購物療法

Shopping / 敗家，洋人美其名為Retail Therapy (購物療法)~
實在形容得太好太存神! 尤其對女人特別有效!!

雖然阿V無乜大問題，但隨住個肚越來越大越來越重，
行動越來越論盡兼腰酸背痛，行又唔係坐又唔係...心情或多或少會受影響!
好彩購物療法對我好work...至少work 一陣啦~ LOL

失魂阿V一個月之內打爛咗4隻玻璃杯......
我鍾意咗依套刻花玻璃杯好耐，但£50實在太貴，一直唔捨得買，
撞啱依個時候佢半價喎! 其實半價咗我都覺得貴，
不過都買下來當提醒自己小心d唔好再打爛啦! ^^

大約個零月前見到依個正宗日本製純鐵無塗層玉子燒pan，雖然本身已經好平，
但直覺話我知無乜洋人會對依個pan 有興趣 - 因為佢地未必識用~
我有預感佢遲早一定會減價! 所以我按兵不動，每隔兩三日就去及吓......
不出我所料，早幾日依個pan 終於上咗減價貨架嘞!
雖然只係平咗£2咁大把，但已經滿足哂我既師奶心態!! XDDDD

Lakeland 依個薯仔刨又平又好用，但唔知點解每隔兩三年佢就會自動失蹤......
依個已經係第4個 =P


最近買得比較多既係衫! 其實我手手腳腳無乜大變化，唯獨係個肚不停變大，
一向著開細碼甚至加細碼既我，屋企真係幾乎搵唔到衫啱著.......
衣櫃裡面有幾十件褸，只得3件拉到拉鍊/扣到鈕，
好彩已經春天天氣開始暖，唔洗買新褸~ 但的確有需要買新衫，
大前提係堅持唔買孕婦裝 + 揀一d oversized 既款式，
咁就唔洗特登買大碼或加大碼 + 生完BB都可以著得返啦! ^^

減價堆中比我搵到件中碼oversized top! 初時係比佢既靚質地吸引.......

點知攞上手發現係Fenn Wright Manson! 原價£50...減價£5咋~ ^^

牛仔布娃娃款，依件應該最似孕婦裝! XDDDD

剛過去既星期六天氣超好~ 本來懶鬼上身唔想出街，
但電視廣告提醒咗我是日Next 又大減價!
反正屋企附近retail park 就有間Next，當出去散吓步......
始終都係好晏先出去，不過水尾都比我揀到oversized 條裙，
咪睇佢好似咁闊呀，其實10號來架咋! ^^


一條裙又點夠喉呢? 尤其天氣咁好(藉口!)，買完裙去埋隔離TK Maxx......

屋企個kitchen scale 壞壞地，正好比我喺TK Maxx 減價貨架上搵到依個德國牌子Kela 110週年版(!)，£15減到£5! ^^

設計簡單又好輕巧~ 理得佢咩鬼週年版! LOL



再比我搵依套日本製櫻花豉油碟仔...半價 - £10減到£5! ^^



有時真係唔想出街，一樣可以online shopping! LOL