超級月亮中秋節2015 (附食譜)

今日係中秋節...由於時差關係，蘇格蘭仍然係9月27號呢~
而且而家只係傍晚，仍然未天黑，未見到中秋月亮........
(依張月亮相喺尋日迎月夜影架! ^^)

一年一次中秋節，今年如往年一樣阿V埋首整咗4輪月餅，
除咗寄返香港比V爸爸V媽媽之外，今年仲"出口"寄咗d比法國 + 德國既朋友~

寄返娘家送比V爸爸 + V媽媽...緊係用返阿V本姓啦! ;-)

今年6299都無返來過中秋，所以我只整咗月餅比Mr.T 阿姨........

依兩盒送比餐館兩位老師傅，Mr.T 話兩位老師傅收到月餅都好開心，
仲大讚我整既月餅好好味，正過香港大牌子呢! 哈哈~~~~ =P
美中不足今年Mr.T 唔得閒畫月餅盒封面........

連續幾日忙於整月餅，尋日迎月終於可以抖抖自己整返件~

廣式月餅做法click here~

由於今日中秋節正日農曆十五我食齋，所以我同Mr.T 星期五預先提早做節......

花膠鰩魚翅日月魚湯
本來係想煲螺頭既，不過早一晚掛住發花膠忘記咗浸螺頭......
於是改用日月魚啦! 一樣好好飲呢~ ^^

花膠鰩魚翅煲螺頭食譜click here~

最近超市經常見到依種只比阿V手掌大小小既春雞仔(阿V隻手好細隻 LOL)，
以前間唔中先見一兩次，兩丁友食啱啱好!

買咗一隻用來整白切雞，沾薑蔥油已經好好味~
隻雞仔咁細隻，有Miele 緊係用蒸既方法啦!

白切雞做法click here~

蠔汁鮑魚炆白露筍(羅馬生菜墊底) 參考食譜click here~

花菇蠔豉炆砂爆魚肚 (食譜後補!)

今晚中秋正日，V媽媽Whatsapp 我同我"分享"佢同V爸爸餐過節飯.......
除咗多咗碟大蝦之外，同我地餐做節飯材料都係一樣呢! XDDDD


今晚中秋節正日撞正30年以來第一次超級月亮 + 血月(月全食)同時出現!
超級月亮正解係月球同地球之間距離最近，月亮會比平時大14%，光亮度會高30%，
若錯過咗今次既超級血月，要再等18年先有一下次超級血月咯~

阿V對天文完全一竅不通! 不過為咗一睹依個難得既超級血月，
我買咗枝入門級既天文望遠鏡準備賞月! 18年後先再買枝勁野啦!! LOL

打完依篇blog 已接近7pm，雖然已入秋但個天仍然未黑，
不過今日個天幾清，希望今晚個天繼續清啦~
祝大家既超級月亮中秋節人月兩團圓，超級快樂啊! ^^