孖T情人節2015

今年情人節之後幾日就係農曆新年，一直忙大掃除、忙蒸糕、忙煮飯......
而家先有時間寫返情人節~
今年情人節過得特別開心! 佳因Mr.T 全日唔洗返工陪足我超過24小時~ ❤

一踏入情人節零晨12點，Mr.T 先送我一張親手自製情人節卡~ ❤


 
咪以為依張卡平平無奇喎，其實內有乾坤架! ^^
閃閃星光...cute 得來好浪漫啊~~~~~ ❤

情人節一起身就收到Mr.T 大束鮮花........


 
卡 + 花都好鍾意~ ❤

好鬼肚餓...先去Merchant City 既Mercado 食個超級豐富Spanish tapas brunch!

兩丁友食9個tapas...嘻嘻~~~~

我開動嘞~~~~~~~~

清哂!!!! ^^


食完brunch 行街shopping，行到咁上下就返屋企換衫食晚餐~
Mr.T 一直懶神秘賣關子唔肯講帶我去邊食晚餐...... 

渣咗大約1小時車程，到咗一幢似鬼屋既13世紀城堡 - Culcreuch Castle~

入座前先喺餐廳隔離既waiting area 睇餐牌 + 享用canapes......



紅蔥小牛角包 + 雞肝醬泡芙
我一食個雞肝醬泡芙，我就知道是晚依一餐會好有水準!
因為依個雞肝醬，係我食咗廿幾年雞肝醬最好味!!
又香又滑又light...雞肝醬可以整到媲美鵝肝醬，實在太厲害~~~~

 
Waiting area 裝璜豪華古典，燈光柔和，坐得舒服到想瞓覺! XDDDD

好特別既情人節套餐...4個主菜分開男士 + 女士~

到餐廳入座嘞...餐廳裝璜更加似鬼屋! 牆上有好多古舊既人像.......
裡面只有6張枱，每張枱都隔得好開，唔會逼又唔會嘈~

Culcreuch Castle 係一幢13世紀既城堡，用既係真火爐~
(我來咗英國咁多年，第一次見真正燒木炭既火爐! =P )

上菜嘞!!!!! 侍應上頭盆後offer 幫我地影合照，頭盆實在太香噴噴~~~~
影完相急不及待開餐，忘記咗影個頭盆........

Anyway 個頭盆係"椰菜花煙車打芝士松露湯"~
只一小杯幾啖就攪掂，簡簡單單3個材料配合得天衣無縫!
小小一杯仔湯令人齒頰留香，Mr.T 話: 估唔到原來椰菜花可以好味成咁~ XDDD

到主菜嘞! 好心急~~~~~
頭先講過主菜分開男士 + 女士，每人有兩份不同主菜...... 

我既主菜1: 海鱸魚生片配青檸、辣椒 + 莞茜
清新可口，好有驚喜! 從來無唸過海鱸魚可以咁做法，
味覺一邊享受，我腦裡面一邊佩服廚師既創意~

Mr.T 主菜1: Pork Rillette (法式油封肉醬)
肉醬柔軟又好moist，味道豐腴充滿油香，
配合埋酸甜既青蘋果絲中和一下，完全唔會油膩感~


2個主菜1都係冷盆，主菜2係熱盆嘞......

我既主菜2: 燒走地雞胸配薯仔韭蔥暖沙律 + 粟米青蔥醋汁
雞胸細細件cooked to perfection! 
Juicy 唔乾既燒雞胸我食過，不過依個雞胸更厲害，香軟juicy 仲可以嫰滑!!
醋汁薯仔沙律好開胃，同燒雞胸味道非常配合~

Mr.T 主菜2: 28日熟成蘇格蘭牛冧肉、菠菜 + 根芹菜配Madeira Sauce
牛冧肉可以煮到似牛柳...都唔洗講好唔好食啦!

甜品係大家share 既~ 賣相靚到唔捨得食!
(左起)朱古力紅桑子慕絲、香豆法式燉蛋、杏仁餡餅
我一向出街食飯極少食甜品，但依3個甜品都唔太甜而且無假味，
尤其個杏仁餡餅特別好味!!

埋單時送上既朱古力 + 牛油糖...
不過我完全無掂過，因為唔想整走口裡面杏仁餅既味道! XDDDD

埋單後仲有玫瑰花 + 白酒送~ ^^


Fine dining 自問食過唔少，不過依餐每道菜都令我驚為天人!
從未試過出街食飯食到我有衝動拜大廚為師...今次係第一次!!
返屋企車程又係1小時，依1小時裡面我不停回味是晚每一道菜，
同時累Mr.T 幾時再帶我返來食飯!!! XDDDD

後來Mr.T 同我講...為咗安排依餐情人節晚飯，佢1月中時訂咗5間餐廳，
花咗一個月時間慢慢篩選慢慢揀，最後拍板決定Culcreuch Castle!
依一餐情人節燭光晚餐我滿意度爆哂燈，Mr.T 果然有眼光!!
(當然其他4間餐廳有取消訂位啦! ^^)

www.culcreuch.com

平淡但非常開心難忘又好味既一個情人節~ ❤

噢...仲有我今年既情人節禮物係一部laptop! ^^
Windows 8.1.....頭都大哂!! (Thanks Hon~ ❤)