2008年11月1日星期六

BBC Good Food Show Scotland 2008 (11月1日)


由尋日(10月31日)開始一連3日,喺SECC 又有一年一度既"BBC Good Food Show Scotland"~ 我地早幾年都去過BBC Good Food Show,但就唔係年年都去! 因為唔係年年都記得幾時......

 £16一個人...真係好過去搶!!!


 今日係星期六,應該係最多人既一日! 今年有超過170個攤位......


 行行吓突然見到有一檔有好多人排隊~ 人頭擁擁......原來係Gordon Ramsay! 佢幫買咗佢既書既人簽名~~~


 我對佢既書冇乜興趣 - 因為係佢既自傳~ 並唔係食譜! 不過我都湊熱鬧走埋去影相......


 依個就係我地既午餐...哇~~~~ 依個"Puddledub 水牛扒漢堡包"真係冇得頂!!!!!


 依個漢堡唔係用一般既漢堡扒,而係用原塊水牛扒!


 一向對漢堡包都冇乜興趣既我都覺得頂呱呱!!! 原本我話唔要,所以老公只買咗1個~ 老公比我咬咗啖之後...即時再去排隊買多個! (睇我食得幾鬼滋味~~~~~)

行行吓突然又聽到好多人尖叫~~ 我地朝住尖叫聲行......


 原來又係Gordon Ramsay!!!


 佢為Winter Kitchen 現場示範Minestrone 煮法~




Gordon Ramsay 應該係現時英國最有名望既名人廚師! 佢係Glasgow 出身 + 長大~ 成為名廚之前,係一名足球員; 現時英國電視台,同時最少有3個由佢主持既電視節目熱播緊......

我其實有少少唔明 - 點解Gordon Ramsay 咁受歡迎???? 毫無疑問佢係一個好叻既人~ 我其實都幾欣賞佢,因為佢真係有料 + 好有頭腦! (所以佢咁串!!!) 我都好鍾意睇佢既電視節目,但佢既節目幾乎全部都唔關煮餸事...所以我硬係覺得佢似一個生意人,多過似一個廚師! 不過同時我又覺得 - Gordon Ramsay 雖然好串好串,但佢絕對有資格咁串既~~~~


 再行行吓...見到好多人攞住一串串既薯片! 據我所知,香港都好似有依種串串薯片! 但喺英國我就冇見過嘞......

搵到攤位之後,我地就排隊...竟然發現依種薯片係免費派街坊喎!!!! 原來依檔野做緊franchise 宣傳,想吸引人喺英國開連鎖店~

我最鍾意免費野! 於是同老公一人一串 - 我就要green onion 口味 ; 老公就要BBQ 口味...


 睇住佢地用竹籤插住一個個新鮮薯仔,再放入機裡面...好快就成為一串既薯仔片~ 幾得意!


 得意就幾得意...不過味道就好一般! 我唸英國應該冇市場~ 假設賣£1 一串,我唸d人會寧願買薯條!


 甜品怪老公見到雪糕緊要食返枝啦~~~

今年Good Food Show 都算多野行 + 多試食~ 不過好多local 野其實都唔難買到!

我一向都好鐘意食西班牙火腿~ 舊年去西班牙補渡蜜月,我就試過5分鐘內搞掂咗一大包!


 有一檔現場有一大隻依種火腿,職員不停切比人試食~ 我試咗一小塊後,就即時決定要買一包!!!


 依包野好鬼貴 - 要£12~ 不過我從未試過依種咁油潤 + 咁甘香既味道!!!! 同我以前試過所有既火腿好唔同!! 所以貴d都係值得既~~~

之前又試咗一種味道非常特別既熟煙三文魚,本來想返轉頭買...但會場好鬼大,行到好鬼攰! 所以廢鬼事搵......


 好多攤位都有免費食譜任攞! 有d仲係一本本,印刷精美到似食譜書~ 我攞咗一大叠! (不過我唸要等喺香港返來時先可以試煮咯~~~~)

10 則留言:

  1. 我鐘意Gordon Ramsay 既 kitchen's nightmare, 但就非常唔鐘意他經常 fxxk來 fxxk 去, 有無需要講o甘多粗口呢?
    不過我好犯賤, 仍然會繼續收看 kitchen's nightmare
    幾時返香港呀?
    [版主回覆11/02/2008 17:41:00]Kitchen's Nightmare 我都鍾意睇~ 不過我最鍾意睇既係Hell's Kitchen! 但其實我2個都冇跟......
     
    我都認為佢唔雖要講咁多粗口~ 不過依個應該係佢個人style! 但佢好似有越講越勁既傾向......

    回覆刪除
  2. 我都係好鐘意攞食譜...煮唔煮都好..攞o左先
    呢期我都愛上了意大利火腿...
    [版主回覆11/03/2008 00:52:00]意大利火腿....西班牙火腿......其實我都唔係好識分!  總之食落口enjoy 就得嘞~~~ 包野我尋晚返到屋企即時搞掂咗咯...得6塊咋!!!!!!

    回覆刪除
  3. 好多嘢食呀~即係等於香港的美食博覽會?
    [版主回覆11/03/2008 18:44:00]我唸香港果個應該正好多 - 因為我未去過香港美食博覽!!!  因為果時暑假返香港,美食博覽未開始,就要返來開學...所以咁多年我從未去過~~~~~

    回覆刪除
  4. Woo!連脆脆薯片都有一定要試下!我30號會去birmimgham嗰個而我之前summer巳經去過又係bbc 攪嘅Summer Good food show但無這個咁大!
    我個friend好鐘意Gordon Ramsay上次都有揾佢簽名佢現在逢星期五係Channel 4 9:00pm有個新節目叫Gordon Cook along Live現場教人煮餸都幾好睇
     
     
    [版主回覆11/03/2008 18:49:00]唔知birmingham 同Glasgow 既good food show 有冇分別呢??? 有機會我都想去睇吓其他既good food show~~~
     
    我都欣賞Gordon Ramsay~ 不過就唔算鍾意佢!  我都見過依個新節目廣告,幾得意! 但我仲未睇過.....

    回覆刪除
  5. 到你返香港可以試下去君悅酒店食自助餐, 佢有四款意大利火腿, 成隻肶咁切比你食, 係超級好味....架....
    [版主回覆11/03/2008 18:58:00]返到香港...我地只會集中食喺依邊食唔到既野! 火腿...都係留返返來先食咯~~~ 反正依邊買到嘛! 

    回覆刪除
  6. 係啊!!串串薯片長州有啊!!
    當時我食得太飽所以無試到,睇賣相不錯應該好味吧!!
    [版主回覆11/03/2008 23:33:00]啊~~~~ 係呀! 我唔記得喺邊度睇返來 - 話長洲大有串串薯片架!!! (會唔會係妳呢? 妳有冇喺blog 度講過??? 定我喺雜誌睇返來呢???)
     
    我自己就覺得好普通嘞! 個造型就幾得意~ 不過可能係因為我唔好零食先會咁覺得......

    回覆刪除
  7. 我未見過尼D一串串薯片...真係大鄉理

    回覆刪除
  8. 我都係CITYSUPER買過啲串串薯片比我對仔女食,好似$15串,$25兩串。但係佢地食得好論盡,"meet"一片,跌一片,結果食咗半串佢地就唔要,到我一試,啲味道真係唔夠卡樂B好味

    回覆刪除
  9. 唔係啊!!
    我去長州既相未放上blog度

    回覆刪除
  10. 你果個薯片 香港而家都有得食 不過好遠 長洲呢~

    回覆刪除

Related Posts Plugin for WordPress, Blogger...