我以後要帶眼識人!!!

有一個人曾經係我blog友 + FB友，舊年返香港時偶然喺街撞過一次，
2012年佢曾經託Mr.T 畫過兩件t shirt 寄返香港，當時完全無問題~
直到今年2月佢再託Mr.T 畫3三件t shirt 寄返香港，兩件3月寄; 另一件4月寄，
分別送比佢兩位朋友做生日禮物......

頭兩件完成3月17日用掛號寄出，郵費£12.45，當時對方有問過我幾錢，
為方便大家，我同對方講等4月寄埋另外果件先一次過比錢~

第三件衫我記錯日子以為係5月頭 (係我記錯，唔關Mr.T 事 + 我有通知對方)，
最後5月7日用普通空郵寄出，當時雙方已講好會以Paypal 付款

5月19日對方仍未通知我收到衫未，我主動問對方，
對方回覆已收到第三件衫，同時話好鍾意t shirt 既質地，
問我t shirt 價錢，想託我買十幾件幫佢寄返香港，
當時我已知道Mr.T 因事6月會返香港，但仲未落實日期 + 我未決定返唔返，
我同對方講Mr.T 遲d會返香港，可以將d衫帶比佢~

6月中我臨時決定返香港，通知對方可以幫佢買衫，
對方託我買咗8件黑白男女款圓領V領t shirt，
同時提及到時喺香港會一次過比返錢我~

我返到香港，對方主動約我見面，但對於一d唔太熟絡既blog友，
我唔想單獨見面，而且亦有其他blog友約我，
所以我準備來個多人blog 聚，當時有問過對方，對方話唔介意......
於是我喺FB開咗一個blog 聚group chat，聚會日子訂喺7月7日星期二，
對方完全無問題 + 答應出席.......

直至blog 聚前一晚(7月6 日星期一)我通知對方會帶埋d衫出去比佢，
對方睇完pm 無回 (正常就算唔得閒都會回一句"OK"架嘛!)
當時我已有預感對方第二日會爽約.......

不出我所料，7月7日聚會前數小時對方通知我，
話佢病咗要去睇醫生，所以爽約，
但對方好神奇，雖然佢病到七彩，但佢即時再約我星期五食飯，
好似有預感自己3日後病一定會好返哂!
不過我推咗對方，因為星期五我已約咗V媽媽~

我返親香港，無論咩野事都一定係屋企人優先!
所以當對方再問我幾時得閒，我答對方唔知，
對方就教我做野: 咁如果約唔到，妳放d衫喺V媽媽舖頭，我過去攞~
不過全程無問過我總數幾多錢!

我對佢既態度非常反感!
而家爽約既係佢，舖頭係做生意既地方，
地方淺窄又好多水，擺包衫喺度又唔知佢幾時得閒來攞，
若我要將野放喺舖頭等d閒雜人來交收，咁我不如轉做代購啦!

我同對方講可以將d衫寄比佢，請佢Paypal 返$500(HKD)比Mr.T，
當我一提到錢，對方就睇完Whatsapp 唔回應，
大半個鐘之後先回我一句: 我好似有單!
言下之意好似話我報大數，我唯有每件衫價錢郵費清楚list 哂比佢睇，對方話OK~

$500條數點計出來呢?
我幫對方買咗8件t shirt，連同3月 + 5月兩次寄返香港果3件，總共11件，
每件£2.50 -£3.30不等，一次掛號 + 一次空郵郵費，全部總數大約係$650~
Mr.T 畫公仔一向都收錢，不過因為我記錯日子遲咗寄衫比佢，
所以Mr.T 決定畫公仔完全唔收錢，$650只係衫價錢 + 郵費總數，
而我計數時計漏咗第二次寄衫既錢，不過我已講咗出口，咁$500就$500
換句說話 - 我地真係豆零都無賺過對方，更加無報大數!

由7月7日起，對方一直無paypal 我，我地都無聯絡過對方，
我亦hold 住果8件t shirt 無寄出，咁之前寄咗果三件佢都未比錢，
好正常我緊係要收到$500先寄果8件衫啦!

直到7月20日 - 我返英國前兩日，我主動聯絡對方問佢仲要唔要d衫，
對方話要 + 即晚會過數比我!
跟住對方比咗大咋bullshit excuses 我，話之前搬屋唔得閒，
Paypal 一分鐘可以攪掂，阻妳幾多時間?
奀唔得閒都可以FB或Whatsapp 話聲我知啩?? 
而且期間我經常見到對方FB Online 囉!
對方解釋係佢roommate 用佢FB玩online game，
佢roommate 玩玩吓game 又會來like 我FB d相咁得意既.....

