孖T返香港2008: 老公腸胃炎 & 半夜4點既7仔宵夜 (11月5日 - 6日)

頭幾日返到香港，需要時間適應jet lag，所以除咗食之外，並冇安排任何特別活動~

11月5日: 返到香港我做既第一件事 - 剪頭髮!

一落機我已急不及待叫V媽媽call 我既"御用髮型師" - Eddy~ 事關我已整整一年冇剪過頭髮......喺英國生活多年，我仍未搵到合心水既髮型師; 加上我個人比較麻煩奄尖...除咗Eddy 之外，基本上我係唔會比其他人剪我個頭既!!! 所以我唯有實行"返香港先剪"既制度~~~

返到香港我地會stay 喺太6299既沙田村屋~ 不過我地就第一時間返太子V家放低行李後，就飛車落尖沙咀剪返個靚頭! 剪完頭髮先返沙田報到......

喺沙田係咁二食過晚飯之後，我同老公就返去V家再食過! 本來話同V媽媽出街食，不過V媽媽話唔知想食乜，所以就買咗深井出名既"陳記"燒鵝脾 + 燒肉返屋企比我地食~ (隻燒鵝脾好鬼巨型...不過我唔記得影相! )

 V爸爸買咗幾隻迷你西瓜返來~ 我地未見過依種西瓜仔，覺得好得意! 雖然咁細隻，估唔到原來咁甜喎~~~~~

喺V家食完飯，我地又要返沙田覺覺豬......但第一天行程仲未完! 事關我瞓到半夜4點幾就醒咗，仲有d肚餓!!! 於是叫醒老公陪我行去7仔食宵夜!!

我對7仔既叮叮點心有個奇怪情意結~ 2年前香港擺完酒，返到酒店房後有room service 又唔order，係都要老公去7仔買大袋叮叮點心返來.......

 是晚宵夜 - 華園雞脾、魚肉燒賣 + 道地煎茶~ (個魚肉燒賣超好味!!!!!)

 老公只係陪食...所以只係好簡單既維他芒果汁 + 青檸四方果啫喱~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

11月6日: 是日我地約咗V媽媽食lunch......不過唔知係咪水土不服or 唔夠瞓呢? 老公一起身就開始腸胃炎! 初時佢死頂話冇事...

 我有少少內疚架! 因為我覺得盒"四方果"係罪恢禍首~ 而老公係因為陪我食宵夜先會食四方果.......不過老公話唔關事喎~ 佢話喺倫敦等轉機時已經有少少唔舒服喎!

我見老公個樣越來越辛苦，所以我叫老公同我地食完lunch 就返沙田休息。近近地去咗"Tiffany"~ 不過我爭d比老公激死......

 我: 你不如食"班片湯米線"啦? 清清地.....

 老公: 我想食"吉列豬扒意粉"!

 我: ..................(無言~ 不過見老公一返到香港就病咁慘，並唔想鬧佢~~~~)

 我: Honhon~ 你唔食得吉列豬扒架..."火腿絲通粉"好唔好呀?

 老公: "鵝肝炒飯"呢?

 我: ...................(超級想死!!!!)

 最後老公話想食"煎牛扒多士"......我投降嘞~~~~

 "班片湯米線"由V媽媽認頭~

 我就要咗"芝士鴨胸燴意粉"~

(老公係識揀喎~~ 因為3個餐之中，最正既竟然係佢個"煎牛扒多士"!!!!!)

食完lunch 老公就返咗沙田休息嘞~ (好可憐~~~

) 不過因為老公返咗去休息，我同V媽媽有一整個下午既難得girl time! 去咗shopping~~~~~~

傍晚時份我返到沙田，老公已經好返好多~ 當晚半夜4點，仲逗我去7仔食宵夜!

 是晚宵夜 - 北菇滑雞飯、魚肉燒賣、烏龍茶; 減肥可樂 + 腿蛋治...就緊係老公架啦!

第二朝起身...老公已經完全好返哂嘞!!!!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

寫在後頭......

雖然我地既香港之旅一開始出師不利，不過都有好事發生既!

- 我地上機當日(11月4日)，適逢美國總統大選~ 到我地上咗機，仍然未知賽果; 第二日到達香港，降落一刻機長向全機宣佈 - 奧巴馬當選! 機艙一時間掌聲歡呼聲口哨聲此起彼落 - 包括我 + 老公在內~ (冇錯, 雖然我係師奶一名~ 但我係非常關心時事既!!!);

- 雖然老公連續請咗3星期假，不過原先我地只返香港2星期，17日就要飛返英國~ 因為老公本來19日有個好重要既會議要趕返來出席.......點知到咗香港落機冇耐，老公就收到SMS - 個會議改咗12月先開!!!!! 所以我地即時打電話去BA改機票至21日先返英國~ 不過每人要比£50改機票......加埋原先miss 咗班機要補買既機票錢...足足用凸咗£500!!! 冇咗成隻手袋呀.........

 (不過可以留多幾日見屋企人~ 所以對我來講都係好事! )