單拖回香過新年 - 禮物Part 2 老友鬼鬼篇 plus 朋友II (特長!)

禮物Part 1 講過今次返香港收禮物收到手軟 + 56kg 行李都仍然過磅!
上一回曬冷蕃蜜梨送我既禮物;
今回就講吓我收到朋友們既禮物......
(P.S. 排名以日期分先後!)

我牛一前一晚(12月28日)相約艾莉、Mami 阿四 + 卡通精晚飯，
地點係始創中心既紅洋蔥.......


由於掛住食又掛住傾，依張係當晚唯一影過既相......

光陰似箭，話咁快認識咗佢地3個已經最少4個年頭!

世事有時真係奇妙到令人O哂咀......
當初我從BK 分別認識咗艾莉 + 阿四，但佢地就互不相識，
後來我開咗La Cuisine De Veronica 依個blog，
艾莉一直有寫開Yahoo Blog，而阿四亦喺依個時候開始寫blog，
順理成章我同佢地兩個都成為咗blog 友~

直至大約2年多前阿四從香港為我寄來一份禮物，
艾莉想知道禮物當中既湯塊邊度有得賣，於是喺我網誌內留言，
我見艾莉 + 阿四都有玩開BK，於是叫艾莉自己問阿四，
阿四見到留言就喺我網誌內回應回答艾莉既問題，
我頂佢地唔順叫佢地是但一個去對方既blog 留言......
就係咁艾莉 + 阿四成為咗朋友!

不過奇妙到令人O咀既係...

約大半年前因為一張FB既舊相先意外地發現......

原來艾莉係阿四老公既舊同事!! 

 其實舊年(2010)我返香港時，我地3個都有約出來食野~ (網誌)

當時仍然未知道依件事! 世界真係細到令人O咀!!


當晚收到艾莉 + 阿四送比我既禮物......


艾莉一向係手作皇后來~
佢送我既2份cute cute 禮物都係自己親手造既......
可愛馬賽克啤梨日曆

手縫不織布聖誕掛飾相架
(由於我收到時聖誕已過，要留返出年先有得用啊!)


阿四送我既禮物樣樣都有d......
Coach 小包包


Le Creuset plastic pin

要研究咗一陣先知道原來係咁用既! 


一大堆扮靚靚

鬼馬馬桶膠杯 (阿四吩咐指定要用來食古古力雪糕! )

簡單易明攝影技巧書一本
仲有一件意大利針織外套(見大圖)，不過V媽媽寄漏咗比我......



同艾莉、阿四 + 卡通精食完飯後當晚返到屋企， 
一位auntie 打電話比V媽媽，

依位auntie 知道我返咗香港，於是送咗4張$680 郭富城演唱會門票比我地! 
(仲可以任揀日子呢~ )



攝影達人老友Carly 送我一條靚靚Agnès b. 相機帶~
(之前將相放上FB，竟然有人以為係underwear......)



Anne 送比我既花膠、Le Creuset Snowflake、日清薄力粉 + 馬油潤手霜
今次第一次同Anne 見面~
Anne 比我既感覺好友善好真誠，好親切又溫文爾雅，
(同吱吱喳喳既我有好強烈既對比......)
不過我地大家都一見如故 (我覺得! )


Anne~ 好高興認識妳 + 終於有機會見面成為朋友!
好多謝妳既禮物 + 感謝妳既關心~



Andrea 深知我鍾意姣姣既桃紅色~ 
特別送我一份"桃紅禮物"! 

(其實仲有一大罐恒香蛋卷! 不過我去街後去咗V媽媽舖頭，未來得切影相已喺舖頭同眾人分甘同味食鬼哂......)

塊桃紅膠墊用來墊我個微波爐超級good fit!
真係度身訂造都無咁啱size!!
從blog 認識咗Andrea 已經好耐，
我想大概我開La Cuisine De Veronica 初期已開始交流，
去年返香港時曾經相約見面，不過後來Andrea 病咗緣慳一面......
今次終於可以見面真係好開心!



