V記自製臘鴨腿

英國買到既臘鴨又貴又唔好食，太鹹太油膩又唔香...於是我決定自家製! ^^
市售臘味喺製作時會加入"硝"作防腐劑，延長保存期之餘，
又會令臘味成品色澤紅潤，賣相靚d，不過硝對人體健康有不良影響!
自家製就唔會用硝，100%無添加安全衛生~
由開始製作至完成唔洗兩星期，why not?

1. 鴨腿2隻撕去多餘脂肪，洗淨後用廚房紙抹乾。

2. 粗海鹽60g、花椒1湯匙和八角1粒(匙羹遮住咗粒八角! XDDD)，以白鑊炒至出香味。

3. 盛起花椒鹽，棄掉八角，加入糖2茶匙拌勻備用。

4. 洗淨及抹乾雙手，用手將全隻鴨腿內外先抹上一層玫瑰露酒，再以按摩動作將酒和花椒鹽抹勻整隻鴨腿，將鴨腿平放在大碟上。

返香港時V媽媽送咗依枝永利威玫瑰露比我，酒香撲鼻，用來做臘味一流! ^^

5. 鴨腿上面壓上重物先醃一晚。(用保鮮紙包好放入雪櫃; 若天氣凍的話，可放在空氣流通地方~)

6. 第二天先將鴨腿流出來的血水倒掉。

7. 將鴨腿反轉，壓回重物醃第二晚。

8. 第三天重覆Step (6) + (7)，醃第三晚。

9. 第四天鴨腿明顯地沒有再滲出血水。

10. 先以凍水沖去鴨腿上的花椒鹽，鴨腿放在可隔水的平面上，用滾水只淋鴨皮部份，看見鴨皮收縮即可，盡量不要淋到鴨肉。

左邊的鴨腿已淋滾水，鴨皮明顯比右邊的鴨腿收緊~

11. 用廚房紙將鴨腿抹乾，綁上棉繩吊在空氣流通及乾爽的地方風乾一星期。

臘味要經太陽曬過先會香~ 風乾期間最好每日曬太陽!

吊起風乾一晚 + 曬太陽一個下午後，鴨腿皮表面開始泛起油光~
若吊在室內風乾，吊鴨腿下既地方最好鋪上一層廚房紙，因為鴨腿會開始滴油啊!

風乾完成後，鴨腿硬身，鴨皮呈半透明，表面有油光，聞起上來有臘味既香味~

鴨肉呈深紅色...咁就可以包好放雪櫃保存~
(可用同樣方法製作臘鴨胸或臘肉啊! ^^)