孖T澳門為食一日遊2008: 澳門扑友 (11月17日)

11月17日我地去咗澳門一日遊~ 我 + 老公都唔賭錢，亦唔好賽車...澳門對我地來講 - 其實冇野玩! 不過講到食野，就真係我地既天堂!!!! 所以今次去澳門，最主要係食野 + 同網友Samchi 媽見面~~~~~

Samchi 媽夫婦來碼頭接我地，我地一落船就帶我地去食好正既葡國野 - 坤記餐室~

 4個人既lunch.....

成枱都係...咁究竟食咗咩呢?????

 先來個"咖喱薯仔牛腩"~ (好味!)

 燴牛脷~ (好好味!!!)

 燴牛胸~ (依個最好味!!! 我初時聽"牛胸"個名好似好乾 + tough 咁...點知原來牛胸肉係好軟熟果喎!!!! 口感似牛展~~~~ 好好味!!!!) 

 唔知咩雞~ (超好食! 初時睇佢個樣以為似炸子雞，不過一食落口就知係兩回事!! 好好味既味道~~~ 不過難以形容! 聽Samchi 媽講，依種雞只有坤記有得食~~~)

 食葡國野點可以冇馬介休呢??? 香口既"馬介休球"~

 白烚馬介休~

 再來多碟炒飯~

仲有3個薯茸青菜湯~ (不過唔記得影相! )

 依餐非常咁豐富 + 好味!!!! 下次再到澳門一定要再去食餐勁~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

其實之前我已經去過澳門2次，不過老公今次就係第1次去澳門~ 所以點都要同佢去吓d遊客地方...先去大山巴，再去澳門旅遊塔~

 畏高既我幾年前去過旅遊塔1次~ 當時係夜晚，今次日頭上去...感覺依然係咁驚死!!!

 不過行行吓就完全唔驚嘞!

 有個傻佬喺旅遊塔上面玩break dance......

 旅遊塔側有個露天美食展~ (彩色帳篷範圍就係嘞!) 不過好可惜今次時間唔夠，所以冇去到! 下次一定要去!!!! 美食展~~ 你要等我呀!!!!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

 遊完旅遊塔後，Samchi 媽接咗佢2位千金放學，就一行5人去咗大利來記食佢地出名既"豬扒包"~

 我之前已經食過大利來記既豬扒包~ 非正掛念依個味道! 豬扒皇老公第1次食，當然讚不絕口啦!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

 接住落來...都係繼續食! Samchi 媽車咗我地去氹仔一間出名葡撻~

 葡撻對我來講太甜...不過一場來到，當然點都要試試啦~~~

 葡撻店外有2隻好可愛又乖既狗仔~ (真係好鬼cute 呀!!!!

 不過佢唔多睬我....)

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

 之後再帶老公見識吓天然既黑沙海灘~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

舊年9月返香港時，已經想見識吓威尼斯人有幾靚~ 不過當時啱啱開張，99去完返來話有好多店仲未開! 所以冇去到......

 今次就唔同嘞! 裡面真係好鬼大 + 靚~~~~

 我地仲一齊搭船仔~ 我地既船夫"Victoria"即席清唱咗4首意大利文歌!

我材疏學淺...只認得出第1首係"Santa Lucia"~ 哇~~~ Victoria 把聲簡直係天籟!!! 到而家我仍然記得佢清唱"Santa Lucia" 既甜美歌聲~ 我從未聽過咁好聽既"Santa Lucia"!!!

Victoria 把聲好powerful，唱足4首歌 + 首首難度高...但一粒音都冇走到!!! 連喺河邊漫步緊既遊人聽到佢既歌聲，都停落來拍掌....

我 + 老公都認為以佢既歌喉...做依份工真係好浪費! (果d乜idol 物idol 唔該快快行埋一邊!)

 成程船仔會經過幾條橋既橋底~ Victoria 話我地知 - 每次船經過橋底，老公都要鍚我一啖!

 Samchi 媽 + 佢2位可愛既囡囡~

 威尼斯人裡面真係好靚! 連個茅廁都金碧輝煌~~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

去完威尼斯人...又係時間食晚餐嘞!

 join 埋Samchi 媽既老公，去咗"Bee Vee"食咗餐好味到唸返都流哂口水~~~~~~~

 V阿姨先前同我講 - 去澳門一定要食蟹粥...依個"田雞蟹粥"正到非文字可以形容!!!! 我食咗4大碗~~~ (去開澳門既朋友，依個一定要食!!!)

 大大碌 + 啖啖肉既"風鱔"......

 "米通鯪魚球"~ 米通香脆 + 鯪魚球彈牙爽口......

 老公唔啱既"灼豬雜"~ 裡面有豬潤、豬腰 + 粉腸，用來點辣椒豉油冇得彈!!! 由我 + Samchi 媽2人瓜分咗依碟野~~~

 仲有大大隻既椒鹽蝦碌.....

本來仲有隻雞...不過伙計唔記得落單! (下次先來食你!!!) 不過依餐咁好味，已經食得好滿足~~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

 食完飯送咗2位千金返歸後，Samchi 媽夫婦車我地去影吓澳門好靚既夜景!

之後Samchi 媽夫婦就送我地去碼頭搭船返香港嘞! 短短一日澳門遊，就喺飲飽食醉之下結束......

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

寫在後頭......

今次返港行程緊湊，只能夠到澳門一日，來去匆匆...不過我地都玩 + 食得好開心! 我地非常感謝Samchi 媽一家百忙之中抽空既熱情招待~ 帶我既食咁多好野......Thank you 啊!

P.S. Samchi 媽~ 妳2位囡囡真係好可愛! 尤其Katrina 唱校長既"霧之戀"簡直令我聽出耳油~~ 每次唸返起佢既歌聲......我都笑到肚痛!!!!

Samchi 媽本想帶我去食我好想試既牛鞭...牛鞭喺澳門好似都幾普遍~ 不過有一間收咗工，另一檔又冇鬼哂.....睇來今次我同牛鞭都係冇乜緣份! 唯有留返下一水~~

 喺澳門食唔到牛鞭...條氣唔係好順，所以返到香港等緊車返沙田時，喺深夜小食檔整咗串辣魚蛋 + 牛膀補返數~~~~~~