早來的復活節快樂! (附食譜做法)

我知道係早咗成個禮拜，
不過我下星期可能無時間整蛋糕，
就算有時間整，整完未必有時間準時出post......
不過我又好想整依個蛋糕喎!
咁不如早d整啦~
早一星期咪一星期囉，
而且Mr.T 今個weekend 返來又有得食，
早，永遠都好過遲!

因為我唔鍾意食朱古力，
所以唔鍾意食傳統復活蛋~
過去2年復活節我分別整咗茶葉蛋 + 茶燻蛋來應節，
不過Mr.T 話太血腥!
今年唔整蛋，改整溫馨feel 蛋糕啦~ ♥

整依隻蛋糕好快搞掂，
因為佢好鬼細隻，非常迷你......


咁細隻我今次唔玩唧花嘞，唔洗唧花自然快手好多啦!

其實依個迷你復活節蛋糕同我平時做既忌廉蛋糕做法一樣，
不過因為蛋糕模細材料份量少咗，
為方便自己 + 方便大家，
依篇記一記低材料減少後既份量，
以後唔洗次次整都要計過哂比例嘛!

1. 用11cm 蛋糕模做一個迷你海綿蛋糕 (分蛋法): 
A. 預熱焗爐180C; 蛋糕模用牛油紙墊底。
B. 蛋白和蛋黃各1.5隻分開。C. 蛋黃加入幼砂糖5g打至發白變稠。
D. 蛋白置大碗內，加入鹽0.5g和塔塔粉少許打先至啤酒泡狀，加入幼砂糖25g打至乾性發泡。
E. 將(D)分3次加入(C)中用膠刮拌勻。F. 低筋麵粉25g分3次篩入，每次篩入後用膠刮輕手拌至完全無粉粒，再下其餘麵粉。G. 小碗內牛奶和菜油各8g，雲呢拿精油數滴一同拌勻。H. 將一小匙(F)麵糊加入(G)內略略拌勻。
I. 再將(H)倒回(F)中用膠刮完全拌勻。
J. 將混合物倒入蛋糕模內，輕輕左右搖勻。
K. 放入焗爐中層烤10至15分鐘，測試蛋糕熟後取出倒扣在蛋糕架上待涼。



2. 蛋糕涼後打橫切半，忌廉打起，塗抹在兩層蛋糕中間 + 蛋糕表面。



3. 隨意裝飾蛋糕。

介紹一下今次用來裝飾既材料 + 用具......

Model們 + 0靚模們~


好開心今年平價買到彩色復活雞仔! ♥
(依盒其實有8隻雞仔，空咗果2隻係黃色，開工去~~~~~)
舊年喺John Lewis 第一次見類似既粉紅、粉藍 + 粉綠復活雞仔，
不過價錢貴到嚇死V!
唔記得幾錢，只記得貴到我買唔落手!!
雖然依盒無粉綠色，不過價錢平補返數啦!
不過最後完成品無用到粉紅 + 粉藍雞仔，
因為效果麻麻地...留返出年啦!



返到屋企先搵到舊年買咗大盒復活雞仔!
不過唔緊要，反正依班model 年年復活節都會出場，
而且佢地經常發生工業意外(人為既!)，報銷率相當高......

好似依位仁兄咁，因為我一時手軟令佢誤墮sink 盆......
多d咪當後備囉!


復活節有雞，當然仲要有蛋......

買材料時只大約構思咗點裝飾個蛋糕，
左派果包Smarties 睇唔到裡面d蛋咩樣，索性2包買哂!

不過拆開包Smarties，發現佢地唔多似蛋......
最後決定採用右邊果包~

今次蛋糕細，所以選用細細粒但顏色鮮艷如紅寶石既redcurrant，
(紅加侖子 / 紅漿果)

塗抹忌廉後周圍貼上三色捲捲朱古力碎;
蛋糕面先用redcurrant 圍邊，裡邊再鋪上杏仁片，
再放上彩色朱古力蛋 + 雞仔......
基本上蛋糕已經完成咗!

不過我姿整要加埋個message 糖牌!
本來想整朱古力牌，不過咁細個牌用朱古力比較難寫字，
於是改用fondant 來整~

又出動我套餅乾印字組，真係好洗好用!

再用"金色三寶"來裝飾吓個糖牌!

先用食用金色色素筆將字上色;



再貼上金色米紙星星;



最後灑上金色食用金粉...搞掂!
(糖牌最好預早先做，等佢有時間風乾變硬~)

Ta-Da~
Happy Easter everyone!