2010年9月9日星期四

二人世界二餸一湯 - 2010年9月8日 (附食譜)



菜乾紅蘿蔔煲羅漢果; 節瓜冬菇炆排骨 & 蝦醬吊筒

今餐個炆排骨裡面有節瓜,已經有肉又勉強叫做有菜......就煮少一個餸啦,順便可以實習一下"T家少餸制"可唔可行!!?!

不過我發現係唔得既! 因為排骨炆出來仍然係一大煲!!!!!! 其實果盒排骨我前日已經用咗部份來煲菜乾湯,剩底既先尋日用來炆節瓜.......

大家可想而知盒排骨幾大盒!

大家可想而知喺英國做人少既家庭煮婦係幾咁有難度!!

上一餐已經講過我雪櫃裡面放太多野,唔小心郁咗裡面個溫度制,雪鬼壞咗我包靚芥蘭!  (網誌)

 估唔到連我條節瓜都雪壞咗1/3!!!!!!!

我煮飯時先發現條節瓜雪到咁既衰樣,但有好鬼多排骨喎.........唯有臨時浸幾粒冬菇頂上! 好彩依隻叫"珍珠菇"既冬菇仔好細粒好快浸軟~~~~


 不過炆出來仍然係肉少瓜少菜少.......



早幾餐老公喺唔知情既情況底下,大讚蝦醬通菜好味道!  (網誌)

打鐵趁熱我要再下一城!!!
1775465298.gif image by veronica_tsim


(其實.......一我自己想食蝦醬; 二盒蝦醬就快到期! )


 蝦醬吊筒!

都係果招啦 - 事前唔出聲! 嘻嘻~~~~
Laugh-small.gif image by veronica_tsim


結果成碟吊筒佢仲食得多過我,連一向佢唔多吼既魷魚頭都食鬼埋!!



既然上次老公知道蝦醬通菜後既真相後都話好味,點解我今餐仍然唔可以開飯前同佢坦白魷魚係用蝦醬炒既呢?

因為......


 尋日晏晝我喺雪櫃摷到大碟冷飯,於是炒咗個蝦醬炒飯比自己做lunch~

老公lunch 時打電話比我......

 老公: HonHon~ 妳食咗野未呀?

 我: 啱啱食完嘞!

 老公: 妳食咗乜野呀?

 我: 食咗炒飯囉!

 老公: Wow~ 炒飯! 正~~~~~~~ 我都想食!! (Mr.T 好鍾意食炒飯架!)

 我: 係用蝦醬炒既炒飯!! 嘻嘻~~~

 老公: Yuck!!!!!

我: 好好味果喎! 我下次炒比你試吓吖?

 老公: Nah~~~~ 唔洗嘞.......

咁你地話我點可以開飯前向佢坦白呢??
Sigh-small.gif image by veronica_tsim




 菜乾紅蘿蔔煲羅漢果食譜click here~

 蝦醬/蝦膏炒飯食譜click here~

 節瓜冬菇炆排骨食譜click here~

 蝦醬吊筒 (參考食譜)click here~







15 則留言:

  1. 《Ka MaN 日記》2010年9月9日 上午2:04

    係唔係即係善良嘅謊言。。??
    [版主回覆09/09/2010 17:52:00]唔係吖~ 我都無講大話! 我唔出聲之嘛~
     
     

    回覆刪除
  2. Gaileは林家歐巴桑2010年9月9日 上午2:10

    佢應該係接受到陣味而接受唔到個名啦,咁真係逼住要妳瞞住佢喎
    [版主回覆09/09/2010 17:51:00]咁咪話我老公衰囉! 明明覺得好食,但因為佢叫做"蝦醬"就鄙視佢,名稱歧視!!!!!!
     
     

    回覆刪除
  3. 《Ka MaN 日記》2010年9月9日 上午4:12

    佢係唔係以前比"蝦醬"嚇親搞到而家聽到個名都驚。。???
    [版主回覆09/10/2010 17:31:00]其實係咁既.......
     
    試過有次老公喺雪櫃搵到舊我已經開咗既馬拉盞(似蝦膏果隻馬拉盞!),我已經包咗2層三文治袋架嘞~ 不過佢個傻人習慣唔知咩來,就會打開來聞吓.......
     
    佢一聞就慘叫: HonHon~ 依舊咩來架? 好臭呀!!!! 係咪變壞咗呀?? 快d揼咗佢!!!!
     