Clara 送我既台灣話梅粉 + 綠油精
Clara 絕對係一個廿四孝媽咪!
仲係一個好搞笑既廿四孝媽咪......
因為佢成日話希望佢仔仔將來搵到一個好似我咁"好"既新抱! 

從BK 認識妳到blog 都應該有3年多時間，
好開心今次可以同妳見面，妳真係好似鄧萃雯呢~ 



潮媽Rita 特地託喺美國讀書既仔仔從美國買返來送我既焗盆 + baking 書

Whoopie Pie...第一次聽! 等我慢慢研究吓就試做~


Rita 妳實在太客氣嘞~
好開心可以同妳見面!
可惜大家都忙就唔啱時間，今次無機會詳談，
我下次返來時一定要約出來傾餐飽! 要等我啊~~~


---------------------------------------------
真係好多謝大家送我既禮物!
每一份我都好鍾意，每一份我都會好好珍惜~ 

同時想向本來有打算約出來見面但最終安排唔到既朋友 + blog 友致歉!
希望下一次我返香港時，時間上可以安排得更好可以同大家見面~

最後想特別鳴謝阿四 + Anne 送出佔據咗我寄倉行李足足4kg 既日清低筋麵粉! 
我深深感受到原來大家真係有詳閱我既網誌，
知道英國嚴重缺乏低筋粉......
好感動架!! 



----------------------------------------------------

朋友II

去年8月我曾經寫過一篇不設回應關於朋友既網誌，
文中提及我當時親手結束咗一段十多年既友誼，
12月頭我返香港前，
收到依個令我主動絕交既人寄來既聖誕咭，
我有感動有心軟嗎? 一d都無!
聖誕咭完全無進入過我屋企客廳範圍，
只直接進入咗我裝 回收廢紙既布袋裡面!!
硬頸既我決定同一個人斷絕來往，
一定經過深思熟慮，絕非一時衝動，
而我決定咗既就唔會返轉頭!
無論曾經點深愛過(當然係exes 啦!)
點friend 過、點交過心......由我決定斷絕來往果一刻開始，
對方對我來講已經成為一個陌路人!

記得小學時做小女童軍，
學過一首關於朋友 + 只有短短幾句歌詞既兒歌......
Make new friends
But keep the old
One is silver but the other gold
當中所指既金係老朋友; 而銀就係新認識既朋友~
不過我發現有時妳當別人係金係銀，
人家都好可能只會當妳係爛銅爛鐵!

十多年前我初來英時，曾經寄過一封信返香港，
我記得信裡面我同對方講既最後一句說話係......
"我認為妳根本唔需要我依個朋友"，
不過之後我同依位收信人仍然維持住朋友關係;
幾年後依位收信人以朋友既面口同我講......
(佢)覺得我當年來英讀書時態度囂張;
5年前我結婚前夕，佢又突然好感性地喊住同我講......
"認識我咁耐以來，我都係要乜有乜又有機會出國留學，
佢羨慕過我亦妒忌過我!
今日見到我嫁到一個好老公，好戥我開心"..............喎~~~

回想起同依個人依2段對話，我只係好想同佢講.......
我從來唔認為一個人離鄉別井到一個陌生國度生活係一件值得趾高氣揚既事!
若妳真係當我係妳朋友，妳根本唔應該咁去睇我!
話說回頭 - 妳既然會得羨慕我妒忌我，
我相信無論我當時是否真係態度囂張 ，
我喺妳既心目中點都一定係不可一世架啦，對嗎?

今次返香港依個人想約我食飯......
好坦白，我今次返香港遇上2個時間相隔好短既大節，
我喺安排屋企人 + 我社交生活時間真係好緊!
有好多我返港前已預定既節目、已約定見面既人最終都要除消，
就算最後落實約定咗，日期時間亦可能要一改再改......
明白既朋友，甚至Blog 友都相當體諒 + 遷就 (感謝~)
唯獨依個我認識咗20年既人，
向我擺出一副日理萬機女強人姿態，
好似佢百忙之中都肯抽空賞面想同我食飯，
我應該要感到三生有幸........(究竟係邊個態度囂張呢?)
電話裡面聽到對方不耐煩既語氣，
態度之差曾經令我好有衝動想cut 佢線!
不過我唔係會為咗"約食飯"咁小事就同人家絕交既人!!

