前個盆淺，
我煮每道菜既份量亦有相應減少，
雖然仍然有少量多出既餸菜放唔落個盆，
不過今次食咗2.5餐就清哂所有餸菜嘞! ^^

盆菜詳細做法click here~

盆滿砵滿之外，當然要年年有餘啦! ^^
魚一定要頭一次蒸先好味，一餐就KO哂~

初二忙咗一日煮開年飯，初三Mr.T 唔比我再煮飯.......
Lunch reheat 返盆菜喺企食，然後去拍拖睇戲~ ^^

17w 胃口好返dd，不過只限日頭，夜晚胃口仍然麻麻 + 怪味連連.......
所以睇完戲後隨便食咗個簡單意粉就算~

今年情人節適逢初七人日~ 醒咗後本來想出去食早餐，
不過Mr.T 話要留喺屋企等"收件"...好彩件"件"11點零鐘就送咗來! ^^

收完件後我 + Mr.T 去咗屋企附近一間餐廳食情人節午餐~ ❤
雖然今年無古堡無fine dining，不過只要同Mr.T 一齊，簡簡單單一餐一樣好味! ^^
(尤其右下果個士多啤梨芝士餅好鬼正!!)

人日兼情人節，屋企棵發財樹啱啱好開夠8朵花喎! Lucky~ ^

祝大家有個豐盛既金猴年，身體健康，日日都開開心心! ❤