印度 - V記正宗印度咖喱羊肉配茴香籽薑黃飯

來咗英國十幾年，
梗有一間喺左近既印度咖喱從來都唔係我杯茶! 
我唔係唔鍾意咖喱，但又唔會話係鍾意果隻，
不過間唔中條咖喱筋會突然戚起......

咖喱係一樣好奇怪既食物，
突然想食咖喱既時候，係一定要食咖喱先止到條癮! 
其他野無可代替!!

我就緊係唔係印度人啦......
我之所以話叫做"正宗印度咖喱" ，
係因為我唔用超市現成咖喱汁!

自己煮咖喱from scratch  難唔難 / 麻唔麻煩呢?
一d都唔難; 亦唔麻煩......

只係材料大陣象d囉!! 

超市現成樽裝咖喱汁固然好方便，
不過當我想食咖喱既時候，
完全唔入流既超市現成咖喱汁味道根本無辦法滿足到我!
食咖喱就要食印度餐廳既正宗口味!! 


雖然喺英國出街食印度咖喱，
或叫印度咖喱外賣好方便亦唔貴，
不過喜歡煮野食既人，
可以煮出一個用料正宗，十足十餐廳味道......
甚至比餐廳煮得更好味既正宗印度咖喱，
味蕾上既滿足感 + 心理上既成功感，
可謂係雙重享受呢! 


先同大家介紹一下做正宗印度咖喱既材料 + 香料......

印度人煮食用既酥油(Ghee)~
係去除咗水份 + 雜質既精煉牛油，
常溫下會凝固，由於無水份，唔需要冷藏都可以保存一段時間~
P.S. 千其唔好同做酥皮既起酥油(shortening)混淆喎! 兩樣野來架!!

一大咋香料.......


經過我網上大輪research + 諮詢過印巴籍朋友後，
得出以下結論......

由左起......

- Cinnamon 玉桂 (原條或粉狀佳可!);

- Ground Cumin 小茴香粉;

- Ground Coriander 芫荽籽粉;

- Ground Turmeric 薑黃粉;

- Garam Masala 印度綜合香料;

依咋可以話係煮正宗口味印度咖喱最基本必備既香料~ 

由左起......

- Bay Leaves 香葉;

- Cayenne 紅辣粉;

- Cardamom Pods 小荳蔻;

- Ground Fenugreek 葫蘆巴籽粉;

依咋香料比較屬於"增加風味"既作用~
我research 參考咗大量印度咖喱食譜，
發現用依咋香料來做咖喱佔既比例較少!
(當然都要顧及咖喱有好多唔同種類，用既香料組合亦唔同~)

咁係咪即係可有可無呢?
我又覺得唔係喎!
一係就索性唔好整，要整又要正宗就梗係最好有埋啦!! 

新鮮材料: 薑、蒜頭、洋蔥、芫荽、青辣椒仔 + 檸檬(或青檸)



正宗印度咖喱羊肉


1. 羊腿肉約300g，洗淨切成每塊約3cm 的大丁備用。


2. 中洋蔥1個切碎丁; 青辣椒2隻切片備用。 

3. 薑和蒜頭各30g; 小荳蔻2粒、玉桂枝約3cm和香葉2片，用chopper 打成蓉備用。

4. 鑊下ghee 大火燒熱，加入羊肉丁煎至表面微焦鎖住肉汁。
P.S. 煎羊肉丁時，每塊肉要盡量分開不要重叠，否則會產生"蒸"既效果出水，做唔到微焦鎖肉汁依點! 如果肉份量較多，可分開數次來煎~  


5. 炆鍋中加入以中火ghee 燒溶，下(3)慢慢炒香及變微黃(小心炒燶啊!)

6. 加入洋蔥丁炒軟; 加入羊肉丁兜勻。


7. 莞荽籽粉2茶匙、薑黃粉和紅椒粉各1.5茶匙、小茴香籽粉、Garam Masala 和葫蘆巴籽粉各1茶匙加入鍋中，和羊肉一同炒勻至釋出香味。


8. 加入清水200ml、罐頭蕃茄1/2罐(壓爛)、青辣椒碎、羊肉精1塊(可用雞精代替)和紅糖2湯匙，拌勻以大火煮滾。

9. 蓋上鍋蓋轉小火炆煮1小時至羊肉軟腍 。(炆煮時間中要攪拌沉底的材料，小心煮燶!)


10. 咖喱煮好後試味，加入原味乳酪(yogurt)80g拌勻上碟。

11. 灑上新鮮切碎芫荽和少許檸檬汁即成。



茴香籽薑黃飯 (Basmati Rice with Turmeric and Toasted Fennel Seeds) 

Basmati Rice (印度香米)、Fennel Seeds (茴香籽)、薑黃粉和Pilau Rice 香料


 

依樽pliau rice 香料既成份已經包括咗大部份上面做咖喱既香料:
紅甜椒、決明子、小荳蔻、薑黃、丁香、香葉、茴香籽、鹽 + 黑胡椒~
大家可以作為參考自行溝出配方!

其實煮薑黃飯既香料配方有好多，
有d甚至簡單到只用薑黃粉 + 番紅花(saffron)，
而且薑黃飯大都係配搭咖喱撈汁來食，
所以雖然我著重正宗口味，
但我個人認為煮薑黃飯用既香料並唔需要太執著!

雖然樽綜合香料裡面已含有薑黃 + 茴香籽，
不過我既薑黃飯係比較fancy 既煮法! 
所以會另外再加薑黃粉 + 烘香過既原粒茴香籽~

1. 白鑊烘香茴香籽(Fennel Seeds)。

2. 洗淨印度香米，鍋中下1份米和2份清水，灑上適量薑黃飯香料、薑黃粉和茴香籽。


3. 略略拌勻一下，大火不要蓋鍋蓋煮滾。


4. 待水大滾後以最小火保持微滾，蓋上鍋蓋焗煮約8分鐘，期間不要搞動米飯。

5. 直至飯吸收所有水份，熄火開蓋散去蒸氣後即成。

咖喱羊肉配上薑黃飯和poppadums，絕對印度風美味既一餐! 

但美味既代價係...之後要靠佢癖咗廚房陣咖喱味!