Rothesay Harbour + The Fish People (2015年3月25日)

3月尾4月蘇格蘭天氣乍暖還寒忽冷忽熱，好天時候大曬大太陽，氣溫突升20度; 
轉個頭衰起上來橫風橫雨濕雪冰雹跌到得返1、2度...每年最難預料天氣就係依段時間!
上星期三(3月25日)難得好天氣，Mr.T 帶我去離島行吓~


Rothesay Harbour 位於離島Isle of Bute，
由Glasgow 出發先渣車去Wemyss Bay 碼頭，
搭船大半個鐘頭就到Rothesay Harbour~

到咗Wemyss Bay 啱啱miss 咗一班船......
太肚餓頂唔順!! 碼頭附近無乜好食，求其食咗個fish & chips~

食完野時間啱啱好! 開船嘞~~~~~

是日天氣真係超好! 太陽大到睜唔開雙眼......

藍天白雲，風景都幾靚~ 不過........

大街好少人，weekdays 竟然舖頭10間著咗8間都無開門!
莫講話shopping，就算想搵間咖啡店坐低飲杯茶都無......
連梗有一間喺左近既Starbucks, Costa 甚至麥麥...都無!!
原本計劃來到Rothesay Harbour 先食午餐，
真係好彩miss 班船食咗炸魚薯條........


不過我又無後悔去咗Rothesay Harbour 喎!
是日天氣太好，連帶心情都好好，雖然依個地方悶死人，
但風景真係靚，漫無目的周圍行吓吸吓新鮮空氣都好relaxed 啊~~ ^^
老實講...行街既地方真係無乜! 不過......

喺一間好細既精品店比我搵到佢地! ❤

鴨鴨牛油碟

兔兔陶瓷茶匙

Mr.T 同我講: 依個島妳都可以搵到野shopping...妳真係好野! XDDDD


輕輕鬆鬆喺島上逛咗2粒鐘，我地就回程返去Wemyss Bay，
由Wemyss Bay 再渣車返到Glasgow 剛好係晚飯時間~

Mr.T 話唸住Rothesay Harbour 係離島應該會有海鮮餐廳......
喺島上食唔到海鮮，返到Glasgow 揀咗The Fish People Cafe 晚餐~

店小樓面小枱亦少........

但環境舒適，佈置精緻，好有海鮮既氣氛! ^^

Mr.T 既頭盆Cullen Skink (蘇格蘭薯仔魚湯)
依個係我飲過最好味既Cullen Skink! 熱辣辣多魚肉夠濃稠~

我既頭盆Cafe Fishcake
顧名思義依個係其中一個招牌菜......

真係要食入口先會明白點解咁細個fishcake 可以係招牌菜 + 可以賣£7!
好多fishcake 係將魚肉磨成漿，混合薯蓉搓成形沾麵包糠去炸，
通常食到薯蓉多過魚肉.......
但依個fishcake 用咗多種唔同魚肉混合，魚肉只係壓碎無磨漿，
魚肉仍然可以分開一片片，
保留魚肉既鮮味 + 口感，無加薯蓉100%真正fishcake!
唔沾橙色果pat 甜椒蛋黃醬仲加好味~ £7你係有資格收既.......

Mr.T 主菜蟹肉扁意粉
唔知係餐廳樓面細...還是我地坐得近廚房門口...定還是佢地超好鑊氣?
我發現每次廚房出菜都香到不得了! 等緊上菜時聞到其他枱客人食物真係有點折磨!!
依個蟹肉意粉就係其中一個香到離哂譜既餐!!!

我既主菜點咗Fish Stew
原本做好心理準備份量會同其他餐廳Fish Stew 一樣貴夾細份
殊不知上菜時兜野竟然層層叠叠到咁高! @@
魚肉大大塊...鮮蝦青口大大隻...蕃紅花 + Gruyere 芝士香氣撲鼻，
好味到一滴湯汁都無留! (用麵包索哂!! ^^)


一間好精緻既海鮮餐廳，食物服務俱佳，
食完依餐極速打入"阿V十大喜愛餐廳"之列! ❤

http://www.thefishpeoplecafe.co.uk