單拖回香過新年 - 回英篇 (2012年2月3日)

Hello everyone~ 我返咗來嘞!
hea 足1個半月既單拖香港聖誕農曆新年之旅眨吓眼就過去，
其實我上星期六(2月4日)朝早已返咗來架嘞，
不過一返到來就發現屋企比Mr.T 反轉再反轉，
而我個地盤 - 廚房更加成為重災區!

喺香港個半月不過因為V家無wi-fi 無得update blog，
返來個多星期本來一早就想update 吓，
但一方面忙於收拾Mr.T 留低既殘局;
另一方面部netbook 突然黐咗成個星期上唔到網，
搞到我寫唔到blog!
(Mr.T weekend 由Birmingham 返來篤咗兩下就搞返掂......)
積埋大堆香港之旅既相，等我容後整理一下再同大家分享啦!

今次我搭Air France 回英係先由香港飛巴黎，

之後喺巴黎再轉機到Birmingham 會合接我機既Mr.T~

不過由香港飛巴黎依一程真係前所未有咁辛苦!

2月3日晚飛機準時11.35pm 由赤鱲角起飛，

約個零兩鐘頭後飛抵重慶昆明一帶上空時，

突然遇上超級強勁氣流，足足大半粒鐘整架飛機上上落落似過山車!!

我搭咗廿幾年飛機頭一次遇到咁勁既氣流，

當時我真係好驚好驚，

手中緊緊渣實喺天壇大佛買比老公掛喺新車既護身符，

心中希望氣流會快d停......

果大半粒鐘真係好難捱，

我甚至曾經唸過: 唔通我咁就玩完?



最後當然係有驚無險啦!

不過經歷九宵驚魂後全程機無覺好瞓，

精神 + 肉體幾乎散哂......

之後一程飛抵Birmingham 後，好想快d見到Mr.T~

不過......

今次我第一次由Birmingham 機場入英國境，

順利過咗passport control 後，

喺行李帶旁等緊攞返寄倉行李時先知......

行李推車竟然要比錢!
(平時由Glasgow 入境推車係免費架嘛!!)

行李帶旁邊有幾部機，要入一個1英鎊或一個2歐羅先可以攞到架車，

當然你唔一定要比錢用手推車既，

反正攞完行李後行出去接機處1分鐘路程都唔知有無......


不過今次我有兩個塞到滿哂既寄倉大喼 - 每個重23.9kg;

另有一件10kg 手提行李 + 塞到爆大手袋一個......

全部加埋足足超過60kg!

以我弱質纖纖既體型無可能搞得掂囉，唯有焗住比錢!!



但當時我身上只有£30 - 一張£20紙 + 一張£10紙，

其餘全部係港紙......

部機只可入銀仔或以信用卡付款，

不過我張信用卡又啱啱1月過咗期...唉~~~~~

唯有攞住張£10紙硬住頭皮問一位先生唱錢，

點知依位先生爽快地比咗個1鎊銀過我，

我: 我老公喺出面等緊我，我一陣叫佢比返錢你吖!

先生: 唔洗嘞~ 妳攞去啦!

(我非常咁唔好意思......)

我: 咁不如你收咗我張£10紙?

先生: It's OK! have a nice day~

其實若調返轉頭我都會好似依位先生咁做，

不過三唔識七，人地唔係老奉要幫妳架嘛，

所以我真係好感激依位萍水相逢既先生咁慷慨大方~



一落機就遇到好人好事，出到接機處見到Mr.T，

九宵驚魂所帶來既不愉快一掃而空!


雖然之後由Birmingham 渣車返Glasgow 沿途天氣一路變差，

時而大風時而大雪......



間中仲會落大雨......但都無損我既靚靚心情!

晏晝返到Glasgow 仲正 - 無風無雪又無雨!! 呵呵~~~~



好彩我今次飛巴黎咋，

因為上星期六英國天氣剛剛開始變差，飛倫敦既航班全部取消哂!!

如果我搭其他飛倫敦既airline，可能會受影響呢~



返來已經個多星期，頭幾日因為有時差好鬼辛苦!!!!!

而家已經大致回復正常嘞~

而且返到來竟然無我想像中咁凍，所以完全唔難適應，

不過有兩大喼行李 + 大咋污糟衫等住我招呼.........