    我唸係因為依件事啩!
     
     

    回覆刪除
  4. 點解Mr. T 一聽到蝦醬個名就唔想食, 但係唔知既話又咁鍾意食gei
    [版主回覆09/10/2010 17:28:00]唯一既解釋 - Mr.T 係傻既!
     
     

    回覆刪除
  5. 我早排煲左個湯 hahha~ 個傻人唔食涼瓜 仲要係勁抗拒 但係個日我煲個湯 只係同佢講 咸菜 黃豆 排骨 ........跟住比佢飲 我問佢 好唔好飲呀.... 佢話唔錯丫 幾香呀 好飲丫 (奸笑) 跟住佢飲左第一碗 我問佢 仲要唔要呀? 佢話好呀~ 跟住我話 你自己入去"裝"多碗啦.........15秒後......(有苦瓜既 )
    笨笨.....
    [版主回覆09/10/2010 17:27:00]唉~ 我老公又係勁憎苦瓜! 但我又好鍾意食喎......
     
    不過我唔可以好似妳咁"裝"我老公,因為係我老公負責攞餸,裝湯裝飯! 佢裝湯時一定會見到係苦瓜........
     
     

    回覆刪除
  6. 你個邊啲節瓜咁長嘅?香港嗰啲肥肥短短的~~~
    [版主回覆09/10/2010 17:25:00]我都有咁既同感 - 好長! 但唔知點解.....  仲有d毛拮死人!! 好鬼痛架!!!!
     
     

    回覆刪除
  7. 蝦醬炒飯 我都未試過添 好野味呀 好想試下呀 !!!
    [版主回覆09/10/2010 17:24:00]咦~ 妳未試過蝦醬炒飯架? 好正架! V婆婆 + V媽媽都係蝦醬炒飯高手!!  妳都試吓啦~~~~
     
     

    回覆刪除
  8. 蝦醬好野味...我都根鍾意食架...正!!!!!
    [版主回覆09/10/2010 17:23:00]蝦醬緊係好野! 我老公依d假鬼佬都唔識貨!!
     
     

    回覆刪除
  9. 名稱歧視
    [版主回覆09/10/2010 17:23:00]佢根本只係唔鍾意蝦膏個名 + 聞落去陣味! 但事實佢係覺得好味既!
     
     

    回覆刪除
  10. 下次不要透露事實之全部了.......
    [版主回覆09/10/2010 17:21:00]我直頭乜都唔透露! 食完飯先透~~~~
     
     

    回覆刪除
  11. *×◆..嘉b`*PINKY× || °..“2010年9月10日 上午3:51

    蝦醬....我都唔鐘意食>"< 梗係覺得怪怪地既~~~
    [版主回覆09/10/2010 21:41:00]咁每種食物都會有人鍾意 + 唔鍾意既~
    不過我老公未試過就話唔鍾意.......唔會邏輯囉!!!
     
     

    回覆刪除
  12. I love prawn paste chicken. It is so delicious.
    [版主回覆09/11/2010 00:27:00]never try shrimp paste chicken, but it sounds a good idea!
     
     

    回覆刪除
  13. 我同Mr.T 一樣鍾意食炒飯
    [版主回覆09/12/2010 16:43:00]我都鍾意架! 尤其我依種飯桶~
     
     

    回覆刪除
  14. 我以前讀書一個人住煮食仲慘呀~ 有時買食糧真係唔低到唔食算喇~
    [版主回覆09/12/2010 16:42:00]咁我就好少少 - 因為我初頭搬出來係同2位男性朋友一齊分租,佢地都係中國人,所以大家一齊夾錢買餸買米,輪住來煮飯~
     
    後來再搬時都同咗老公拍拖,佢成日都來我度食飯~ 都係間中先煮一個人既啫!
     
     

    回覆刪除
  15. 妳老公真係好攪笑,佢純綷係心理問題,一聽到蝦醬就話yuck,唔知就食到咁鬼滋味 
    [版主回覆09/17/2010 16:49:00]比佢激死就真! 啱啱尋晚我先同佢講: 唔得! 我一定要搵次炒蝦膏飯比你食!!!
     
    佢答我: 不如妳炒蝦膏飯比自己食,另外炒個"正常"炒飯比我,我試少少妳果d睇吓我鍾唔鍾意先?
     
    妳話佢幾鬼麻煩呢!!!!!
     
     

    回覆刪除

Related Posts Plugin for WordPress, Blogger...