發海參

我好鍾意食海參!

不過我只愛炆起來肉厚軟糯既豬婆參~

而人人都話最正既遼參(即刺參)並非我杯茶!

舊年返香港時V媽媽醒3條海參過我~

好多時都想炆來食，但因為一直未浸發所以算鬼數無煮到......

早幾日終於的起心肝攞出來發咗佢!

 1. 先用冷水和蔬果刷洗擦乾淨海參表面的石灰。

P.S. 有人話要先燒燒海參表面再洗擦，但其實盡量擦乾淨石灰已可!

2. 煮滾一大鍋水放入海參，蓋上蓋煲30分鐘後熄火，不要揭蓋浸焗過夜。

P.S. 最好用大一點的鍋來浸焗海參，否則 海參發大後，水不能完全浸住海參!

3. 第二日經浸焗一夜後既海參，好明顯發大咗!

海參表面已開始有彈性~ 若海參表面有殘留既石灰，可以再用冷水和蔬果刷洗擦多一次; 沖淨後鍋內換水重複步驟(2)。

4. 視乎海參大小，重複步驟(2)三至四次，海參會發大至原來體積2至3倍。


5. 掏清海參腸臟及用冷水沖淨沙粒。

 6. 海參切塊(或原隻均可!)，放入密實袋加入清水浸著，包好後可放於冰格儲存。

切記整個發海參既過程裡面，海參或水絕對不能沾油! 否則海參會瀉身溶化成糊狀，咁就嘥料架嘞!!