2015年9月5日星期六

長洲平安馬卡龍

長洲平安馬卡龍

唔係Ladurée...唔係Paul Lafayet......
阿V整個童年喺長洲渡過,以前細個時只有一年一度既太平清醮,
先有機會見到依個平安字樣出現喺平安包上面~
不過近十多年,依個平安字樣已經成為咗代表長洲既標誌,
無論幾時去到長洲,都會見到大量平安紀念品.......
Cushion 公仔手機繩鎖匙扣散紙包t shirt 棉花糖...甚至係假既膠平安包(!)
喺長洲隨處可見,阿V今次返香港,就發現咗依粒......
平~ 安~~ 馬~~~ 卡~~~~ 龍~~~~~


返香港期間某日同V媽媽一齊返去長洲探V婆婆,
例牌去碼頭附近市政大樓隔離既偉記整返碗淨魚蛋........

長洲 偉記 通記
是日無炸魚皮! 嗚嗚~~~ (右下係偉記隔離通記既鮮豬潤米線 ^^)


長洲平安馬卡龍
大排檔隔離,位於海旁街有間西餐廳叫做"自煮食材U Can Cook",
西餐廳正正對面有間甜品店"U Can Cook Bakery & Dessert" (應該同一個老闆吧!)
甜品店門前有個大大甜品凍櫃,裡面放滿不同口味九彩馬卡龍.......

阿V從小到大都唔好甜兼輕口味,馬卡龍超重口味甜到味蕾麻木,
再加埋五顏六色似玩具多過食物,真係齋望都甜到打冷震~~~~~


長洲平安馬卡龍
喺九彩眼花繚亂當中,依粒造型精緻可愛既平安包馬卡龍相當吸睛!! @@
但...馬卡龍始終係馬卡龍! 所以本來阿V打算偷偷影張相就算,
阿V正想較腳之際,眼尾突然見到凍櫃上平安馬卡龍既簡介......
香片口味!!?!?!?!? (本來阿V懶醒睇死佢係雲呢拿味架嘛! =P )


長洲平安馬卡龍
香片口味實在好特別! 令原本對馬卡龍避之則吉既阿V買咗一粒咁大把試吓........


長洲平安馬卡龍
雖然阿V一向唔鍾意食馬卡龍,但我一直都覺得依種"含蓄"裙邊馬卡龍好高級,
加埋依個平安包造型精緻可愛,依粒平安馬卡龍單係賣相已爆燈滿分!

至於味道方面...我咬咗一啖就好好好後悔 - 後悔只買咗一粒!!!!!!!
真係香片味來喎~ 而且香片味自然一d都唔假,
出乎意料之外竟然唔太甜,微脆軟硬適中有口感但唔黐牙,
實在太好味嘞~~~~ (從來無唸過自己會用好味來形容馬卡龍.......)

翻查網上新聞,得悉依粒平安馬卡龍係今年5月長洲太平清醮時首次推出,
(阿V 7月試,都唔算太遲! =P )
$15一粒,抵食過好多法蘭西名牌馬卡窿,
繼偉記淨魚蛋 + 炸魚皮 and 甘永泰大魚蛋後,阿V強力推介長洲必食!








12 則留言:

  1. 睇完你嘅'食評', 都真係想快D入長洲買嚟食:)

    回覆刪除
  2. 我上次都見到啊!不過我見佢隔來果D五顏六色(勁深色)所以走左~ 早知買來試試啦!!!

    回覆刪除
    回覆
    1. 新聞話佢5月太平清醮時推出,印有平安字樣既除咗依隻香片味之外,仲有其他味道 + 顏色,不過我7月去時只得依隻香片味印咗平安,其他好唔好食我唔知道,不過依隻我真心覺得好正 :-bd

      刪除
  3. 為咗試平安馬卡龍,我決定聽日入長洲

    回覆刪除
    回覆
    1. 係咪真係入咗長洲? 試唔試到平安馬卡龍呀? :D

      刪除
    2. 入咗同試咗,真係好香香片味,謝謝您的好介紹😘 ,但因天氣太熱,還沒有勇氣去試偉記魚蛋及魚皮,下次天氣涼啲,一定會去試吓,我平時食開張記的

      刪除
    3. 其實可以入去隔離通記有冷氣,一樣可以order 偉記! 不過佢地最近成日無炸魚皮。。。。

      刪除
  4. v。。。果然無介紹錯喔!我岩岩返左來度假,10分鐘前去左can cafe度買左個jasmine味既,d茉莉味食完仲一路留係個口裡面!不過我問佢有無鐵觀音味,個師傅仔馬上露出開心既表情問:「你點知道有e個味既?」

    回覆刪除
    回覆
    1. 咦~ 妳意思係茉莉味裡面加咗鐵觀音? 定係另外有一粒係鐵觀音味??

      刪除

Related Posts Plugin for WordPress, Blogger...