淮山杞子花膠粟米煲鵪鶉 (先蒸後浸發花膠方法)

鵪鶉素有"動物人參"之稱; 花膠滋陰養顏; 杞子養肝明目; 淮山健脾補肺; 再加埋清熱袪濕既粟米，一個營養豐富滋補靚湯! ^^


以前一直用熱水焗既方法來發花膠，雖然可以發得厚身又大隻，
不過我發現有時發完花膠，容器底部會沉澱咗一層透明狀似啫喱既膠質，
唔洗問阿貴...咁d膠質緊係來自花膠架啦! 好嘥料啊~~~~~

最近無意中從網上睇到一個先蒸後浸既發花膠方法，聲稱可以解決溶膠依個問題，
我就即管試一試啦!! (其實可能好多人已經知道依個方法....... =P )

花膠唔洗洗，視乎花膠大隻細隻，先直接乾蒸20至40分鐘~
我用蒸Miele 蒸咗30分鐘，蒸好既花膠，用凍水浸一晚，
我發現比起用焗熱水既方法，先蒸後浸發出來既花膠較硬身，所以我另外浸多一晚.....

蒸完用凍水浸咗兩晚既花膠果然發得好好，又大又厚身，最正係浸水容器裡面真係無啫喱!


1. 花膠適量浸發好，切成塊備用。


2. 鵪鶉2隻去頭去去毛去內臟 (可請檔主代勞!)，汆水沖淨備用。


3. 瘦肉汆水，沖淨備用。


4. 粟米2條洗淨一開二; 淮山、杞子和蜜棗適量，洗淨瀝乾備用。


5. 水大滾後先放入瘦肉和鵪鶉，再放入其他材料煲至回大滾。


6. 轉慢火煲3小時，以海鹽調味即成。