長洲平安馬卡龍

唔係Ladurée...唔係Paul Lafayet......
阿V整個童年喺長洲渡過，以前細個時只有一年一度既太平清醮，
先有機會見到依個平安字樣出現喺平安包上面~
不過近十多年，依個平安字樣已經成為咗代表長洲既標誌，
無論幾時去到長洲，都會見到大量平安紀念品.......
Cushion 公仔手機繩鎖匙扣散紙包t shirt 棉花糖...甚至係假既膠平安包(!)
喺長洲隨處可見，阿V今次返香港，就發現咗依粒......
平~ 安~~ 馬~~~ 卡~~~~ 龍~~~~~


返香港期間某日同V媽媽一齊返去長洲探V婆婆，
例牌去碼頭附近市政大樓隔離既偉記整返碗淨魚蛋........

是日無炸魚皮! 嗚嗚~~~ (右下係偉記隔離通記既鮮豬潤米線 ^^)

大排檔隔離，位於海旁街有間西餐廳叫做"自煮食材U Can Cook"，
西餐廳正正對面有間甜品店"U Can Cook Bakery & Dessert" (應該同一個老闆吧!)
甜品店門前有個大大甜品凍櫃，裡面放滿不同口味九彩馬卡龍.......

阿V從小到大都唔好甜兼輕口味，馬卡龍超重口味甜到味蕾麻木，
再加埋五顏六色似玩具多過食物，真係齋望都甜到打冷震~~~~~

喺九彩眼花繚亂當中，依粒造型精緻可愛既平安包馬卡龍相當吸睛!! @@
但...馬卡龍始終係馬卡龍! 所以本來阿V打算偷偷影張相就算，
阿V正想較腳之際，眼尾突然見到凍櫃上平安馬卡龍既簡介......
香片口味!!?!?!?!? (本來阿V懶醒睇死佢係雲呢拿味架嘛! =P )

香片口味實在好特別! 令原本對馬卡龍避之則吉既阿V買咗一粒咁大把試吓........

雖然阿V一向唔鍾意食馬卡龍，但我一直都覺得依種"含蓄"裙邊馬卡龍好高級，
加埋依個平安包造型精緻可愛，依粒平安馬卡龍單係賣相已爆燈滿分!

至於味道方面...我咬咗一啖就好好好後悔 - 後悔只買咗一粒!!!!!!!
真係香片味來喎~ 而且香片味自然一d都唔假，
出乎意料之外竟然唔太甜，微脆軟硬適中有口感但唔黐牙，
實在太好味嘞~~~~ (從來無唸過自己會用好味來形容馬卡龍.......)

翻查網上新聞，得悉依粒平安馬卡龍係今年5月長洲太平清醮時首次推出，
(阿V 7月試，都唔算太遲! =P )
$15一粒，抵食過好多法蘭西名牌馬卡窿，
繼偉記淨魚蛋 + 炸魚皮 and 甘永泰大魚蛋後，阿V強力推介長洲必食! ❤