言談間我越來越覺得依個人誠信好有問題!
加上我仲有兩日就返英國，果幾日又黃雨，
於是我同對方講唔得閒去郵局寄衫比佢 + 會扣返果8件衫既價錢，
我想佢Paypal $250 比我，係3月第一次寄衫 + 掛號郵費比我，
對方可能唔滿意啦，只回我"OK"~

7月21日我無收到錢，佢亦無主動聯絡我解釋點解未過數，
我追問，佢就叫我留個記錄 - 7月22日晚上11點會Paypal 過數比我

7月23日我已離開香港，喺杜拜等轉機時收到對方FB pm，
佢話前一晚試過paypal 過唔到數，
問我攞香港銀行戶口...我根本就無香港銀行戶口!
我住喺英國要香港銀行戶口來托呀?
最後佢話當晚晏d會搵朋友paypal 過數比我，過數後會通知我 ........

7月24日我已返到蘇格蘭，無收到錢，對方亦無通知我，
我再主動問對方，佢話$250我追得佢太緊，
佢話一搵到朋友幫手就會即刻過數比我，唔會走我數，
24日之後大家無再溝通過，而我一直無收到錢，對方亦無聯絡過我~

直至7月30日我先再追問對方，佢話佢paypal 過唔到數，
我又唔肯比香港戶口佢 (已經講過我無香港戶口! 咁點比?)
於是我叫佢去銀行做一張£21 既滙票寄返我，佢話可以 + 會翌日(31日)去處理

我唔知道對方31日有無去處理，因為對方之後又無再聯絡我，
而我唔係真係得閒成咁日日問!

無聲無氣到咗8月3日，我再pm 問佢整咗滙票未，佢睇完pm 唔回!
我唯有喺佢FB page tag 咗我既post 公開留言，
神奇地公開留言後，對方好快回覆我pm 話張票會第二日(8月4日)寄出，
同時將我既公開留言delete 咗!
我pm 裡再問對方可唔可以影張票比我睇，對方睇完pm 唔回

8月4日我再公開留言後，佢回pm 話佢同事已將滙票寄出，
第二朝返到公司會send 返張單比我~

8月5日我無收到所謂既單，再公開留言，
發現對方將其中一個之前tag 咗我既post delete 咗，
(我已unfriend 咗對方，所以只可以喺佢之前tag 過我既post 留言)
對方回覆佢太忙未返到公司，同日晏d返到公司會send 返張單比我，
佢話張票8月4日已寄出，我大概會一星期內收到，叫我預大約8月13日會收到~

兩星期過去，我完全無收到滙票 + 對方口中會影比我睇既單!
8月18日我再pm 對方無收到票，
問對方點解由7月7日話過無數次會過數比我無過?
8月4日話過好多次會影單比我睇又無影到?
對方迴避問題不答!
對方只話第二日(8月19日)會send 張掛號單據比我自己check，
同時佢將之前tag 我既全部post delete 哂，

不過對方Whatsapp 我同我講:

"果200幾蚊妳追到好似去乞咁"
(就係因為妳唔比錢，我先要乞啫仆街! 妳真係爭我$250咁少咩? 我計少妳咋!!)

"而家個問題係妳未收到啫，咁我影個掛號比妳，妳又話我做乜影個掛號比妳，妳係咪撩交嗌呀?" 

"既然妳講得咁大聲話妳寧願唔收既話，咁妳而家就唔好再講野就收聲啦!"
(而家係妳爭我錢，如果妳肯比，我點解唔收呀?)

"我delete 個post 唔等如我唔係光明正大"
(究竟佢光明正大咩野呢? 光明正大託人買咗野後唔比錢??)

"咁又係妳話要寄掛號吖嘛，唔影掛號個number 個日期比妳，我點可以證明我有寄比妳呀? 我淨係影張票比妳都無用啦，淨係影張票無寄過出去"

註: 我從來無要求過佢寄掛號，亦無要求佢影掛號比我睇，
由始至終我只要求佢影張票比我睇! 
而且無論係滙票或掛號，佢根本從來都無send 過比我!! 
寄掛號我會兩個幾星期都收唔到?

對方話佢無影相比我睇，係因為佢忙到無返過公司...又話自己出咗trip......
(8月5日至8月18日十幾日都無返過公司? 做乜野公司可以free?? 傳銷???
既然返唔到公司比唔到相我睇，點解一次又一次同我講會send 比我?
出咗trip...無同我講過我點知? 當我曉問米??)

8月18日對方話8月19日會send 個掛號number 比我，
仲會開一個新Paypal AC，8月19日6pm 前過數比我，
之後對方就block 咗我Whatsapp.......

今日8月21日，Paypal 無過數，滙票/滙票既相/掛號number，我全部都無收過!
啱啱剛才對方unblock 咗我Whatsapp 一分鐘，
我問對方: 妳終於捨得上線嘞? 
對方回答: 一直有上
之後又再block 返我.......


由我踏上飛機返英國果一刻，我已經知道對方唔會比返錢我，
3月買野到8月都未比錢，真係有心比既話一早就比咗啦!
一早已經唔係錢既問題，而係我真係好好奇，
$250雞碎咁少錢，一個人可以無賴到咩野極限呢?
可以講幾多大話，藉口可以有幾多變化??
錢我知道無可能收到，就當做捐比對方整容吧!

阿邊個既男友 + 朋友，你地唔好再著果幾件衫嘞!
你女友 + 妳朋友送比你地份生日禮物無比到錢架! 賊贓來架!!