Miele 食譜: 黑糖紅豆砵仔糕

好多人一講起砵仔糕，第一句就會話: 我相信無咩土生土長既香港人會未食過!
Erm.........我咪未食過囉~
因為由細到大唔好甜食 + 細個無乜零用錢買立雜野食 + 其他不明原因，
我真係從來都未食過喺街買既砵仔糕!
今次係第一次食砵仔糕...不過唔知似唔似街買既，因為係自己整~ ^^

之前買落既西班牙陶砵仔，同傳統砵仔糕用既砵仔好相似啊! ^^

1. 紅豆適量洗淨，用清水泡浸過夜，第二天瀝去泡浸的水，加入新的清水以慢火煮
1小時至軟，熄火繼續焗水備用。(或可利用燜燒罐煮紅豆!)

2. 鋼盆中放入粘米粉80g、木薯粉和澄麵各15g。

3. 加入130ml 清水以手動打蛋器拌勻至無粉粒。


4. 陶砵掃上少許油，先放入蒸爐或隔水蒸熱數分鐘。


5. 煲中放入片糖45g、黑糖30g和清水180ml，煮至片糖和黑糖完全溶化。

6. 將(5)的糖水(要熱!)加入(3)的粉漿內，邊加邊以打蛋器徹底拌勻後過篩。

7. (1)的紅豆隔去水份; 將(6)倒入已蒸熱的陶砵內，再加入適量紅豆。


8. 放入蒸爐以100C 或隔水大火蒸10鐘，在糕面放上少許紅豆，再蒸10分鐘。

9. 取出待涼30分鐘，脫去砵仔即成。


雖然唔知似唔似"真正"既砵仔糕，
不過唔太甜又好香黑糖味，好好食啊~ ^^