韓國 - 韓式蔘雞湯 Samgyetang

多年前聖誕同V媽媽、V阿姨 + V表妹去首爾旅行，第一次食到蔘雞湯，當時我心裡面既反應係...吓!!?!?!? 依兜無色無味無香味，雞肉鞋霎霎既野竟然係韓國名菜!!?!?! 大受打擊!!

後來喺香港既韓國菜館聞到隔離枱果兜蔘雞湯好鬼香，我又忍唔住點一兜...終於扭轉咗我對依道經典韓國菜既印象! 同時我得出一個結論 - 跟旅行團，食得最好果幾餐，總係要自費!!

韓國人鍾意夏天時會食用蔘雞湯，佢地認為食完出一身汗，身體裡面唔好既野會隨汗水排出; 不過中國人就認為冬天先係進補季節......

阿V唔理夏天冬天 / 進唔進補...我只係知道冬天凍冰冰，蔘雞湯熱辣辣，有肉有湯又有飯，食完成身暖笠笠好舒服! ^^

1. 糯米2/3杯洗淨，用清水浸2小時，瀝乾備用。

2. 春雞1隻 (*無頭無內臟及去雞腳; 1kg 以下為佳，我依隻830g~)。

P.S. 包檸茶純粹用來做比例! 咪傻吓傻吓加埋落去呀!! XDDD

3. 預備蒜瓣、薑片、紅棗和杞子適量。(塞雞用!)

我今次用咗特大蒜頭，只塞到2瓣，正常size 既蒜頭可能要4至6瓣~

同樣...我用咗新疆大紅棗，普通size 紅棗可能都要4至6粒~

4. 鮮人蔘2枝洗淨抹乾，剪去頭部備用。

5. 春雞洗淨抹乾，剪去雞尾巴和多餘脂肪，先在雞頸缺口處用牙籤封好，防止塞雞的材料漏出。

6. 雞肚內先加入(1)浸過的糯米2湯匙，再放入紅棗、杞子、蒜瓣、薑片和人蔘1枝，最後再放入糯2湯匙。

7. 以牙籤封好缺口後，將雞放在鍋中。

8. 鍋中加入清水*、大紅棗2粒、蒜頭4瓣、蔥段1枝、人蔘1枝和高麗人蔘茶6包(每包3g)，蓋上鍋蓋待滾。(*要用凍水或溫水! 用滾水的話雞皮會爆開啊!)

我用依個牌子高麗人蔘茶~ 其實依個係optional，但加咗人蔘茶既湯水人蔘香味會更加突出!


9. 水滾後用湯匙撇去浮面的泡沫。(如果有的話!) 蓋回鍋蓋，轉中小火煮2小時。

10. 棄掉(8)湯中的紅棗、蒜頭和蔥段，除去封口的牙籤，灑上蔥花，以海鹽和胡椒調味即成。

雞肉已煮得爛熟，用筷子或湯匙已經可以輕易撕開~

配一小碟泡菜同食，滋味無窮~~~~~ ❤


Step 1 浸咗2/3杯糯米，但做蔘雞湯只用咗約4湯匙...因為剩低既糯米要用來做蔘雞粥!

A. 將吃剩的雞肉撕成雞絲。

B. 將糯米和雞絲放入吃剩的雞湯中，再加入切碎的紅蘿蔔，滾20至30分鐘。

C. 灑上蔥花，用海鹽和胡椒調味，就變成好味既蔘雞粥咯! ^^