我十多歲時已認識依個人，依個人少女時代既行為，
可以話係我認識所有人之中，最"爆"一定非佢莫屬!
你噏得出既佢都幾乎做過哂......
後來有人經過一番努力認為自己今日事業有成，
大概想完全擺脫自己既過去;
又或者最主要唔想比佢果位全家都信教，
拍拖只一年就結婚既另一半知道佢既年少輕狂~
我去年返港時佢剛新婚，只要有佢出席既飯局，
席間佢都會大肆吹噓自己既賺人熱淚奮鬥史!
令人覺得佢真係一個年青人既好榜樣好典範!!
恍惚席間所欠缺既只係一個頒比佢既"傑出青年獎"......

若要人不知，除非己莫為!每個人都有過去，
唔想另一半知道自己既過去其實無可厚非，
(若我有一個似妳既過去，我都唔會想比任何人知道!)
但無人叫妳一定要自我篤爆話比對方知!
我真係千萬無唸過當我唔喺香港既時候，
我依位so-called 朋友，會喺其他朋友面前，
甚至佢果位我完全唔熟既老公面前，
一邊自我扮演純情玉女，
一邊講一d關於我但不盡不實既壞話!

妳喺妳另一半前演戲扮純情上進有為好女人，依d完全係妳既事!
I don't give a fxxk!
其實妳係怕妳既另一半知道妳既過去會嫌棄妳嗎?
如果妳有咁既唸法，我真係覺得妳好可憐!
妳過去所做過既，天知地知，而我亦記得一清二楚!!
但妳絕對可以放心，
因為妳連妳割雙眼皮前既舊照都唔比我地貼上FB，
我就已經清楚明白妳有幾唔想別人知道妳既過去!
而我相信妳果位眼睛生喺額頭上既老公，
根本就無放過我 + Andy兩公婆在眼內，
完全無興趣同我地交朋友~
(我想係因為我地長居英國，對你地無利用價值吧!)
所以就算我知道我記得以前既妳做過所有事，
妳既另一半係絕對唔會從我口中得知半點有關妳過去既野!
因此妳無需要預留一個歹角比我依個二打六去陪妳演戲!!

朋友不值妳所為將事話我知~
雖然多年來妳所作所為我有好多不認同，
但真係無想過妳會如此不堪!
妳喺我心目中一向都係個好會耍手段既醒目女，
理應唔需要做到咁低莊，踩低身邊朋友來抬高自己呢!

記得去年我返港回英前一日，
妳不停追問當時懵盛盛既我手術日期，
妳話我做手術當日會為我祈禱......
Well~ with friends like you，
我想最好還是自求多福吧!

--------------------------------------------------------

我係一個直腸直肚既人~ 同我做朋友非常簡單，
完全唔需要送我禮物，唔需要讚我靚讚我fit，
唔需要讚我叻讚我好........
我對朋友只有一個要求 - 就係真誠!

好多人認為網絡虛擬世界唔會認識到可以真正交心朋友~
我反而認為網絡世界將一大撮來自不同地方，
有不同背景，但興趣相投既人既距離拉近咗!
我真正感到自己好幸運，
因為我從網絡世界所認識既朋友們身上感受到依份真誠!

曾經收到一位朋友傳來既網上文章，
文章比喻每個人既人生就好似搭一程長途列車，
自己搭緊既列車中途停站，會有其他搭客上車落車，
有d人上咗車可能只搭幾個站就落車;
有d人就會同你一齊搭到終站......

2011年短短幾個月內，
我親自伸腳踢咗2個長途客落車!
我希望我架列車上既所有搭客，
無論你 / 妳之前已一直陪我搭緊車或只係剛上車，
都可以陪我一齊搭到終站!