二人世界2.5餸一湯 - 2010年9月29日 (附食譜)

生滾肉丸粥 (午餐) 花生蓮藕煲豬尾; 上海烤麩; 蠔油冬筍炒肉片 & 蠔油炒豬脷

 尋日晏晝整咗大窩生滾肉丸粥比自己做lunch!

 因為前晚整鮑魚汁燴蝦子海參肉丸時，用剩咗d肉丸~

最近天氣涼咗好鬼多，最好食熱辣辣既粥架嘞!  食完成身暖笠笠~~~

成日返去6299度食飯都見99用豬尾來煲湯......

 weekend 去泗和行見到有豬尾賣，我又試吓買咗2條來煲湯!

估唔到原來豬尾係咁鬼平果喎!!!!!!  又平又多骨幾好喎~

(骨用來煲湯先好飲架嘛! )

雖然我之前未食過烤麩，但之前見到網友整好似好好味咁~

不過網友用既係一大舊既濕貨 - 我依度緊係唔會有啦......

 點知比我喺中式超市見到有乾貨喎! 將就吓乾貨都照殺啦!!

 用前只要用清水浸軟就用得，都幾方便! 不過我照濕貨既處理方法 - 浸完水後再油炸~

我依度當然連冬筍 + 毛豆都無新鮮貨啦......

 不過有急凍野比我用，我都好滿足架嘞~~~

 至少最後煮到大兜似樣既烤麩出來!

係嘞~ 本來尋日預告話係"勝瓜炒肉片"既.....

點知當我尋晚準備炒既時候，發現喺泗和行買果碌包到實一實，拆保鮮紙拆到我火滾既勝瓜發鬼咗毛!!!!!!!!!!

不過我已經醃咗肉片咯喎!!

而且我唸住有條勝瓜撐場可以整大d碟餸，所以我只預咗好少肉片......

 好彩整烤麩既冬筍多咗少少! 咁我就攞咗幾塊一齊炒，咁炒無咁肉酸吖嘛~

 一睇依包叫做"Blue Dragon"既蠔油方便醬料包裝 - 就知道係呃洋人既產品!

我買咗幾包本來打算寄比香港扑友試吓，不過pack 野寄時忘記咗.......遇著尋晚依個勝瓜發毛既危急情況，依包野就臨時上場!

估佢唔到呃洋人既貨式竟然幾好味喎!!!!!  有興趣試埋其他口味既醬料呢~

Weekend 買咗2條豬脷 - 想食但唸唔到點整~ 索性揼埋落煲湯!

用咗半包蠔油汁來炒肉片，剩低半包汁用來兜吓d豬脷......

 無火煮食就係咁衰架嘞 - 唔記得熄火以為自己熄咗! 所以搞成咁......

因為老公唔食豬脷，所以依個係"半個餸"!

自從蝦醬一役後，Mr.T 似乎醒咗好多!

每逢開飯前佢見到唔知係咩既餸時，會煞有介事問我: 係咩來架?

老公: 依碟咩來架? (指住碟烤麩 + 豬脷)

我: 依碟係豬脷，你唔食架嘞; 果碟就係齋來既!

之後我留意到老公一直只不停夾碟肉片，連伴肉片既蔥 + 冬筍都照殺! 但就掂都無掂過碟烤麩!!

雖然碟烤麩係齋，不過老公都鍾意食寶蓮寺既齋菜，所以我預咗佢會鍾意碟烤麩果喎......

我: 喂~ 你唔食依個呀? (指烤麩)

老公: 唔唔! (竟然夠膽擰頭!!)

我: 咩話?? 你同我講多次!!!!!! 依碟唔係菜來，好好食架!! 你試都未試就同我講"唔唔"!!!?!?!? (以我理解 - 齋同菜係唔同果喎!! )

老公急急夾一大塊塞入口補鑊......

我: 好唔好食呀?

 老公: 係幾好食喎! (今次知機點頭嘞! )


大家千其唔好以為Mr.T 係喺我威迫下就範話好味喎!

因為第一塊烤麩之後，佢繼續自動夾碟烤麩來食!!

Mr.T 一向都好有性格 - 若佢試過一樣食物後唔鍾意，佢會好串直接話我知佢唔鍾意! 而我雖然會唔老黎，但我係唔會迫佢食既!!

所以佢自動夾來食，即代表佢鍾意果樣食物!

不過佢未試就擰頭，我覺得佢越來越衰格!!

 生滾肉丸粥食譜click here~

 花生蓮藕煲豬尾食譜click here~

 上海烤麩食譜click here~