提子

提子係咩野味既呢? 提子...咪係提子味囉.......
錯! 係棉花糖味 + 熱帶生果味至啱! XDDDD

今年Asda Extra Speical 系列推出咗3款限量版提子，
分別係熱帶生果味、士多啤梨味 + 最奇怪既棉花糖味~

雖然唔好甜既阿V對生果麻麻地，不過有新野當然要試吓啦! ^^
新野似乎頗受歡迎，我屋企附近間Asda 一盒都無，要特登去一間較遠既分店，
但都只有棉花糖味 + 熱帶生果味，暫時未搵到士多啤梨味~

棉花糖味提子"Cotton Candy" 原產美國加州，由不同品種提子雜交培植出來，
顧名思義...粒提子有棉花糖既味道! XDDD

其實棉花糖味提子2013年已正式推出市場，除咗Asda 之外，
英國另一間大型連鎖超市Sainsbury's 都有得賣，
Sainsbury's 仲用返原名"Cotton Candy" (美國棉花糖既叫法)，
而Asda 就用英式叫法"Candy Floss"~
(P.S. 係一絲一絲果種棉花糖! 唔係一舊舊果隻啊!!)

棉花糖味提子係青提子來，青得來帶黃，橢圓形較長身~
一打開包裝就聞到濃濃既棉花糖氣味，陣味仲好真實，
由於只有棉糖香味完全無提子香味，入口後依種香味就變得怪怪地，
老實講得意係好得意，不過一味得個甜字...好甜好甜好死甜...not my cup of tea! 
食完後嗝氣嗝上來仍然係一陣陣棉花糖味道.......
仲有手指掂到提子汁，又係一陣棉花糖味!!!!!

熱帶生果味...正常好多既味道! LOL

一樣係青提子，顏色較綠 + 圓碌碌似波子咁圓~
打開包裝後...完全聞唔到我預期中既熱帶生果香味!
正喺度疑惑緊...但食入口有種類似菠蘿既酸酸甜甜味道，
仲有一陣微微既雜果賓治香味，幾好食喎! ^^

Verdict: 熱帶生果味完勝棉花糖味! 
熱帶生果味會再買; 至於棉花糖味...試過就算吧啦........

P.S. 聽聞舊年臨近中秋時CitySuper 入過棉花糖味提子，當時$170一包，
名字跟返美國叫做"Cotton Candy"，有興趣想試今年可以去碰碰運氣~

以上兩個新品種提子，都不及依隻有一個好靚既名叫做"Sable" (紫貂) 既黑提子好食!

細細粒皮脆多汁又香甜，係有提子味既香甜! 我都係鍾意食返d正常野 =P

希望可以快d試埋士多啤梨味啦! ^^