孖T拍拖16年: 由朝玩到晚 (2015年9月9日)

2星期前(9月9日)係我同Mr.T 拍拖16週年紀念，
最近一直太忙整月餅未有時間update........ =P

9月8日晚Mr.T 放工返來送我一大札花~ ❤ 
(我買就咗對Timberland 爬山boots，放喺門口迎接佢! ^^)

過咗12點正式踏入9月9日，我地唔係去覺覺豬，而係去咗賭場...飲 夜 茶!

點心賣相雖然好樣衰，不過其實幾好味.........

仲有車仔麵~ 上面辣果碗就緊係我架啦! ^^ (不過車仔麵麻麻地......)
期間撞到朋友，一路食野一路吹水，食完返到屋企已3.30am......ZZZZZ


第二朝一早起身我提議去食早餐，不過Mr.T 話佢已經另有安排.......

佢先送我一張手造卡 (個碌郁得架! LOL)

我一向唔會show Mr.T 喺卡裡面寫乜，不過今次依句實在太低能太好笑! XDDDD


然後佢叫我去換衫...仲要換一套戶外活動既衫........

我估唔到Mr.T 會帶我來依度.........

佢帶我去扮倉鼠...zorbing 滾球! @@

我地兩個喺入面，比人推我地落山........

好驚呀~~~~~~~~~~~~~~~~

滾道望落去雖然唔係太斜...不過因為阿V同Mr.T 體重差距比較大，
bulid up 速度好快!!!!!!!!!!

天旋地轉漫長既1分鐘阿V由開始一直尖叫直到個波完全停落來.......
阿V腳軟地爬出個波 LOL (個波原本喺箭咀既位置)
雖然好驚，但又好刺激好好玩! 唔怪之Mr.T 話唔食早餐啦~ XDDDD

扮完倉鼠之後，我地換個場玩第二樣 - 射箭~

我同Mr.T 都係第一次射箭........

第一次玩...有咁既水準，算唔錯嘞啩? LOL (依個係我射既!)

把弓對阿V來講真係好重(賴...)，頭兩個回合下來，Mr.T 大比數領先.......

後來阿V反敗為勝! 哈哈~~~~~~
(不過玩完之後兩日全個上半身痛咗2日...平時唔做運動既後果! =P )

Eden Leisure Village: www.edenleisurevillage.co.uk


食朝無食過野，玩完兩個體能活動，係時候醫肚!
我地去咗附近Westerwood hotel 既grill room 食咗個light lunch.......

Sous vide 後再grill 既吞拿魚扒配邊豆黑橄欖熱沙律，
吞拿魚扒新鮮肉嫩多汁，cooked to perfection!

Burger 唔洗問緊係Mr.T 架啦! 雖然阿V對burger 麻麻地，
不過依個burger 又真係幾好食~

簡簡單單但好有水準既一餐light lunch，下次要再返來食大餐!

Westerwood Hotel & Golf Resort: www.qhotels.co.uk/our-locations/the-westerwood-hotel-golf-resort


因為前一晚飲夜茶好夜瞓，食完lunch 飯氣攻心，
忍唔住返屋企瞓咗一陣......瞓醒後又夠鐘換衫去食晚飯咯~~~~~

地點係Glenskirlie Castle~ 一泊好車，我就好肯定 - 我之前來過依度!
唸咗好耐先醒起，原來好多年前我同Mr.T 來過依度參加人地結婚25週年party~
Mr.T 自己訂位都唔記得 LOL

拍拖週年當然係食燭光晚餐啦 ^^


Fine dining 多數都有entrée (餐前小點心)，依餐有2道entrée.......

先有一小杯熱湯(唔記得咩野湯 LOL) + 雞肉忌廉芝士慕絲

造型可愛如一頂蘑菇既熱辣辣小麵包配白松露橄欖油

Mr.T 既頭盆...佢話點餐湯係因為想要舊麵包搽佢地塊好香好正既牛油......

阿V既頭盆...當然係食d刁轉d既野! 
燒鴿胸配冬南瓜杏仁酒醬汁 + 分子料理苦橙珠珠~
鴿胸半熟帶血，非常好味~~~~~ ^^

Mr.T 主菜 - 豬腩肉配黑布丁醬汁
豬腩肉肥瘦相間，炆得又酥又腍，好味~

我既主菜 - 多寶魚扒配白酒濃汁
原來紅菜頭除咗用來煲湯之外，好似薯仔咁用來焗都一樣好好食!

主菜後奉送既raspberry sorbet，酸酸甜甜好refreshing ^^


阿V一向出街食飯都唔會點甜品，不過Mr.T 想食，
加上食完主菜之後，侍應逐款甜品攞過來介紹，有幾款我都有興趣........

Mr.T 既Sticky Toffee Pudding......齋睇都甜屎.......

我既Lemon Parfait Meringue Paper~ 酸微微唔太甜，好好味~

Glenskirlie House & Castle: www.glenskirliehouse.com

好彩晏晝返屋企小睡咗一陣...飲飽食醉後再去拍拖睇Tom Hardy 新戲Legend ^^

多謝Mr.T 安排節目豐富既一天! 玩得 + 食得好開心 ❤
16年話長唔長，話短唔短，肉麻說話唔再多講嘞~ 
幸福快樂並唔係靠把口得個講字，
曾經見過經常將"我好幸福"掛喺口邊對外宣揚既人，
真實既一面實在令人覺得好難堪.......

依然都係果句 - 無論比我再選擇幾多次，我仍會毫不猶豫選擇Mr.T~
來緊既17年、18年...每一年，以後都要繼續鍚我，
縱容我，縱壞我，縱到我無法無天!! 哇哈哈哈哈~~~~~