花旗參煲瘦肉無花果; 南乳花生炆豬手; 西芹雞雜炒爆沙魚肚 & 蝦醬通菜 (仲有隻煎蛋!)
感覺成個世紀無煮過飯!
尋日心情 + 胃口都大致上已完全回復，所以特別煮返餐"膠膠"晚餐來補補過去一星期心靈上 + 身體上既創傷! (胃口唔好都感覺到身體無咩energy......
)最近既憤怒令我感覺到身體上既燥火，所以煲個花旗參湯正好來下下火!
我成日呻喺英國d野又貴又少選擇，但其實英國都有佢既好處! e.g. 今次我第一次炆豬手 - 豬手喺英國平到笑!
大大隻豬手蹄只係£2 (其實我喺泗和行買已經貴咗! 另一間中超仲加平!!) 多皮又多肉且肉質嫩滑，啖啖肉就唔怕老公無啖好食啦! 老公唔食皮益哂我 - 我最鍾意食皮架嘞，骨膠原又可以養顏靚靚~~ 
花生炆完又香又腍，一樣好好送飯架!
上次老公返香港時，V媽媽炒咗大兜爆沙魚肚，老公好鬼鍾意，一個人食哂成兜! (網誌~)
早排V媽媽寄咗2大包爆沙魚肚比我，咁我又試吓老翻V媽媽既炒魚肚
，繼續骨膠原啦! 以前喺香港過時過節，V婆婆V媽媽都一定會煮唐芹雞雜炒爆沙魚肚!
泗和行都有雞肝賣，不過weekend 去時見到唔係好靚......
今次只用咗一半雞腎來炒魚肚，另外剩返既仲唸緊點用~
其實依味餸當然最好緊係用唐芹啦! 不過依度唔係成日有唐芹賣，平均一年只見到一兩次，唯有用西芹來代替啦! 
雖然上次成功令老公不知情底下落搭食蝦醬排骨，佢仲好鍾意呢! (網誌~) 不過之後佢每次聽到蝦醬、蝦膏都仍然有抗拒感......
於是今次我再接再厲靜靜雞唔出聲用蝦醬炒完碟通菜; 開飯後即時夾咗幾大"住"比老公; 餐飯食到一半，見到老公主動自己去夾通菜，於是我問佢......
我: 碟菜好唔好食呢?
老公: 好食呀!
我: 知唔知係咩來?
老公: 菠菜?
我: 係通菜.......(想死!
) 不過其實我想問你知唔知菜用咩來炒? 
老公: 唔知呀~
(不過依個時候老公應該已經估到係一d佢唔鍾意既野......)我: 哈! 哈!! 又係你至憎既蝦醬!!
其實今次我落蝦醬都幾重手架!
我得到既結論係 - 我老公幾憎一樣食物都好，只要唔好比佢知道係咩來，多數都唔會有問題!
不過內臟除外喎 - 依個一定呃佢唔到!! 
至於最後果隻零丁煎蛋...我尋日整餸時唔小心整裂咗隻蛋!
唔好浪費嘛!! 
花旗參煲瘦肉無花果食譜click here~ 南乳花生炆豬手食譜click here~ 西芹雞雜炒爆沙魚肚食譜click here~ 蝦醬通菜食譜click here~
沒有留言:
發佈留言