Miele 食譜: 佛跳牆

同盆菜一樣...阿V未食過佛跳牆，今次自己整係第一次食~
我好細個已經知道佛跳牆係一道名菜; 後來大少少知道佛跳牆係貴野來;
再後來再大dd知道"佛跳牆"意思 - 好味到連和尚都忍唔住要翻牆討吃......
到咗今日我仲知道佛跳牆英文名叫做Buddha's Temptation，
我終於的起心肝做依道傳統閩菜名菜，雖然準備材料過程繁複，
但煮好後食第一啖...非常值得! ❤ 佛跳牆...果然無改錯名!! ^^

海味乾貨材料 (我無豬蹄筋 + 鯊魚皮，改用砂爆魚肚來代替~)

1. 乾鮑: 將乾鮑放入乾淨無油容器中，注入清水先浸一日一夜; 另煮一鍋水至大滾，放入乾鮑待再大滾後熄火，加蓋焗至水完全冷卻，重複焗水步驟3至4次，乾鮑發大超過一倍有彈性。


2. 花膠 (先蒸後浸發花膠方法click here~)


3. 海參 (浸發海參方法click here~)


4. 江瑤柱原粒浸軟備用。


5. 砂爆魚肚浸軟，搾乾水份剪成塊備用。

6. 急凍素翅解凍，沖洗後瀝乾備用; 如用乾素翅要預早用清水浸2至3小時。

肉類材料 - 排骨酥 + 豬肚


 
7. 排骨用胡椒粉、生抽、老抽、五香粉、糖、紹興酒和蒜蓉撈勻醃過夜。

8. (7)醃好的排骨沾上地瓜粉(即蕃薯粉)，靜置一會讓粉吸收醃汁，炸時才不會容易掉粉。

9. 燒熱油，將排骨炸至金黃，撈起放在廚房紙上吸去多餘油份備用。

10. 豬肚剪去肥膏用粗鹽和粟粉反覆洗擦豬肚內外，用水沖洗乾淨後汆水片刻，再沖洗淨切小塊備用。

油炸材料 - 花菇、芋頭、蒜子、鵪鶉蛋、栗子

11. 花菇浸軟後搾乾水份，用熱油略炸一會撈起放在廚房紙上備用。


12. 蒜頭數瓣去皮，放入熱油內炸至金黃盛起備用。


13. 芋頭去皮切小塊，用熱油略炸一會撈起備用。

14. 鵪鶉蛋先烚熟(凍水下蛋，水滾後續煮4分鐘)，去殼後抹乾，以熱油炸至微微金黃盛起備用。

15. 新鮮栗子去殼去皮略炸...依個時間蘇格蘭買唔到新鮮栗子，所以我用罐頭栗子代替!

16. 筍乾少許汆水一會，搾乾水份備用。

17. 先用筍乾墊底。

18. 再放上洗淨切塊黃芽白和(12)炸好的蒜子。

19. 再放上其他材料。(自己擺靚佢啦! ^^)


20. 另一個鍋中注入清雞湯、清水、蠔油、冰糖1小塊和金華火腿1小片煮滾試味。


21. 將(20)煮滾的湯注入(19)的材料中，加入薑1片，蓋上蓋子再煮至回滾。


22. 待(21)回滾後，整鍋放入已預熱了100C 的Miele 中繼續蒸煮2小時即成。


 
熱辣辣香噴噴...難怪和尚都流哂口水! ❤